Центарот за управување со кризи доби известување од ЕВН за опасност од одрон на голема карпа над кањонот Матка.

Директорот на ЦУК, Стојанче Ангелов, на денешната прес-конференција ја образложи состојбата со карпата. Тој објасни дека карпата се наоѓа во ваква позиција долго време.

„Според добиените фотографии, може да се забележи одредена нестабилност, а ние како институција испративме барање до повеќе релевантни установи што треба да излезат на терен“, информира денеска директорот на ЦУК, Стојанче Ангелов.

При паѓање на карпата би била предизвикана лавина од други камења и карпи и таа би паднала на местото каде што се испушта вода, која оди во хидроелектраната.

„Во овој момент нема место за кревање никаква паника, но воедно ја известуваме фирмата што стопанисува со чамците што пловат во кањонот Матка полни со туристи и до нив препорачуваме и апелираме местото на предниот дел, блиску до браната, да не го користат поради оваа многу мала можност од одрон на оваа огромна карпа. Иако ризикот е многу мал, како сериозна институција, на која безбедноста на граѓаните ѝ е на прво место, сакаме да дејствуваме превентивно и повикуваме овој дел блиску до ѕидот на браната да не се користи“, изјави Ангелов.

Четири години немаше позитивни проекти за Скопје од страна на поранешниот градоначалник. Последните месеци од неговиот мандат се почнаа проекти без план и без конечна реализација. Не се почнува проект што не може да се заврши од почеток до крај и да не се предвидат сите фази, што не е случај со проектите што ги остави претходниот градоначалник, велат од Град Скопје како реакција на обвинувањата на СДСМ.

„Истиот тој градоначалник не ја предвиде енергетската криза во август и наместо да се занимава со сериозни проблеми, приоритет му беше да потпише договор за угостителски услуги. Да беше добар градоначалник, граѓаните сигурно ќе му дадеа повторно доверба.

За два месеца се направија работи што останале незавршени со години, за два месеца направен е план за комплетна реконструкција на 10 улици во Скопје што не се реконструирани со години. За овие два месеца се исчистија над 120 депонии во Скопје, се отвори комуникацијата со граѓаните преку канцеларијата за отворен град, се спроведоа низа мерки за средување на состојбите во јавните претпријатија. Но затоа, пак, овие два месеца не се доволни да се соберат сите коруптивни зделки на старото раководство за што веќе почна официјална ревизија на работата“, се вели во реакцијата од Градот.

Проблемите на граѓаните нема да ги реши СДСМ со прес-конференции на тема Град Скопје, што ги има двапати на ден. Резултатите на терен покажуваат и ќе покажат дека сѐ што се зборува е чиста манипулација и лага, додаваат од Град Скопје.

Демократскиот сојуз на денешната прес-конференција ги презентира фактите во врска со обвинувањата од страната на ВМРО-ДПМНЕ.

„На денешната прес-конференција на ВМРО-ДПМНЕ изнесени се дрски лаги и конструкции во врска со работењето на претпријатието ‘Градски паркинг’ под раководство на Борче Јакимовски, кадар на Демократскиот сојуз (ДС).

Повеќе од еден месец Демократскиот сојуз и други партии од владејачката коалиција се предмет на неосновани напади од Христијан Мицковски и ВМРО-ДПМНЕ. Демократскиот сојуз ги демантира и со индигнација ги отфрла сите напади дека на кој било начин кој и да било од Демократскиот сојуз што извршува функција е вклучен во криминал. Овие напади од ВМРО-ДПМНЕ ги сметаме како обид за уцена да не бидеме и натаму дел од парламентарното мнозинство“, изјави генералниот секретар на ДС, Зоран Димитровски.

Според Димитровски, претставниците на ВМРО-ДПМНЕ најмалку можеле да напаѓаат, паушално и неосновано, од белата зграда, која, како што рече, е градена со капитал стекнат на криминален начин. Тој нагласи дека се работи за партија против чие раководство се водат голем број кривични постапки, а како што додаде, поранешни највисоки државни функционери се осудени на правосилни казни затвор за тешки облици на криминал и корупција.

„Досега никој не добил гратис билет за паркирање ниту, пак, за бесплатно паркирање. Списоци нема, тие се конструкции и фалсификати на актуелниот директор за што ќе следува кривична тужба. Претпријатието работи во согласност со законите и одлуките на градоначалникот и Советот на Град Скопје. Инаку, ЈП ‘Градски паркинг’ работи на пазарни основи, при што над 270 вработени секојдневно ги извршуваат своите работни задачи. Претпријатието 2021 година ја заврши со вишок средства од над 27 милиони денари, доволни за исплата на четири плати на вработените.

Нема донации и субвенции ниту од Градот ниту од Владата, парите за кои Советот на Градот донесе одлука да му се дадат на претпријатието се компензација на комуналната такса во износ од 10 отсто. Имено, ако се наплаќа паркинг-билет по цена од 30 денари, 18 отсто одат за ДДВ, а 10 отсто за комунална такса или 3 денари, кои одат во Градот, а потоа Градот му ги враќа на претпријатието за да се задржат пониски цени за паркирање. Тоа е така секоја година“, рече Димитровски.

Плаќањето на комуналната такса во износ од 33 милиони денари за минатата година било одложено од претходниот директор бидејќи, како што рече, сме во ковид-криза, каде што има намалено паркирање, како и можноста да се воведат дополнителни рестриктивни мерки и сл., при што прометот ќе се сведе на минимум.

„Од таа причина директорот Јакимовски овие средства ги има оставено резерва за нормално сервисирање на претпријатието, за исплата на плати, комунални трошоци и даноци кон државата. Борче Јакимовски е еден од најчесните и најдобри менаџери, кој успешно го водеше претпријатието 12 години, без каква било дамка. Отворени сме за каква било контрола на работењето на директорот Борче Јакимовски. Сакаме да ѝ порачаме на ВМРО-ДПМНЕ дека не сме сите исти. Има и чесни директори, министри и политичари“, порача Димитровски.