Во текот на 2014 година во Република Македонија се регистрирани 23 нови ХИВ позитивни лица и 16 заболени од СИДА или вкупно 39 нови регистрирани случаи на болни, од кои едно е десетгодишно дете, се наведува во најновиот извештај „Факти за ХИВ/СИДА во Република Македонија за 2014 година“ објавен на интернет страницата на Институтот за јавно здравство.

Според податоците на Институтот за јавно здравје, во текот на годинава се регистрирани три смртни исходи од СИДА.

Две од лицата со ХИВ/СИДА се на возраст од 10 до 19 години, 16 лица спаѓаат во возрасната група од 20 до 29 години, 14 се на возраст од 30 до 39 години, три лица од 40 до 49 години, а четири лица се во групата повозрасни од 60 години.

Според половата припадност, 37 од заболените се мажи, а две се жени.

Од вкупно 39-те регистрирани случаи во текот на оваа година, дваесет случаи се забележани во главниот град Скопје, четири во Кочани, три во Штип, по две лица се заболени во Свети Николе, Кавадарци и во Прилеп, а по еден заболен е регистриран во Тетово и во Струмица, како и еден странски државјанин.

Според начинот на пренесување, кај десет лица имало хетеросексуален начин на пренос на ХИВ, кај 25 лица преку сексуален контакт на машко со машко лице (МСМ), кај три лица е непознат начинот на трансмисија, а кај едно лице со инјектирање дрога.

Состојбата со ХИВ/СИДА во Македонија добиени врз база на епидемиолошките податоци за период oд 1987 година, кога е регистриран првиот случај, па заклучно со 28-ми ноември 2014 година, покажува дека за споменатиот период вкупно се регистрирани 236 лица кои живеат со ХИВ/СИДА.

Според возрасните групи на лицата кои живеат со ХИВ/СИДА, се покажува дека возрасната група од 0 до 6 години учествува со 5 лица, од 7 до 14 години учествува со едно лице, од 15 до 19 години се регистрирани 5 лица, возрсната група од 20 до 29 години учествува со 70 лица, најбројна е возрасната група од 30 до 39 години којашто учествува со 93 лица, од 40 до 49 години има 35 лица, од 50 до 59-годишна возраст се регистрирани 20 заболени лица и во возрасната група од над 60 години за речиси четири децении се регистрирани 7 лица кои живееле со ХИВ/СИДА

Според начинот на пренесување на ХИВ, се констатира дека досега за споменатиот период кај 114 лица е добиен податок за хетеросексуален контакт при трансмисија на ХИВ; кај 93 лица бил сексуален контакт на маж со маж (МСМ); кај 12 лица било интравенско користење на дрога (лица кои инјектираат дрога – ЛКИД); 6 лица биле хемофиличари; кај 6 лица е регистрирано пренесување на ХИВ од мајка на плод и за 5 лица не е добиен податок за начин на трансмисија на ХИВ. Од вкупно 236 лица кои живеат со ХИВ/СИДА, 189 лица се од машки пол, а 47 лица се од женски пол.

Случаите со ХИВ/СИДА се регистрирани во 25 општини на државата, и тоа најголемиот број од нив се регистрирани во Скопје – 108 лица, Тетово – 23, Куманово – 14, Прилеп – 10, Охрид – 9 и Кичево – 8 заболени лица. Во овие шест општини се регистрирани вкупно 172 лица кои живеат со ХИВ/СИДА или 75 отсто од сите регистрирани случаи во државата.

Во вкупниот број на регистрирани случаи 10 лица се од странство.

Заклучно со 1-ви декември 2014 година, во Македонија од СИДА се починати 75 лица од СИДА.

Во земјата има вкупно 160 лица кои се болни од СИДА и 76 кои се ХИВ позитивни.

Инаку првиот ХИВ позитивен случај во Македонија е регистриран во 1987 година, додека прво лице заболено од СИДА е забележано во 1989 година, а истата година е забележан и првиот смртен случај од СИДА./крај/мф/сн

Извор: Макфакс