Во резиденцијата на Претседателот секогаш нормално се преговараше кога во Македонија имаше одговорни лидери. За жал, опозицијата сега за лидер го има Зоран Заев, кој со своите изјави ја лаже и грубо ја манипулира македонската јавност, се вели во изјавата од кабинетот на претседателот Ѓорѓе Иванов на изјавата на челникот на опозицискиот СДСМ, дадена во телевизиска емисија во четвртокот вечерта, и се истакнува дека разрешницата на политичката криза е по лична иницијатива на шефот на државата.

Заев во емисијата „Вин–Вин“, на телевизијата „24 Вести“ во четвртокот вечерта, меѓу другото, рече дека „Уште една потврда дека првиот човек во државата, Претседателот на државата е само статист на македонската политичка сцена. Јас ќе ви кажам вака: бевме во Стразбур, преговаравме во кабинетот на Хан, бевме во Брисел, преговаравме во кабинетот на Хан, бевме овде во Пржино во резиденцијата на Европската унија и ако беше се нормално во Македонија требаше да преговараме во резиденцијата на Претседателот на државата…“

Сепак, Иванов тврди дека „По подолг период без елементарен политички дијалог, на 10-ти мај 2015 утрото, лично му се јавив на Зоран Заев и го поканив на Советот за безбедност. Тој ја прифати поканата и учествуваше на седницата на Советот одржана во проширен состав. На самата седница, на политичките лидери им најавив дека наредните денови ќе свикам лидерска средба во мојот Кабинет за надминување на политичката криза“, се потсетува во реакцијата на македонскиот претседател.

Иванов додава дека три дена подоцна повторно телефонски упатил покана до Заев како лидер на опозицијата да учествува на лидерска средба во претседателскиот кабинет, на што овој одговорил дека треба се консултира со партијата.

„Сега го повикувам Зоран Заев да покаже образ и да ѝ објасни на јавноста и на сопственото членство поради кои причини не ја прифати поканата да учествува на лидерската средба во претседателскиот кабинет. Да го потсетам, аргументот што мене ми го кажа е дека не постојат никакви гаранции дека тој нема да биде уапсен врз основа на обвиненијата кои се поведени против него“, порачува Иванов и додава дека Кабинетот на Претседателот за овој за овој разговор ги известил амбасадорите на САД и ЕУ, и под нивен притисок, Заев прифатил да учествува на лидерската средба, но во Клубот на пратеници.

Заев сака да манипулира и дрско да ја лаже македонската јавност, вели Иванов потсетувајќи дека првата политичка криза во 2011 година беше решена со серија лидерски средби, во потесен и во проширен состав, на иницијатива на во претседателскиот кабинет, како и ризата од 2012-та по настаните во парламентот од 24-ти декември, која беше надмината на иницијативата на шефот на државата, со учество на ЕУ и лидерите на политичките партии.

„Веднаш по мојата втора инаугурација, повторно го поканив Заев на средба во кабинетот. Заев ја прифати поканата, но до ден-денес сè уште се нема појавено. Сево ова јасно укажува на неговиот континуиран однос кон државните институции“, се вели во изјавата на Иванов.

Претседателот, исто така, порачува дека земјата има сили да ги надмине сите политички предизвици, со сопствени капацитети „но само доколку лидерите на политички партии се однесуваат одговорно кон државата, кон граѓаните и кон своето членство“.

„За жал, лидери од профилот на Зоран Заев очигледно недоволно ја разбираат нивната улога и одговорност, или се заложници на концептот за уривање и дискредитирање на институциите по секоја цена“, заклучува на крајот од изјавата/крај/мф/нс

Извор: Макфакс