До 19 часот во понеделник, Државната изборна комисија треба да ги соопшти официјалните резултати од предвремените парламентарни избори, 24 часа од завршувањето на повтореното гласање.

Во меѓувреме, партиите имаат право на приговори до ДИК во рок од 48 часа од објавувањето на првичните резултати, а ДИК е должна да одлучи по нив во рок од 48 часа по приемот.

Против одлуката на ДИК може да се поднесе тужба и до Управниот суд, во рок од 24 часа од приемот на решението. Управиот суд, пак, по жалбата е должен да донесе одлука во рок од 48 часа од приемот.

Претседателот на ДИК Александар Чичаковски, во неделата изјави дека новите пратеници своите уверенија за добиените мандати треба да ги добијат најдоцна 28 декември во среда и тоа за сите пет изборни единици, како и за осигураните мандати во шестата изборна единица, доколку нема приговори.

На прес-конференцијата тој ги соопшти резултатите од вчерашното прегласување во Теарце и симулацијата за вкупниот број освоени мандати.

Заедно со уверенијата ќе биде доставен и комплетниот извештај за спроведените избори. По верификација на мандатите се очекува да се одржи Конститутивна седница на новиот парламентарен состав, по што претседателот на државата ќе му го довери мандатот за формирање новата влада, која ќе биде коалициска, бидејќи ниту една партија сама нема освоено 61 пратеник.

Откако мандаторот ќе го предложи составот на новата влада и ќе покаже дека има мнозинство, на 16 февруари во Собранието треба да се гласа новата влада, за која треба да гласаат мнозинство од вкупниот број присутни пратеници

Вчерашното гласање во избирачкото место во Теарце не донесе промена на бројот на мандати. Вчера СДСМ освои повеќе гласови, 245, наспроти 149 на ВМРО-ДПМНЕ, но бројто на мандатите останаа непроменети: 51 за ВМРО ДПМНЕ, 49 за СДСМ, 10 за ДУИ, 5 за Беса и 2 за ДПА./крај/со/бб