Македонија
Оштетените од „Фиком“ бараат СЈО да го преземе и нивниот случај
Оштетените од аферата „Фиком“, од пред петнаесетина години, на кои им беа продавани исти станови по неколкупати, во сабота, протестираа пред зградата „Антигона“ во скопска Кисела Вода, барајќи да бидат обештетени, односно да им бидат доделени станови или да си ги добијат назад парите кои ги дале за становите, но и за судските трошоци.
„Судот најбезобразно се става на страна да заштити само една од инволвираните страни, при што во целост ги оштетува граѓаните кои ги купиле становите. Сакаме да прашаме зошто стечајот на „Фиком“ трае нецели десет години, што е направено за тие десет години, зошто судските постапки траат толку долго и зошто судот како по наредба носи одлуки кои се спротивни на сите закони“, рече некогашната адвокатка на оштетените, Лорија Ванеска.
Побара да се формира независно судско тело, составено од најеминентните стручњаци во оваа област, кое ќе ги преиспита сите одлуки донесени во случајот.
„Со ова го повикуваме и специјалното јавно обвинителство доколку елементи од аферата „Фiком“ се најдат во прислушуваните разговори кои им се предадени им стоиме на располагање да им ја предадеме целокупната документација, со цел да се води постапка за сторителите на овие дела“, рече Ванеска.
Најави дека ќе се формира Здружение на оштетени од сите градежни афери кои ги имаше на државно ниво со цел да се обештетат луѓето и да се каже стоп за градежната мафија. „Помина доста време, а луѓето останаа без пари. Не сме задоволни од досегашните случувања. Влеговме во судска постапка која незамисливо долго трае. Нашата зграда е ставена под хипотека, а се судиме со банката ‘Еуростандард’ за таа хипотека, за која ние тврдиме дека не е валидна и дека тука е направена некоја ујдурма“, вели Миле Ѓорѓески, кој уплатил стан во зградата „Антигона 1“.
Велат дека имаат доверба во институциите, во МВР, во судството, но исто така побараа и државата да интервенира во нивниот случај, со предлог, како што дава субвенции за проектот „Купи куќа, купи стан“ и ним да им ги врати субвенционирано нивните пари кои ги вложиле за стан кој никогаш не го добиле, поточно и нив да ги вклучи во проектот.
„Ние овие станови не сме ги добиле на подарок, туку сме платиле за нив“, вели Ѓорѓески.
Оштетена од зградата „Филип“ пак, обвинува за нова мафија, носејќи транспарент на кој пишуваше „Нова мафија“, и вели дека нивната зграда со судско вештачење е потврдено дека е градена со нивни пари.
„Некоја нова мафија, преостанатите 30 отсто, ги доградува. Која е таа мафија, под кои услови, со кого се здружува за да ја доградува зградата и оди уште понатаму ги препродава нашите станови“, рече Даниела Јовановска, оштетена од зградата „Филип“, за што никој не ги известил, а институциите иако известени за случајот, никој не ги удостоил со одговор.
Оштетените од зградата „Самарија“ велат дека не можат да сфатат како може толкави објекти да се направат, а општината од старт да не укаже дека се дивоградби.
Претседателот на оштетените рече дека не разбира како владата се заложува за повеќедетни семејства за кои тврди, дека основно е поседување живеалиште, а нив ги оставила без она за што платиле.
„Отворена е стечајна постапка, а тие знаеме како завршуваат. Се на штета на оштетените. Еден повик до владата. Ако не може да ги реши овие станбени афери, нека не вметнат во проективе „Купи куќа, купи стан“ и нашите пари да ги пренасочи таму, и нека не субвенционира“, рече тој.
Насобраните, потенцираа дека досега дале преку половина милион евра сите заедно за судски трошоци, кои, исто така, сметаат дека не требало да паднат на нив, па бараат поврат и на тие пари.
Најавија дека повторно на протест ќе се соберат за две недели од сега, и ќе протестираат сé додека не се реши нивниот проблем.
Случајот „Самарија“ е еден од многубројните измами кои се случија во изминативе години, а кои се однесува на препродажба на станови. Тој беше обелоденет во 2003 година кога сопственичката на приватна градежна фирма, Лујза Миновска, заработи 30-дневен притвор под сомнеж дека 12 граѓани измамила за 351.000 евра. Обвинувањата упатени на адреса на Миновска беа дека таа зела пари за становите, кои требало да бидат изградени на улицата „Киро Крстевски“ во скопската општина Кисела Вода, но немала добиено одобрение за градба.
Сопственичката на фирмата, која сега е во рацете на судот, стечајниот совет и управник, склучила договор со сопствениците на земјиште на споменатата улица, а потоа започнала со изградба, и покрај тоа што не платила комуналии и немала одобрение за градба. Миновска, и покрај направените пропусти, продолжила со изградбата, а становите ги понудила на продажба. Неколку месеци подоцна Градежниот инспекторат ја запрел изградбата која стигнала до првата плоча, но тоа не ја спречило да продаде 10 стана и да инкасира 283.000 евра. Лујза Миновска беше осудена за измамите, во 2007 година, на затворска казна во траење од четири години.
Градежната афера „Фиком“ медиумите ја открија во 2006 година кога група граѓани тврдеа дека нивниот стан бил продаден уште на неколку лица. Претходно сопствениците на ФИКОМ, сопружниците Николиќ успеале да измамат многу луѓе ветувајќи им евтини, модерни станови речиси во центарот на Скопје. Во седум згради во централното градско подрачје тие продавале станови по цена од 450 до 500 евра за метар квадратен, без склучен договор. За измамата да биде уште поголема, еден стан го продавале на повеќе лица. Стотици семејства беа оштетени, становите ги платија, но не добија дом. Зградите сé уште стојат недоизградени.
Случајот „Фиком“ е една од најголемите измами со продажба на станови во Македонија.
Сопственикот на „Фиком“, со јаже врзано на плафонот за цевката од радијаторот, Никола Николиќ беше пронајден обесен во затворот во Штип на почетокот од март 2015 година. Управата за санкции соопшти дека 42-годишниот Николиќ за измами бил осуден на вкупна затворска казна во траење од 25 години и два месеца./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
За девет месеци од наплата на патарините државата заработила над 58 милиони евра
Вкупните приходи од наплата на патарина за првите девет месеци од годинава изнесуваат 3.611.645.604, денари (58,725 милиони евра).
Во септември годинава прометот на наплатните станици изнесува 401.971.971 денар, а во летните месеци кога е највисока фрекфенцијата на возила, биле инкасирани 494.308.025 во август, 469.811.647 во јули и 399.325.680 денари во јуни годинава.
Најпрофитабилна е наплатната станица Романовце, а најниски се приходите на Кадрифаково.
Македонија
Најмногу дожд во изминатото деноноќие падна во Пожаране и Попова Шапка
Најмногу дожд во изминатото деноноќие наврал во Пожаране и Попова Шапка, а најмалку во Штип и Кавадарци.
Управата за хидрометеоролошки работи информира дека во Пожаране и Попова Шапка наврнале 32 литри на метар квадратен, во Маврови Анови и Крушево 23, во Тетово 21, во Претор 20, во Лазарополе 14, во Гевгелија 11, во Битола, Тополчани и Скопје-Зајчев Рид 6, во Ѓуриште, Пожар-Радовиш 5, во Прилеп, Велес, Скопје-Петровец 4 и во Штип и Кавадарци еден литар на метар квадратен.
До вторник синоптичарите најавуваат променливо облачно време со локални врнежи од дожд. Денеска наместа врнежите ќе бидат поројни и пообилни (над 30 l/m² за 24 часа), проследени со засилен ветер и појава на ретки грмежи.
Ќе дува умерен, повремено засилен ветер од јужен, а долж Повардарието од југоисточен правец. Максималната температура ќе биде во интервал од 12 до 17 степени.
Македонија
Таен ринг за борби со кучиња разоткриен во битолско, заработувале од мачење животни
Грчки државјанин сопственик на куче, пит бул, косовски државјанин сопственик на куче од расата американски стафорд, како и двајца македонски државјани како соизвршители ќе одговараат на кривично дело – Убивање и мачење животни од член 233 став 3 во врска со став 1 од Кривичниот законик.
Основното јавно обвинителство Битола ги прибра сите потребни докази и поднесе обвинение, бидејќи на 1 ноември во селото Црнеец во близина на Стрежево, тие заради користољубие грубо ги злоупотребувале и ги изложиле на непотребни маки кучињата.
Првообвинетиот организирал борба меѓу двете кучиња во дворот од семејната куќа на второобвинетиот, кој претходно имал подготвено ринг каде се одвивала борбата. Настанот го следеле и други лица од Косово, Грција и Македонија, кои полициските службеници ги затекнале на лице место и кај кои биле пронајдени парични средства во различни апоени на евра и денари наменети за обложување.
Како резултат на борбата, со особено тешки повреди се здобило кучето од расата пит бул, кое имало угризни рани со различна големина, тешки повреди на главата и видливи знаци на трауматски шок.
Доказите обезбедени до овој момент упатуваат на сомненија дека се работи за организирана операција за која бил подготвен ринг за борби за кучиња во кој се пронајдени траги кои укажуваат дека вакви борби се случувале и друг пат, како и лекови за пружање прва помош на повредени кучиња.
Јавниот обвинител до Основниот суд во Битола достави предлог за продолжување на претходно определената мерка куќен притвор за двајцата македонски државјани.
Доколку двајцата странски државјани кои се во бегство од моментот на сторување на делото, не бидат обезбедени до почетокот на судската постапка, јавниот обвинител ќе предложи нив да им се суди во отсуство.

