Македонија
Нинџа: Во ВМРО беа и од кабинетот на Иванов, требаше да биде прогласена воена состојба
„Заменик-началникот Никола Бошковски го побара директорот на УБК, Владимир Атанасовски, велејќи му дека во Собранието е хаос по што Атанасовски цинично му одговорил „комуњарите сакаат да бираат претседател, така им е“ и го известил дека во тој момент во штабот на 8. кат е шефот на кабинетот на претседателот Иванов, Борис Јосифовски, и дека во секој момент може да биде прогласена воена состојба“, рече обвинетиот Александар Василевски-Нинџа на денешното рочиште за крвавиот четврток.
„Седнавме во Паркот на жената борец, каде што го сретнав и поранешниот началник на Петтата управа, Горан Грујевски. Ми кажа дека внатре има луѓе од УБК и дека има информации од военото разузнавање дека во секој момент може да се прогласи воена состојба. Додека седев со него, некој му јави од внатре и ми рече: „Ова не е на арно“ мислејќи на тоа дека полицијата почнала веќе да дејствува, односно дека некој друг ја зел командата. Подоцна Грујевски доби информација дека нема да има воена состојба поради притисок од странски фактор.
Околу 23 часот Бошковски ми се јави да излезам кај Градската болница, каде што ќе ме собере некое лице. Се качив во возилото и отидовме во една прикриена база на Петтата управа во близина на државна болница, не можам да кажам која е. Внатре беа Никола Бошковски и тогашниот началник Сашо Марковски. Во неврзан разговор разбрав дека се одземени харддисковите од мониторинг-собата во Собранието од безбедносните камери“, рече Нинџа и додаде:
„Бошковски му се јави на Атанасовски што да прави со харддисковите по што добил одговор да се уништат. Сашо Марковски ги извади харддисковите, ги стави на преса и почна да ги уништува. Кога беа искршени, зема ножици за лим и почна да ги сече цедињата на парчиња“.
Василевски вели дека базата ја напуштиле околу 12 часот. „Со Бошковски се упативме кон Автокоманда да ме однесе дома, во меѓувреме застанавме во Керамидница кај мостот на Вардар. Бошковски се качи на мостот и остатоците од харддисковите ги истури во Вардар. Бошковски ми кажа дека Марковски со хируршки ракавици ги извадил харддисковите од Собранието, дека никој нема да биде обвинет и дека така работи „петка“, рече обвинетиот Александар Василевски-Нинџа на рочиштето за крвавиот четврток.
Тој вели дека поранешниот началник на Петтата управа, Горан Грујевски, го советувал да не се предава, но по разговор со адвокатите, одлучил сепак да ѝ се предаде на полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Максим Димитриевски најави нова детска градинка за 400 деца и целосна изградба на улицата АВНОЈ
Градоначалникот на Куманово и кандидат за нов мандат – Максим Димитриевски најави нов голем капитален објект – изградба на детска градинка во населбата Зелен Рид. Со која ќе се излезе во пресрет на потребите на жителите на оваа населба, но и пошироко. На локација за која во минатото биле издвојувани големи износи на финансии како отштета за поранешните сопственици на земјиштето.
„Дојде време денес да се обезбедат средства со кои ќе се изгради нова детска градинка за повеќе од 400 деца. Исто така, целосно урбано ќе се среди целиот простор околу, со што дополнителнои ќе се придонесе за облагородување на изгледот на оваа населба“, нагласи Димитриевски.
Паралелно со ова, Димитриевски најави дека во план е и изградба и довршување на сите краци од улицата АВНОЈ, како и целосно поставување на фекална канализација, со што дефинитивно ќе се надмине деценискиот проблем за жителите што живеат во тој дел на Куманово. „За сите проекти се обезбедени средства од Владата и во следниот период општината ќе ги реализира целосно“, порача Максим Димитриевски.
Тој ги повика граѓаните да му ја дадат поддршката и во вториот круг за Куманово да продолжи да расте и да се развива.
Македонија
Мицкоски од Карпош повика на масовна излезеност и поддршка за Сотир Лукровски и Орце Ѓорѓиевски
Претседателот на ВМРО-ДПМНЕ, Христијан Мицкоски, се обрати на мини митингот во Карпош, во рамки на вториот круг од локалните избори закажани за 2 ноември 2025 година, под слоганот „Вистинскиот избор! Твојот човек! Твоето место! За твојата иднина!“.
Мицкоски од Карпош зборуваше како човек кој го поминал својот живот низ улиците во Карпош со карпошани и повика граѓаните на 2 ноември да гласаат за број 9 за крај на бетонизацијата, за развој и напредок.
„Денес сум овде како човек кој го поминал својот живот тука во овие улици тука низ Карпош, како карпошанец и како таков сакам да кажам неколку работи коишто сметам дека се важни да се кажат. На овие локални избори народот јасно и гласно кажа која партија ја има довербата. После првиот круг ВМРО-ДПМНЕ и коалицијата освоија 33 градоначалници плус кандидатите кои се во втор круг како првопласирани и 6 како второпласирани, тогаш доаѓаме до бројка од 59 општини. Во 58 општини коалицијата предводена од ВМРО-ДПМНЕ и има мнозинство во советите. Ако на тоа се додаде и огромната предност која ја има Орце во однос на неговиот противкандидат којшто вчера видовте како на медиум јавно избегна да каже дали ќе ги поддржи кандидатите во Брвеница и Кичево на ВМРО-ДПМНЕ, тоа треба да се запомни, ние знаеме, но добро е скопјани да запомнат со какви измамници имаат работа. Затоа што еднаш измамник цел живот измамник. Честа се стекнува на улица и таму се учат работи кои во училиште не можеш да ги научиш, а меѓу нив е и честа и таа се брани на улица, но овој човек не само што не ја има таа чест туку тој има од кого да учи од неговиот ментор претседателот на таа политичка партија за која одамна вие знаете за каков измамник станува збор, тие луѓе ја изгубија својата чест и ја немаат“ нагласи Мицкоски.
Мицкоски од Карпош повика на масовна излезеност и поддршка за број 9, за Сотир Лукровски и Орце Ѓорѓиевски за градоначалник на Скопје
„Советничката листа на ВМРО-ДПМНЕ и коалицијата за Град Скопје убедливо победи во однос на сите други советнички листи, што значи имаме вкупно 60 општини во кои ВМРО-ДПМНЕ победи на овие локални избори во првиот круг. Јас сум убеден дека и после вториот круг ќе имаме 59 градоначалници плус Градот Скопје“ истакна Мицкоски.
Мицкоски ги повика граѓаните на 2 ноември да гласаат за број 9 и Сотир Лукровски во Карпош, за развој и напредок.
Македонија
Мицкоски: Кога Јакимовски бараше поддршка го замолив да нема бетонизација, а потоа ми рече ‘морам од нешто да живеам’
Претседателот на ВМРО-ДПМНЕ, Христијан Мицкоски, од маалска средба во општина Карпош порача дека е време за промена и крај на, како што рече, годините на „бетонизација и приватни интереси“ во оваа општина.
Во своето обраќање, тој се осврна на односите со актуелниот градоначалник Стевчо Јакимовски, за кого рече дека „ја изневерил довербата на граѓаните и коалицијата“ уште по изборите во 2021 година.
Мицкоски се наврати на 2021 година, кога, како што рече, актуелниот градоначалник на Карпош, Стевчо Јакимовски, побарал помош и поддршка од ВМРО-ДПМНЕ по првиот круг од локалните избори.
„Тогаш дојде ненајавен, вознемирен и уплашен, во паника. Го примив, му реков да седне и да се смири, да разговараме. Ми велеше: ‘Те молам, поддржете ме, ако треба ќе клекнам, само да ме поддржите. Народот може да ме оправда, да ме обели’. Му реков – немој така, не личи, си човек во години, ќе разговараме, но имам едно барање – нема повеќе бетонизација во Карпош. Граѓаните се изморени од тоа“, раскажа Мицкоски.
Според него, Јакимовски ветил дека ќе го почитува тоа барање и добил поддршка од ВМРО-ДПМНЕ со што ја обезбедил градоначалничката функција.
„По изборите, кога отидов да му честитам, ми покажа маса преполна со детални урбанистички планови. Ми рече: ‘Бирај, кој е за тебе’. Го прашав што значи тоа, нели се договоривме дека нема да има нова бетонизација. А тој ми рече: ‘Морам од нешто да живеам’. Тогаш ми стана јасно дека не станува збор за ветувања, туку за интереси. Му се заблагодарив и му реков дека од мене нема да добие поддршка“, изјави Мицкоски.
Тој додаде дека по тој период Јакимовски започнал со лични напади, но и дека, како што рече, времето на „старите политички лица“ завршува.
„Карпош мора да ја врати својата енергија и изглед. Се работи за човек кој се наоѓа на црната листа на САД за криминал. Време е граѓаните да изберат чесност, а не интереси“, изјави Мицкоски, повикувајќи ги жителите на Карпош да го поддржат кандидатот на ВМРО-ДПМНЕ, Сотир Лукровски, во вториот круг на локалните избори на 2 ноември.

