Ниту Христијан Мицкоски ниту ВМРО-ДПМНЕ не можат да побегнат од одговорноста за еколошката катастрофа којашто му се случува на Скопје и труењето на граѓаните поради горењето на депонитте „Дрисла“ и „Вардариште“, велат од СДСМ.

„Токму Даме Димитровски, актуелниот советник на Мицкоски за животна средина во Владата и поранешен претседател на Комисија за животна средина на ВМРО-ДПМНЕ, е претседател на Управен одбор на „Дрисла“, https://drisla.mk/organizacziona-struktura/

Претходно ВМРО-ДПМНЕ имаше и директор на „Дрисла“, Јане Мицевски, магистер за туризам и менаџмент.
Со депонијата „Вардариште“ пак со децении управуваат градоначалници на ВМРО – ДПМНЕ, како Коце Трајановски, Бобан Стефковски.

ВМРО-ДПМНЕ и нивните градоначалници пред 4 години ветуваа „затворање на „Вардариште“, намалување на стакленички гасови, покривање и озеленување“. Тимчо Муцунски ветуваше „дислокација на претоварната депонија Вардариште“. Мицкоски и Арсовска ветуваа „зелена зона Вардариште“ со спортско-рекреативни терени. ВМРО-ДПМНЕ ветуваше „фабрика за селекција на отпад“ во „Дрисла““.

Денеска, додаваат од СДСМ, ништо од ова не е исполнето.

Според оваа партија, вперувањето на прстот кон други е признание на Мицкоски дека ВМРО-ДПМНЕ не само што не ги исполни ветувањата кон граѓаните туку не мрдна со прст и ги остави скопјани да се трујат.

Претседателот на ВМРО-ДПМНЕ, Христијан Мицкоски во изјавата за промоција на изборната коалиција за претстојните локални избори, на новинарско прашање во однос на депониите Вардариште и Дрисла посочи дека се работи за подметнати пожари за кои веќе има приведени и осомничени лица, истакнувајќи дека е обезбедена градежна механизација која од денес таму ќе биде во функција.

„Апсолутно како Влада и како институции ги преземаме сите мерки да немате дилема, за Вардариште, знаете дека имаме веќе приведени и осомничени лица коишто ја користеле илегалната депонија Вардариште којашто постои повеќе од би рекол неколку децении, којашто е со габарит поголем од 20 хектари, за да произведуваат метали коишто потоа нелегално ги продаваат, тие лица се откриени, тие лица се приведени, од вчера има приватна Агенција за обезбедување здружено ангажирана од неколку општини. Истовремено како Влада и како институции, преку општествено одговорни компании обезбедивме градежна механизација, којашто веќе денеска ќе биде во полн состав таму. Вардариште би рекол е обезбедено, останува Дрисла“, вели Мицкоски.

Мицкоски кажа дека проблемот со Дрисла ќе биде саниран за недела дена, а воедно и дека Министерството за внатрешни работи ќе ги разгледува причините за повторното распламтување на пожарот после санација на истиот.

„Дрисла во текот на вчерашниот ден би рекол е речиси санирана, но од некои чудни причини при крајот на ноќта повторно се распламти и за тоа денеска ќе се позанимава Министерството за внатрешни работи. Имав разговор и со министерот, на линија сме со директорот на Дирекцијата за заштита и спасување, со овие општествено одговорни компании очекувам денес, утре, тој проблем да биде саниран. Тоа што со децении не е санирано, тоа што со децении никој не водел сметка, еве за неколку дена би рекол, за недела дена ќе успееме да го санираме, јас сочувствувам апсолутно со секој оној граѓанин којшто го чувствува сето ова“, укажа Мицкоски.

Тој наведе дека е чудно како може пожар кој што е смирен и ставен под целосна контрола повторно да се активира, потенцирајќи дека сите виновници ќе бидат изведени пред лицето на правдата.

„Но чудно е како во одредени јавни претпријатија каде што свои кадри има ДУИ се случуваат вакви работи, чудно е и тоа ќе го истражиме и ќе обезбедиме соодветни докази како може пожар кој што беше речиси смирен, односно ставен под контрола, наеднаш да се распламти и како токму сега, откако успешно се справивме со пожарите. Во околните држави имаше жртви, повредени, иселени градови и така натаму, а кај нас сето тоа беше цело лето успешно завршено и покрај диверзиите кои што ги имавме на почетокот на летото, наеднаш сега да се случува ова пред локалните избори. Вистинското прашање и вистинскиот одговор на тоа прашање, кому сето ова му одговара. Но, ние нема да се занимаваме сега. Сега работиме да го решиме проблемот, потоа ќе се занимаваме. И да знаете дека сите виновници ќе бидат изведени пред лицето на правдата “, рече Мицкоски.

„Денес ја формализираме коалицијата Твоја Македонија која заеднички ќе настапи на овие локални избори. Коалицијата предводена од ВМРО-ДПМНЕ е убедливо најголемата коалиција која е составена од 25 партии кои се од различен карактер и во голема мера го претставуваат колоритот во македонското општество, различни структури и припадности што само потрдува дека се обединуваме околу заедничка платформа што подразбира обезбедување на иднина и напредок“, кажа Христијан Мицкоски, претседател на ВМРО-ДПМНЕ и премиер.

„Овие локални избори се важни за нас и иднината на државата поради најмалку две причини. Првата е што локалните самоуправи директно се надлежни да ги решаваат проблемите на граѓаните и не е сеедно каков градоначалник ќе се избере. А ние во изминатиов период покажавме и докажавме дека умееме да ги водиме општините без ниту еден скандал и со многу работа, дополнително што во наредните 4 години сите општини ќе ја имаат и поддршката од централната власт, нешто што и го докажавме и покажавме во претходната година иполовина.

Втората причина е што овие избори се околу тоа секој човек во државата да го направи вистинскиот избор за твоето место, твојата општина да се избере твојот човек кој ќе се бори за секој еден човек во општеството. Тој човек мора да ги брани интересите на граѓаните и да решава проблеми. Затоа ќе излеземе со понуда и со луѓе кои ќе бидат гласот на народот во администрацијата и општините ќе работат за граѓаните.

Уверени сме дека силата на државата не се мери само преку нејзините институции на централно ниво, туку преку секојдневниот живот во градовите и селата, во општините каде што граѓаните ги остваруваат своите права и ги живеат своите соништа.

Решени сме да изградиме општини кои ќе бидат пример за демократско управување, економска ефикасност, културна афирмација и меѓусебна почит.

Затоа и денес убедени сме дека визијата за „Твоја Македонија“ е визија за силни граѓани, силни општини и силна држава. Лидерите на политичките партии од Коалицијата „Твоја Македонија“, усвоивме и ДЕКЛАРАЦИЈА ЗА МАКЕДОНИЈА НА ГРАЃАНИТЕ И ЗА ОПШТИНИ ШТО СОЗДАВААТ ИДНИНА.

Верувајќи дека инфраструктурата е основа за развојот на секоја заедница, ние се обврзуваме да вложиме во изградба и реконструкција на патишта, мостови, водоводи, канализациони системи, училишта, спортски сали и културни домови.

Ќе поттикнуваме политики кои ќе создадат нови работни места и ќе го зајакнат чувството на економска сигурност во секоја општина.

Ќе се залагаме за подобрување на примарната здравствена заштита преку модернизација на амбуланти, подобра опрема на здравствените домови и олеснет пристап до лекарски услуги, посебно фокус ќе имаат руралните средини.

Образованието ќе биде клучен инструмент за изградба на генерации кои ќе ја носат Македонија напред со знаење, вредности и одговорност.

Младите се најголемиот капитал на нашата земја, ќе креираме политики што ќе им овозможат квалитетно образование, можности за спорт и култура и пристојни услови за вработување. Ќе создадеме амбиент за нивен останок во своите општини, за да ја градат својата иднина овде, дома, во својата татковина Македонија.

Верувајќи дека животната средина е наследство за идните генерации, ќе се бориме за чист воздух, управување со отпадот, користење на обновливи извори на енергија и заштита на природата. Ќе ги втемелиме зелените политики во секоја општина, за здравје и поквалитетен живот на граѓаните.

Со верба во својата држава и во својот народ, со љубов кон местото каде што живееме и со доверба во заедничката иднина, ние ја потврдуваме нашата решеност да изградиме Македонија како просперитетна, праведна и модерна држава. Држава во која секој граѓанин ќе се чувствува почитуван и сигурен, во која општините ќе бидат двигатели на развојот, а целата заедница ќе живее во склад, достоинство и надеж. Нашата мисија е генерациите што доаѓаат да ја наследат Македонија посилна, побогата и постабилна од тоа што ние го затекнавме: Македонија која е дом и иднина за сите нејзини граѓани.

Заедно ќе го направиме вистинскиот избор за доброто на сите граѓани. Ова се избори за тоа каква иднина ќе имаме“, изјави Христијан Мицкоски, претседател на ВМРО-ДПМНЕ и премиер.