Четири политички субјекти, Демократскиот сојуз, ФРОДЕМ, МОРО–Работничка партија и Демос ја формираа во неделата „Коалицијата за -промени и правда” (КПП) преку која во иднина заедничко дејствуваат, како што оценија партиските челници, во услови на исклучително сложена политичка состојба во земјата.

Претставниците на партиите кои се обединуваат околу заедничка платформа во неделата ги истакнаа клучните приоритети содржани во платформата, а околу кои Коалицијата за промени и правда“ (КПП) се обединува и ги афирмира пред македонската јавност.

Павле Трајанов, претседател на Демократскиот сојуз (ДС), нагласи дека „платформата за дејствување, претставува одговор на граѓанскиот предизвик, да се формира нов, силен политички блок, кој ќе дејствува за да се случат промени и правда во Македонија. Наша цврста определба е дека во Македонија мора да се спроведат длабоки реформи, за да се создадат услови за фер,демократски и кредибилни избори“.

Не е можно креаторите на кризата, рече во продолжение Трајанов, во моментов самите тие, да се наметнуваат како спасители на државата.

„Тие што ги кршеа изборните правила, ги прислушуваа граѓаните и ја ограбија Македонија, а (претседателот) Ѓорге Иванов ги аболираше, ниту сакам јас, ниту некој треба со нив да разговара и преговара за слобода, демократија или владеење на правото. Уште помалку тие треба да бидат некаков фактор кој треба ЕУ и САД да го респектираат“ рече Трајанов кој пред неколку месеци по десет години ја напушти коалицијата со владејачката ВМРО-ДПМНЕ.

Според Трајанов, креативни и државнички решенија ќе дојдат кога во политичките процеси во земјата ќе бидат вклучени и граѓанскиот сектор, експертите и медиумите.

„Ние се залагаме за промени, промени кои никогаш повеќе нема да дозволат да се случи една партија, еден човек, една власт“, порача челникот на Демократскиот сојуз и побара укинување на аболицијата дадена од шефот на државата за 56-те носители на високи државни и политички функции, како и нивни соработници, за кои има сомненија за вмешаност во кршење на изборните правила, незаконито прислушување, учество како и во организиран криминал..

„Сакаме стабилна држава, економски развој и младите да останат овде во Македонија. Изборите ќе се одложат, но ако не се формира експертска влада, од врвни професионалци и без партиски багаж, тогаш агонијата ќе продолжи. Сме за формирање на експертска влада, повлекување на аболицијата и создавање услови за политичка и кривична одговорност за сите што го заслужуваат тоа“, порача Трајанов ги повика и другите партии и поединци да се придружат на коалицијата

„Можеби некој ќе праша зошто промени и правда? Прво, за да им го покажеме патот и местото на мрачните политички сили и да се спасиме од неизбежната катастрофа што ни се заканува сите нас да не уништи. Второ, затоа што на Македонија ѝ се потребни одговорни политичари кои се подготвени конечно да создадат демократски консолидирана и просперитетна земја, како современо демократско, инклузивно, иновативно и рефлексивно општество во коешто државата ќе биде одвоена од партијата. Трето, затоа што целта ни е слободна и праведна Република Македонија ослободена од криминалните структури, партиски профитери и лицемери, и четврто – промени се се потребни затоа што не можеме да дозволиме и натаму да имаме држава каде Таткото на нацијата е соучесник во злосторничко здружување“, рече во своето обраќање Јове Кекеновски кој го претставуваше движењето ФРОДЕМ

Појасни дека со терминот „правда“ четворицата челници сметаат дека секој морада да ја понесе својата одговорност. „Само преку правда ќе ја спасиме нацијата од невидениот нанесен срам, поради досегашниот непримерениот начин на владеење и изборниот криминал“, додаде Кекеновски.

Според Емил Анастасов, претседател на ДЕМОС, пак, во Македонија, со ваков политички систем во кој не постои никаква одговорност на политичките субјекти, како што оцени, сите политичари се корумпираат и „помалку или повеќе исто ќе се однесуваат“.

„Затоа, на Македонија ѝ се потребни коренити промени на политичкиот систем. Со тие промени ќе се оневозможи апсолутното владеење на една партија и создавање монструозна партиска држава која ги голта и под своја апсолутна контрола ги става сите институции“, рече Анастасов.

Појасни дека двете основни цели на КПП е во иднина политичарите да бидат натерани да мислат на општиот интерес, а не само на својот личен, како досега. Втората цел на денеска промовираната Коалиција, посочи челникот на ДЕМОС, е многу скоро политиката да престане да ја заробува јавноста и политичарите професионално ќе си ја вршат работата, а на народот „не ќе му биде важно ни кој е премиер ни кој е претседател на државата“.

„Кога овие две цели ќе ги постигнеме, дури тогаш ќе можеме да зборуваме дека има демократија во Македонија“, смета Анастасов.

Претседателот на МОРО-РП, Горан Зафировски, во својот говор нагласи дека „Работничката партија ќе настојува да биде никулец од кој на човекот, преку економската сигурност, ќе му биде вратена човечност, како и неговиот опстанок во семејството и општествената и државната заедница. Ќе бидеме зародиш со кој ќе и се стави крај на лажната девиза која политиката ј изедначува со „вавилонска блудница“ и ќе ја врати во нејзините научни рамки за да обезбеди економски просперитет во државата.“

Приоритетите на чија имплементација ќе работи „Коалицијата за Промени и правда“ ги презентираше Весна Стоименовска од ДС, при што нагласи дека „политичка и кривичноправна одговорност за сите кои ја вовлекоа Македонија во длабока криза, ја ограбија и предизвикаа иселување на креативните и стручни кадри.

Ефикасна борба против организираниот криминал и корупцијата преку создавање законски услови за конфискација на криминално стекнатиот имот од функционерите и забрана за нивно политичко дејствување од најмалку 10 години. Имотот и парите кои се стекнати на коруптивен начин или се плод на организиран криминал ќе бидат одземени и ќе бидат вратени и поделени на граѓаните на Македонија рамноправно.

Минимална плата од 300 евра, минимална пензија од 200 евра, како и голем број на други социјални мерки ( социјална помош од 6000 денари, формирање на Фонд за млади, формирање на станбен фонд за решавање на проблемот со домување, посебно на младите брачни парови и сл.).

Независно судство преку реформа на судскиот систем и негово ослободување од притисоците на дневната политика. Реизбор на сите судии (вклучително и на судиите на Уставниот суд) и на обвинителите. Расчистување со аферата „Пуч“, односно неовластеното прислушување преку јакнење на самостојноста на институциите и целосна поддршка на Специјалното јавно обвинителство.

Коренити реформи и промени во сите области како еден од главните предуслови за подобрување на квалитетот на животот на граѓаните и исполнување на стандардите за влез во ЕУ и НАТО.“/крај/мф/сн

Извор: Макфакс