Владата предводена од коалицијата „Вреди“ продолжува да ја демонстрира својата посветеност за подобрување на животниот стандард и економското зајакнување на граѓаните. Една од значајните мерки во оваа насока е зголемувањето на минималната плата на 400 евра (24.400 денари), што ќе почне да се спроведува од април и ќе се одрази на платите што работниците ќе ги добиваат во мај, најавуваат од оваа коалиција.

Како што најави министерот за економија и труд, Бесар Дурмиши, ова зголемување е резултат на имплементацијата на законската формула за утврдување на минималната плата, која се заснова на 50 отсто од индексот на расходи за претходната година и 50 отсто од просечната плата. Овој механизам гарантира правично и одржливо зголемување на платите, обезбедувајќи граѓаните директно да имаат корист од економскиот развој на земјата, додаваат од таму.

Според коалицијата, зголемувањето на минималната плата е важен чекор кон подобрување на условите за живот и зајакнување на куповната моќ на граѓаните. Сепак, како што велат, остануваат посветени на продолжување на реформите и другите мерки за поддршка кои позитивно ќе влијаат на благосостојбата на граѓаните и на економската стабилност на земјата.

„Во оваа насока, „Вреди“ ќе ја продолжи блиската соработка со синдикатите, бизнисите и сите релевантни чинители за да гарантира повисоки плати, подобри работни услови и фер економски развој.

Нашата заложба е јасна: да создадеме посилна, поправедна и поодржлива економија, каде секој граѓанин има можност за достоинствен живот“, нагласуваат во соопштението.

Се соочуваме со реален проблем, платите во Македонија се уште се ниски, а трошоците за живот постојано растат. Работниците се борат да врзат крај со крај, а многу од нив размислуваат да ја напуштат државата во потрага по подобри услови. Од друга страна, и работодавачите сакаат да ги зголемат платите, но честопати не можат поради високите придонеси кои мора да ги плаќаат, истакна на прес-конференција Сања Лукаревска, пратеничка на СДСМ.

Затоа, како што најави, пратеничката група на СДСМ предлага законско решение кое ќе им помогне и на работниците и на компаниите, а ќе обезбеди и дополнителни приходи во буџетот. Денес ќе го образложам законот и клучните аспекти за тоа како би функционирал тој.

Со овој закон, кој СДСМ ќе го достави во Собранието, според неа, работодавачите во приватниот сектор ќе можат да ги зголемат платите на своите вработени за износ од 3.000 до 15.000 денари, без да мора да плаќаат придонеси за тој зголемен дел.

„Придонесите за пензиско, здравствено и социјално осигурување се замрзнуваат на просекот од последните три исплатени плати на работникот.
Ова замрзнување важи во период од една година, што значи дека работодавачите нема да имаат дополнителен финансиски товар при зголемување на платите.

Кои компании за кои работници може да добијат ослободување?
За работници за кои компаниите исплаќаат нето плата која не повисока 65.380 денари
Вакви работници има околу 400.000 кои би можеле да добијат повисоки примања без зголемени трошоци за компаниите.
Ако ги преточиме овие бројки во примери:
Ако просечното зголемување на платата биде 7.500 денари за 400.000 вработени, тогаш вкупното покачување на платите на национално ниво би било 585 милиони евра.

Односно подетално, 400.000 работници × 7.500 денари во просек × 12 месеци = 36 милијарди денари или 585 милиони евра) дополнителен приход за граѓаните годишно.

Иако работодавачите нема да плаќаат придонеси за ова зголемување, тие сè уште ќе плаќаат данок на личен доход (10%), што значи дека во државниот буџет ќе се слеат 58,5 милиони евра дополнителни приходи од данок на личен доход“, појасни Лукаревска.

Со ова како што нагласи работниците добиваат поголеми плати, што значи повисок животен стандард.
Компаниите не се оптоваруваат со дополнителни трошоци, што ги охрабрува да инвестираат во своите вработени.
Државата добива повисоки приходи, без да воведе нови даноци или да зголеми буџетски трошоци.
Оваа мерка е паметна, правична и издржана. Го поттикнува растот на платите, ја зајакнува економијата и создава стабилност и сигурност за работниците и компаниите.

Ги повика парламентарното мнозинство и Владата да го поддржат овој закон.

Нема никаква оправдување, кажа таа, зошто ова законско решение не би било изгласано. Ова не е политичко прашање – ова е прашање на животниот стандард на граѓаните.

„Ако власта го одбие овој закон, тоа значи дека свесно се спротивставува на зголемувањето на платите и на подобрувањето на економската состојба.

Очекуваме одговорност, очекуваме поддршка и очекуваме сите пратеници во Собранието да застанат зад интересите на граѓаните.

Платите мора да растат, време е за вистински мерки, а не за празни ветувања“, истакна пратеничката на СДСМ.

Универзитетот „Св. Кирил и Методиј“ (УКИМ) месецов почнува со дигитална трансформација. Ректорката Билјана Ангелова најави дека првин ќе се дигитализираат студентските сервиси, а ќе се работи и на електронски индекс за што таа смета ќе треба подолго време.

„УКИМ почнува со дигитална трансформација многу бргу, веројатно од овој месец почнуваме со првите чекори. Најнапред ќе ги дигитализираме сите студентски сервиси. Планот е до почетокот на новата учебна година основните студентски сервиси комплетно да бидат дигитализирани и се разбира да завршиме со електронскиот индекс. Ова е процес, ќе трае, мојата процена е дека можеби во текот на една или една и пол година овој процес може да се заокружи. УКИМ влегува во овој процес и тоа е наш приоритет“, рече рекотрката Ангелова денес пред почетокот на научната конференција „Новите предизвици во високото образование и синдикалното движење“ во организација на Сојузот на синдикатите на Универзитетот „Св. Кирил и Методиј“.

Вториот приоритет на кој работи УКИМ, како што кажа Ангелова, е квалитетот на наставата, квалитетот на истражувањата и општо квалитетот на Универзитетот.

Дигитализацијата и подобрувањето на квалитетот се двата клучни процеса на кои ќе работат во следниот период, а од кои ректорката Ангелова очекува подобрување на рангот на Универзитетот.