Македонија
Пазарењата за нова Влада почнаа, ДУИ не е против коалиција со СДСМ

По вчерашното прегласување во едно гласачко место во Теарце, бројот на мандати не се смени, па сега политичките партии размислуваат на кој начин да формираат Влада, а таа секако ќе биде формирана од една македонска и една или неколку албански партии.
Имено, ВМРО-ДПМНЕ има 51 мандат, а ДУИ, досегашниот партнер во власта од албанскиот блок, 10, што е доволно да се имаат мнозинство пратеници, кои би ја изгласале новата Влада. Сепак, се шпекулира дека од избраните десет пратеници од ДУИ, четворица не сакале да коалицираат со ВМРО-ДПМНЕ и доколку седнат во Собранието со предлог Влада составена од овие две партии, истата нема да ја гласаат.
Од друга страна пак, останатите три албански партии Движењето Беса со 5, Алијанската на Албанците со три и ДПА со два мандата, сите заедно без ДУИ со ВМРО-ДПМНЕ повторно би имале мнозинство во парламентот, но Беса од почеток вели дека нема да седне на иста маса со оние кои се инкриминирани од нелегално прислушуваните разговори.
Поради истата причина, и во неделата не се појавија на средба со лидерите на другите албански партии, што ја организираше лидерот на ДУИ Али Ахмети, што се одржа во хотелот „Александар Палас“.
Беса официјално соопшти дека средбата во „Александар палас“ е свикана од луѓе кои се споменуваат во предметите на Специјалното јавно обвинителство, како на пример во случајот „Маѓар Телеком”. „Членовите на ДУИ и ДПА и во ДИК уште еднаш му служеа верно на ВМРО-ДПМНЕ, одземајќи еден пратеник од коалицијата Преродба со Беса на сметка на Груевски. Волјата на нашите гласачи е да не учествуваме на состанокот свикан од претседателот на ДУИ. Не можеме позитивно да одговориме на оние кои, откако ја злоупотребија власта и волјата на Албанците за 15 години, газејќи и понижувајќи ги Албанците како никогаш порано, како и зајакнувајќи го екстремно антиалбанската фигура Никола Груевски, ги принудија Албанците да гласаат и за една македонска партија“, соопшти Беса.
Сепак, од таму додадоа дека ќе ги поддржат сите иницијативи кои ќе доаѓаат од сите субјекти кои го бранат и унапредуваат институционалниот интерес на Албанците и евро-атлантскиот стратешки интерес на државата.
Зијадин Села во име на коалицијата Алијанса за Албанците, по вчерашната средба со претседателот на ДУИ Али Ахмети изјави дека оваа средба била важна од аспект на иднината на албанскиот јазик.
Села е подготвен на коалиција и со СДСМ и со ВМРО-ДПМНЕ, заедно со ДУИ, кој би донесол 10 пратеници и трите пратенички места што ги освои Алијансата за Албанците. Тоа значи дека партиите од Алијансата, Движење за реформа на ДПА на Зијадин Села, Унитети на Гзим Острени и НДМ на Весел Мемеди се подготвени за формирање влада и со Никола Груевски и со Зоран Заев.
За средбата со Али Ахмети Села вели дека тоа бил важен состанок од аспект на иднината на албанскиот јазик.
„Тие што не беа присутни, се против. Ние сме за еднакви права“, изјави Села, алудирајќи на Беса, чија коалиција освои пет пратенички места.
По средбата, Села на Фејсбук напиша дека Влада во формат 50+10+3 e можна, но нестабилна, а најдобра би била комбинацијата 50+10+5+3 и дека само така албанскиот ќе стане рамноправен со македонскиот јазик. Тоа значи во коалицијата да влезе и Беса, партија која одбива да биде во каква било комбинација со политичари кои се споменуваат во прислушуваните разговори.
Од друга страна пак, се шпекулира за отпорот внатре во ДУИ за уште еден мандат во коалиција со ВМРО-ДПМНЕ, каде се вели дека четворица од новите пратеници на ДУИ веќе наговестиле дека во Собранието нема да гласаат за формирање влада со ВМРО-ДПМНЕ.
Потпретседателката на ДУИ, Теута Арифи, вели дека нејзината партија не исклучува варијанта во која новата влада би се формирала со СДСМ, но дека одлуката за тоа како ДУИ ќе постапи допрва треба да биде донесена.
„Ние мислиме дека Мајскиот договор е коректен договор зад кој сме стоеле, ние сме го инсталирале, но во исто време непобитен факт е дека по овие избори ДУИ фактички не е единствениот претставник и не е претставник на волјата на албанското мнозинство. Затоа би било неправедно ако би направила некаква комбинација во име на волјата на албанското мнозинство со оглед на тоа дека има 10 мандати, но не претставува силна волја или мнозинство од над 51 отсто на албанските гласачи“, рече Теута Арифи.
По средбата со Ахмети, Села, Мемеди и Острени се согласија дека само со заедничка платформа со учество на сите политички претставници на Албанците во Македонија може да се изборат за правата на Албанците. Тие ги повикаа и лидерите на Беса и ДПА да им се приклучат и порачаа дека ќе коалицираат со онаа партија од македонскиот политички блок која ќе им понуди иднина.
Нивните барања се албанскиот јазик да стане втор службен јазик во Македонија, продолжување на мандатот на СЈО, имплементација на препораките од извештајот на Прибе, рамномерна распределба на буџетот и консензуално одлучување за сите битни прашања./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Утре дел од Скопје без вода

Поради дефект на цевка со пречник од 100 милиметри на улицата „1 Долно Лисиче“ бб. утре од 10:00 часот прекинато водоснабдување ќе имаат корисниците од населено место Долно Лисиче.
Како што информираат од ЈП „Водовод и канализација“ – Скопје, корисниците ќе бидат без водоснабдување се до завршување на интервенцијата.
Поради изведување, пак, на водоводен приклучок од 80 милиметри на улицата „Владимир Назор“ бр.8 во населбата Водно утре од 11:00 часот прекинато водоснабдување ќе имаат корисниците од таа улица и од дел од улицата „Кумровец“. Корисниците ќе бидат без вода се до завршување на интервенцијата.
Македонија
Спасовски: Со партнерството со Словенија успеавме да бидеме пример како може соработката да се одржува, негува и продлабочува

Министерот за внатрешни работи Оливер Спасовски за време на работниот престој во Љубљана, Република Словенија, се обрати на настан под покровителство на амбасадата на Република Северна Македонија, по повод одбележување 30. години од отворањето на првата амбасада во светот по независноста и осамостојувањето на државата, а на покана од домаќинот на настанот, амбасадорот Горан Милевски, во присуство на заменик Претседателката на Владата на Република Северна Македонија, Славица Грковска, министерот за внатрешни работи на Република Словенија, Боштјан Поклукар, претставници на Дипломатскиот кор, стопанственици и претставници на верските заедници, како и сонародници-иселеници од нашата држава.
„Можам да потврдам дека изминативе години со нашето партнерство и соработка со Република Словенија ние успеавме да бидеме пример и да покажеме, не само на просторот на поранешната држава туку и пошироко – како може, кога постои добра волја и низа заеднички интереси, соработката меѓу две земји да се интензивира, одржува, негува и продлабочува примарно имајќи ги во предвид потребите на нашите граѓани, одржувајќи ги на високо ниво претходно воспоставените одлични релации. Дотолку повеќе што во сиве овие години наназад како држави и како институции споделувавме заеднички вредности”, истакна министерот Спасовски, изразувајќи посебна благодарност до Владата на Република Словенија и до словенечкиот народ бидејќи токму Република Словенија беше и остана доследен и лојален партнер на евроатлантски пат на Република Северна Македонија.
„Од аспект на работењето на министерствата за внатрешни работи на Република Северна Македонија и на Република Словенија, изминативе три децении се период на динамична и плодотворна тесна соработка крунисана со мноштво значајни билатерални договори и конкретни активности во кои што словенечката полиција е тесно инкорпорирана во речиси сите суштински реформски исчекори на македонското МВР во насока на имплементирање на сите важни европски полициски стандарди и критериуми”, рече министерот Спасовски, со уверување дека и во годините пред нас може веќе воспоставената билатерална и мултилатерална соработка преку разните иницијативи, форуми, меѓународни асоцијации, уште повеќе да се продлабочи, да се динамизира во интерес на националната, но и регионална безбедност.
Македонија
Грковска по повод 30 годишнината од дипломатските односи меѓу Македонија и Словенија: Солидарноста секогаш била и ќе остане белег на нашето цврсто пријателство

Заменичката на претседателот на Владата задолжена за политики за добро владеење, Славица Грковска, имаше обраќање на вечерашниот прием, организиран од амбасадата на Република Северна Македонија во Словенија, по повод 30 годишнината од воспоставувањето дипломатски односи меѓу двете земји и отворањето на првото дипломатско претставништво по прогласувањето на независноста на нашата држава.
„Велат пријатели требаат и во добро и во лошо. Овие три децении го потврдија нашето пријателство и покажаа дека навистина и во добро и во лошо бевме заедно и си пруживме поддршка во сите моменти кога тоа беше неопходно. Солидарноста секогаш била и секогаш ќе остане белег на нашите односи, на нашето цврсто пријателство“, истакна вицепремиерката Грковска и додаде дека токму амбасадата во Љубљана е симбол на независноста и симбол на тешкиот дипломатски пат кој го изоде нашата држава за денеска да биде полноправна членка на НАТО и да чекори по евроинтеграцискиот пат за да се придружи на големото европско семејство.
Таа се заблагодари за отвореноста на Словенија да им овозможи студирање на словенечките универзитети на голем број македонски студенти и изрази надеж дека младите кои се стекнуваат со искуство во европските земји, потоа ќе одлучат својата иднина да ја градат дома, во својата татковина, со своите семејства.
„Словенија беше и верувам секогаш ќе остане наш поддржувач и во рамките на евроинтеграцискиот процес на Северна Македонија, поддршка којашто е исклучително важна, особено во делот на спроведување на реформските процеси, со цел да ги достигнеме европските стандардни вредности. Вашето искуство за нас е непроценливо имајќи предвид дека делиме заедничко минато, а целиме и кон заедничка иднина во европското семејство“, заклучи вицепремиерката Грковска на приемот во амбасадата во Љубљана, на кој присуствуваше и министерот за внатрешни работи, Оливер Спасовски.