Во најголемата опозициска партија СДСМ се свесни дека ќе ги изгубат предвремените парламентарни избори во април следната година, изјави премиерот и челник на владејачката ВМРО-ДПМНЕ Никола Груевски во интервјуто во вечерниот Дневник за телевизијата Канал 5, во кое додаде дека ниту како влада, ниту како партија ќе прават пречки за комплетирањето на тимот на Специјалната обвинителка Катица Јанева којашто треба да ги истражува предметите од ткн „бомби“ на опозицијата од прислушувани телефонски разговори на високи државни функционери.

Премиерот Никола Груевски смета дека доаѓањето на еврокомесарот Јоханес Хан е сосема непотребно.

„Тоа го изнуди СДСМ со вештачко блокирање на разговорите по неколку закони. Овие закони за коишто тој сега ќе дојде, практично можевме самите да ги поминеме. Тие вештачки најдоа начин една стручна расправа, дебата и меѓу јавните обвинители, исто така, најдоа начин повторно да го блокираат процесот, прво борејќи се ако може да се најде повторно начин да избегаат од изборите, бидејќи тоа е сега нивната главна цел тие се свесни дека ќе загубат на следните избори и за нив тие не се многу посакувани колку и да го говорат обратното, затоа што како што ние нарачуваме анкети за расположението на граѓаните така и тие го прават тоа, и тие се доволно свесни што ги очекува во април“, рече премиерот Никола Груевски.

Според него, втората причина за доаѓањето на Хан во понеделник во Скопје, е СДСМ повторно да го сврти вниманието на јавноста кон себе.

„Кога доаѓа комесарот Хан, СДСМ доаѓа до израз на некој начин, затоа што тие не можат во меѓувреме да дојдат до израз со проекти, идеи со предлози за реформи, со предлози за подобрување на животот на граѓаните или со некоја конструктивна идеа. Тоа не е нивното главно поле на битка. Тие тука губат од нас, не се снаоѓаат. Немаат доволно капацитети за да нé победат на тоа поле. Нивната борба постојано ја пренесуваат на друго поле, на поле на деструкција, на кризи, на заглавувања некакви па доаѓа некој од надвор да не смирува, да ни помогне, да ни олеснува и тогаш тие доаѓаат до израз и повеќе се присутни во јавноста. Тоа се двете причини поради коишто тие го закочија процесот, едното ако може ова да биде уште една причина да се одложат изборите, второ ако не се успее барем да се дојде до израз со доаѓањето на Јоханес Хан којшто, еве ,на некој начин ќе се обиде да го олесни процесот за навреме да се завршат работите кој што следуваат, а тоа се законот за измени за Законот на влада со кој треба да се овозможат оние заменици министри, министри што треба да влезат во владата“, рече Груевски.

Истакна притоа дека досега од СДСМ нема добиено предлог ниту за министер, ниту за заменик министер во владата која треба да го организира предвремените избори.

Груевски, натаму во интервјуто се осврна и на ситуацијата со тимот на специјалната обвинителка, порачувајќи дека ниту како влада, ниту како партија ќе претставуваат пречка за функционирањето на оваа институција и оти очекуваат таа што побрзо да дејствува

„Жал мие што уште на почеток специјалната јавна обвинителка Катица Јанева се судри со фелата, колегите јавни обвинители. Тие реагираат на некои работи, како бројноста на тимот, надоместоците, и реагираат оние кои работат во обвинителството за организиран криминал каде има многу тешки случаи, убиства, случаи за дрога, за членови на Исламската држава. Нивниот буџет е десет пати помал од буџетот на Јанева. Јас го гледам револтот… Не би сакал да заземам страна, оти ова е чувствително прашање“, рече премиерот Груевски.

Посочи на две работи кои се загрижувачки „Едната е што Јанева ги повика обвинителите кои се избрани да не дадат заклетва. Тоа загрижува, бидејќи тоа е законска процедура и законска обврска, и кога прв човек ќе повика свои соработници да не го почитуваат законот, бидејќи сите очекуваме дека таа најмногу ќе ги почитува законите. Со тоа се поставува прашањето дали станува збор за личност која самата нема да ги почитува законите. Втора е фактот што Јанева во еден ден даде изјава дека ќе работи со 7 обвинители, а следниот ден комплетно ја промени одлуката за да и бидат избрани сите 14“, истакна.

„Дали тоа значи дека некој дејствувал на нејзиното мислење и дали таа независно ги носи одлуките. Нова е и нема искуство. ќе го примиме ова како почетнички грешки и ќе следиме нејзината работа“, додаде Груевски.

Порача дека неговата партија ВМРО-ДПМНЕ со нетрпение очекува Јанева да започне со работа, бидејќи, како што потенцираше, немаат направено незаконски дела и сакаат тоа да се потврди што побрзо, и додаде дека е во нивен интерес што поскоро да започне со работа.

„Ние нема да бидеме пречка како Влада или партија во однос на нејзиното непречено работење и ќе излеземе во пресрет на сите барања“, рече Груевски

Груевски потсети дека во преговорите на политичките партии за идниот закон за избори беше прашањето на гласањето на иселениците.

„Една од работите на која сериозно се атакуваше беше дијаспората. Се бараше да нема претставник во парламентот од дијаспората и тука се кршеа копјата. Единствена причина беше тоа што 90 отсто од дијаспората на минатите избори гласаше за ВМРО-ДПМНЕ и ги поддржа политиките. Успеавме со одреден компромис да го здржиме гласањето на дијаспората и таа да има претставници во парламентот. Втора работа е тоа што успеавме да ја отфрлиме онаа чудно и несвојствено барање за бадентер при гласање во ДИК“, реќе Груевски додавајќи дека биле направени други комбинаторики, кои можеби „не се најидеални, но се далеку подобри од она што претходно се нудеше“, гласањето во ДИК да биде суспендирано преку гласовите на партиите на заедниците.

Премиерот Никола Груевски оцени и дека голем срам ѝ е нанесен на земјата од изјавите на лидерот на опозицијата Зоран Заев со неговите изјави во врска со негавата неодамнешна посета на Израел и средба со тамошни високи личности.

„Се случи голем срам за државата. Политичар кој претендира за премиерска позиција да замине во странство и да ја брука државата. Невистини зборуваше… Моите информации говорат дека по случката имале координација (тајната служба) Мосад и министерствата за надворешни и за внатрешни работи на Израел, за тоа како да постапат бидејќи првпат се соочуваат со ваква работа, по излегување од зградата на владата човекот што го примиле да дава јавна невистинита изјава“, истакна Груевски.

Според него, срамот е уште поголем затоа што и покрај тоа што беше фатен во лага, а неговата изјава беше директно демантирана од потпретседателот на израелската Влада, челникот на СДСМ „ниту му се извинил на Израел, ниту на граѓаните на Македонија за срамот кој им го нанесе“.

„Ако Заев дозволува во една таква сериозна држава да говори такви лаги, што ли да очекуваме ние во Македонија од него, и како опозиционер и како претендент за премиер. Тој покажува дека не е дозреан за градоначалник, а камоли за некоја државна институција. Како секој граѓанин ќе може да му верува на него, кога излегува од состаноци со врвнилуѓе од една пријателска држава и ја лаже сопствената јавност, додава Груевски и додаде дека на Израел ќе мора да му се даде извинување за изјавата на Заев, бидејќи иако е опозиционер, како висок политички функционер сепак ја претставува земјата./крај/мф/сн

Извор: Макфакс