Премиерот Зоран Заев за вработувањата на роднините на функционерите го смени мислењето. Пред една недела тој повика на морална одговорност, најави дека ќе се прават анализи дали имало партиски протекции при вработувањето на роднините на функционерите од СДСМ и ДУИ, но сега го омекна ставот. Тој сега вели дека и роднините на функционерите биле граѓани на оваа држава и имале право на еднаков пристап до вработување.

„Мора да бидеме чесни кон граѓаните и да ги слушаме сите реакции, но да не претеруваме. Сите граѓани во оваа држава имаат право на работен однос во неа. Ако стане презаситено и прегорко чувството, да закочиме и да се коригираме. Но, тоа не значи дека членовите на семејствата на функционерите да не бараат работа. Тоа треба да биде по пат на транспарентност и компетитивност“, изјави Заев.

Пред да дојде на власт главниот адут на СДСМ беше крај на партиските вработувања. Тој ветуваше дека граѓаните ќе се вработуваат по стручност, а не по партиски клуч.

„Едноставно е. Главен критериум за вработување нема да биде партиската книшка, туку стручноста и работното искуство. Ова е една од мерките со која ќе се обидеме да ги вратиме заминатите граѓани од Македонија и да спречиме натамошни заминувања. Останавме земја без луѓе! Мора нешто да се смени. Нашата цел е државата и институциите да ги вратиме во владение на граѓаните“, изјави Заев во 2016 година.

На една партиска прес-конференција, кога СДСМ беше опозиција, јавно го прозва тогашниот премиер Груевски за непотизам кога за шеф на УБК беше поставен неговиот братучед Сашо Мијалков.

„Дали е непотизам назначувањето на вашиот прв братучед Сашо Мијалков за директор на УБК? Дали со ваквата поставеност на Мијалков му дозволивте да има неконтролирана моќ, да сее страв и трепет во целата држава? Дали Сашо Мијалков е создавачот на вашата криминална олигархија од фантастична една милијарда евра“, праша Заев од партиска прес-конференција додека беше во опозиција.

Наспроти ветувањата и обвинувањата на претходната власт, луѓе блиски до Зоран Заев станаа негови советници, со високи плати, а не останаа запоставени и коалициските партнери и функционерите на СДСМ. Сестри, браќа, братучеди, па дури и снаи и шуревци на функционери од првиот ешалон на СДСМ се вработија во јавни претпријатија. Кога Заев седна во премиерската фотелја, рече дека нема да толерира вакви појави, односно ветуваше нулта толеранција за корупцијата.

„Со ова јасно укажувам дека никој нема да биде изземен од одговорност. Само така, заедно и пркосно, ќе креираме успешни политики и ќе поставиме темели за постабилна, економска и правична иднина за сите граѓани на Република Македонија. Од успехот на борбата против корупцијата зависи и успехот на нашата држава“, изјави Зоран Заев во декември 2017 година.

По повикот на Заев за етичка одговорност, некои од функционерите ги повлекоа роднините, но други воопшто не чувствуваа одговорност. По ова, Заев се премисли и ја смени изјавата, при што тврдеше дека луѓето се вработени законски. Но, тоа не беше дилема во јавноста, дилемата беше зошто токму роднините на функционерите поминале на конкурсот како најдобри кадри, а останува нејасно дали воопшто имало и други пријавени кандидати за високоплатените позиции во ЕЛЕМ, МЕПСО и во Владата. Министерот Манчевски дури тврдеше дека некои од роднините биле дефицитарен кадар. Според него, два-три случаи не значеле непотизам, а тврдеше и дека членови на неговата партија 10 години биле најдискриминирани, па така го оправда нивното вработување во јавниот сектор.