Политика
Заев: Нема да дозволиме народот да се судри со народ, решението на кризата е низ институциите

Повеќе од два месеци во Македонија постои голем страв од насилно ескалирање на политичката криза, но СДСМ нема да го дозволи тоа, вели лидерот на партијата Зоран Заев во интервју за Al Jazeera.
„За конфликт се потребни две страни а ние нема да дозволиме некој да не вовлече во конфликт. Нема да дозволиме народот да се судри со народот, остануваме надвор со многу трпение и посветеност, низ инсистуциите на системот како што тоа демократските процеси го опишуваат согласно Уставот на Република Македонија. Единствиот излез и решение е низ институциите на системот, преку давање на мандатот за формирање на влада, потоа формирање на влада, и поминување на ВМРО-ДПМНЕ во опозиција, каде што сите заедно ќе почнеме да го правиме реформскиот процес за доброто на сите граѓани на Македонија“, изјави Заев во интервјуто.
Запрашан околу тоа што очекува од посетата на еврокомесарот Јоханес Хан во вторник, Заев вели дека очекува австрискиот дипломат да му порача на лидерот на ВМРО-ДПМНЕ Никола Груевски „да престане да испраќа пораки со кои поттикнува насилство во Македонија“.
„Хан веќе со соопштение најави дека очекува демократско предавање на власта, и брзо формирање на реформска влада, со што земјата ќе биде повторно нормална и очекувам тоа да го каже за време на посетата. Истовремено очекувам да му порача на Груевски да престане да испраќа пораки со кои поттикнува насилство во Македонија, се со конечна цел да се спаси себеси од она што претставува сомневање за криминал. Да се зборува дека Македонија нема ни да постои и ќе биде уништена поради тоа што тој нема повеќе да биде на власт, тоа е далеку од здравиот разум“, вели лидерот на СДСМ.
Околу тоа пак дали решението би можело да биде и она што е предложено од страна на ВМРО-ДПМНЕ, односно широка коалиција без поддршка за ткн „Тиранска платформа“, Заев вели дека „не може оној што ја направи кризата, да биде и решение за неа“.
„За нас не може човекот којшто е носител на режимот и ја продуцираше оваа криза преку незаконското прислушување на 20 илјади граѓани, лицето Никола Груевски да биде и решение за кризата. Ние ги повикавме сите чесни сериозни патриоти и граѓани, членови на ВМРО-ДПМНЕ да ја поддржат оваа програма на идната влада. ВМРО-ДПМНЕ треба да биде подготвен да помине во опозиција, треба да знаат дека редот им дојде и да поминат во опозиција, од 120 пратеници имаме поддршка од 67 пратеници а позади нив стојат 700 илјади гласачи наспроти 450 илјади кои стојат позади Груевски и досегашната власт“, потенцира Заев.
Лидерот на СДСМ повтори дека единствениот релевантен документ е Програмата на новата влада и дека преку нејзе се потврдува дека не постојат никакви „Тирански платформи или декларации“.
„Програмата на идната влада јавно ја објавивме и таа произлегува од потребите на граѓаните од сите етнички заедници во Македонија. Оваа програма потврдува дека не постојат никакви Тирански платформи или било какви програми на партии и декларации, туку единствено програма на идната влада на РМ, која стопроцентно е во интерес на сите граѓани на Македонија, ја зајакнува унитарноста на Македонија, го зајакнува Уставот на оваа наша земја и ги потврдува сите наши аспирации за членство во ЕУ и НАТО“, порача Заев./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тренчевска: Раст на плати и пензии, поддршка за најранливите и оддржливи социјални услуги во 2022 година

Во рамки на дводневната конференција организирана од страна на Владата на Република Северна Македонија, „Година на нови можности“ се оддржа и панел сесијата „Социјални и здравствени политики во време на криза“ на која се дебатирише за ефектите од антикризните мерки, воведувањето на новите методологии за раст на минимална плата и пензиите, воспоставување на социјалните услуги и сервиси и обезбедување на нивна одржливост.
Министерката за труд и социјална политика, Јованка Тренчевска се осврна на она што ја одбележа 2022 година, кои се плановите за 2023 година и кои се клучните промени од кои директна придобивка имаат граѓаните. Таа зборуваше за имплементацијата на законското решение недела-ден на неделен одмор, кое ги унапредува работничките права, измените во законот за минимална плата, со кое минималната плата се дефинираше на 18.000 денари и новата методологија за усогласување на минималната плата, со која се обезбедува нејзин постојан раст.
„Ја усвоивме и новата методологија за усогласување на пензиите. Со цел да креираме системско решение кое ќе дава резултати на долг рок, два пати во годината во месеците септември и март пензиите ги усогласуваме со 50% трошоци на живот и 50% просечна плата. Изминатава 2022 година пензиите пораснаа за речиси 10 %. Во месец март очекуваме ново зголемување на пензиите. За една календарска година, растот на пензиите ќе биде околу 16%, “ истакна министерката Тренчевска.
Пензионерите како една од ранливите категории, беа вклучени и во финансиската поддршка во време на економско- енергетска криза. Покрај паричната помош од 3000 денари, за околу 330.000 пензионери, пензионерите со пониски пензии од 14.000 денари се дел од последниот пакет антикризни мерки.
„Ги мапиравме најранливите категории на граѓани во моментот. Со Законот за финансиска поддршка ги опфативме корисниците на права од социјална и детска заштита односно корисници на право на социјална сигурност на стари лица, на посебен додаток, на правото на надоместок заради попреченост, со попреченост и трајни промени во здравствената состојба, кои користат надоместок за помош и нега од друго лице, а не користат право на надоместок заради попреченост, без потреба од контролен преглед, самохрани родители кои се евидентирани корисници на гарантирана минимална помош, корисници на право на надоместок за телесно оштетување и стечајните работници. Оваа помош е предвидена за четири месеци,“ посочи Тренчевска.
Македонија
СДСМ: Расипничка локална власт на ВМРО-ДПМНE, милионски задолжувања и во Гази Баба

„Локалната власт на ВМРО-ДПМНЕ наместо да ги решава проблемите на граѓаните, расипнички ги троши народните пари и ги задолжува општините. Градоначалникот на општина Гази Баба Бобан Стефковски ја задолжува една од најбогатите општини во државата за цели 5 милиони евра“ соопштија од СДСМ.
Од партијата велат „иако пред 15 месеци наследи полна општинска каса со 3,2 милиони евра сега ја задолжи општината со предлог, во кој не е наведено дали има подготвено проекти и проектна документација“.
„Градоначалникот на Гази Баба не кажа ниту колкав ќе биде периодот на отплата, колкава е каматната стапка, ни дали потенцијалните купувачи можат да дојдат во спрега со инвестициските проекти. Стефковски ги изигра и потцени граѓаните на општина Гази Баба. Тој никаде во предизборната кампања не им вети на граѓаните вакво задолжување. Стефковски наместо за граѓаните, работи за лични и за интересите на неговиот шеф Христијан Мицкоски, Гази Баба од општина со полна буџетска каса, од општина со план за развој, благодарение на Стефковски за помалку од година и половина, стана задолжена општина, потоната во безидејност и стагнација“ стои во партиското соопштение.
Македонија
ВМРО-ДПМНЕ: Оставка од Филип Андов-Сокол и одговорност од Тупанчески

„Во рок од еден месец јавноста дозна за три бегства од затвор. Последниот случај на бегство е повторно од затворот Шутка каде што директор е кадарот на СДС , Филип Андов `Сокол`. Имено лицето Ариф Алили од Кичево, уапсен за дрога, избегал од „слободно одделение“ на затворот“ соопштуваат од ВМРО-ДПМНЕ.
Оттаму потсетуваат дека „пред извесно време од затворот избега и Нафи Абдиоски, лице со полн фотоалбум од заеднички слики со функционери на СДС. За овие скандалозни бегства нема никаква одговорност од директорот Филип Андов, ниту владата му бара оставка, ниту се најавува смена“.
„Ваквите бегства покажуваат дека се работи за целосен распад на затворскиот систем, кој се претвори во решето систем. Пред неколку недели се случи и скандалозното бегство од затворот Идризово, при што беше ранет и еден затворски полицаец. Овој случај, но и останатите покажуваат дека корупцијата и криминалот владеат со затворите во Македонија. Дали владата на Ковачевски чека и во затворот Шутка да се случи скандалозно бегство со жртви за да преземе конкретни мерки и да побара одговорност одФилип Андов – Сокол и од Тупанчевски? Затоа потребна е оставка од Филип Андов – Сокол и одговорност од Тупанчевски веднаш“ стои во партиското соопштение.