Двајца доктори од Штип и Скопје ќе работат на Инфективното одделение во Куманово, откако 11 доктори заболеа од коронавирусот, посочи на денешната прес-конференција министерот за здравство, Венко Филипче.

Како што рече тој, заболувањето на 11 доктори од Инфективното одделение Куманово ја компромитира работата на тамошната болница.

Филипче кажа дека се прават епидемиолошки анкети, за да се утврдат контактите со други лица и да се спречи локалната трансмисија на вирусот.

„Во кумановската болница имаме 11 позитивни случаи со коронавирус. Оваа бројка ја компромитира работата на Инфективното одделение бидејќи и претходно имаше еден од останатите здравствени работници. Двајца доктори се упатени таму. Тие се од болниците од Скопје и Штип кои ќе ја организираат работата на Инфективното одделение во Куманово. Сè уште траат епидемиолошките анкети бидејќи има повеќе позитивни здравствени работници од рендген-дијагностика и во делот на општите лекари од дежурната служба. Врз основа на тие анкети, а и тоа колку лица ќе бидат во изолација, ќе се организира и останатиот дел од болницата“, рече Филипче.

Според него, мерката за продолжување на полицискиот час во Куманово ќе даде резултати за вирусот да не се шири.

„Тој ќе трае од денеска во 21 часот до понеделник во 5 часот. Од понеделник ќе трае од 16 часот до 5 часот следниот час. Ова е дискутирано на вториот состанок, а треба да оневозможи ширење на вирусот. Можам да кажам дека иницијалниот откриен прв случај на здравствен работник беше за нецели 48 часа по контактот со починатата пациентка. Тоа носи заклучок дека вирусот циркулирал претходно. Уште тогаш, дополнително на тие мерки кои важеа во државата, се сопре градскиот и меѓуградскиот сообраќај во Куамново. Голем е ризикот за внатрешен пренос помеѓу луѓето кои живеат во самата општина. Тоа доведе до оваа мерка, за целосна рестрикција за да се прекине локалната трансмисија“, посочи Филипче.

Тој тврди дека е многу тешко да се каже дали сите инфицирани здравствени работници се разболеле од првата пациентка.

Владата донесе одлука за забрана и посебен полициски час во Општина Куманово, односно целосна забрана за движење за време на викенд, почнувајќи од 21 часот во вечерва (петок) до 5 часот во понеделник.

Во работните денови, од понеделник до петок, забраната важи секој ден во периодот од 16 до 5 часот.

За земјоделските активности, дозволено е движење во рамки на атарот на кумановските села, исклучиво за работни потреби.

Оваа одлука на Владата следува откако денеска беше соопштено дека заболени со коронавирус се 11 доктори од тамошната болница, а исто така од новозаразените 46 лица за кои беше информирано денеска, половината, односно 23 се од Куманово.

Од денеска четири цистерни активно работат на миење и дезинфекција на улиците и фреквентните локации во Карпош.

Се мие и дезинфицира пред маркети, аптеки, банки и други места, каде што е забележано поголемо присуство на граѓани.
Покрај двете цистерни на Општина Карпош, на терен мијат и дезинфицираат и цистерните на фирмите „Анизор“ и „Гранит“. Станува збор за една четиритонска и една седумтонска цистерна, кои се резултат на општествена одговорност на овие компании.

Денеска, се миеја и дезинфицираа улици и фреквентни локации во Карпош 3, Карпош 4, Бардовци, Злокуќани, Бардовци и Тафталиџе (кај пазарчето).

Локалната самоуправа продолжува со секојдневните активности за унапредување на јавната хигиена и заштита на граѓаните од коронавирусот.

Ги повикуваме сите граѓани да ги почитуваат препораките од ресорните институции, да избегнуваат собирање во големи групи и движење во затворени простории.