Челникот на СДСМ, Зоран Заев, во саботата ден пред одржувањето на најавениот голем опозициски митинг со кој се бара оставка на Владата, презентираше нови снимки од прислушувани телефонски разговори, за коишто тврди дека премиерот Никола Груевски и неговите најблиски соработници лажно се претставувале како патриоти и со цврст став во поглед на преговорите со Грција околу името на земјата.

„Дојде време јавноста во Република Македонија да ја дознае вистината за лагата врз којашто Никола Груевски го изгради митот за неговиот виртуелен патриотизам. Тој лицемерен патриотизам на Груевски што одзеде 9 години од иднината на Република Македонија и ги зароби една деценија граѓаните во ужасна и мачна бесперспективност, додека фамилијата боговски се сместила по рајските земји“, рече Заев

Потоа во седиштето на социјалдемократите беше презентиран материјал во кој премиерот Груевски меѓу другото вели „Сакаа компромис, ние рековме дека не можеме да се пазариме со уставното име). „Цел култ разви овој човек врз овој став, нели? Но, друга е реалноста“, рече Заев според кој ова бил моментот на „големата вистина“ тврдејќи дека Груевски „Се пазарел почитувани граѓани и тоа како се пазарел Никола Груевски со уставното име на Република Македонија“.

„Ова што ќе го слушнете не се информации од преговарачкиот процес што се води под покровителство на Обединетите нации. Ова се конкретни и јасни докази за класични UDNERGROUND, подземни пазарења во коишто е инволвиран Никола Груевски, со underground посредници од негова доверба во Македонија и посредници од негова доверба од нашиот јужен сосед Грција“, толкуваше лидерот на СДСМ.

Според него, „сите шпекулации биле точни, и кога излегоа информациите дека се водат преговори, тајни преговори без знаење на граѓаните во Македонија, за што предупредувавме, и кога се пишуваше за тајни преговори што се одвиваат надвор од процесот доверен под покровителство на Обединетите нации“.

„Тогаш кога Никола Груевски обвинуваше дека платеници, соросоиди заговараат промена на уставното име на Република Македонија. Е тогаш навистина се правеле пазари. Но тие пазари ги правела власта. И тоа, денеска почитувани граѓани, ќе слушнете и кој биле вистинските преговарачи за промена на името на државата“, појасни Заев кој истакна дека тоа не биле официјалните преговарачи на Македонија во Обединетите нации, актуелниот шеф на дипломатијата, Никола Димитров, или тогашниот македонски амбасадор во САД, Зоран Јолевски, ниту тогашниот министер за надворешни работи, Антонио Милошоски.

„Не бил директно дури ни Никола Груевски. Никола Груевски слушал. За уставното име на Република Македонија под маса, во тајни простории, со познатиот бизнис партнер од Грција на Никола Груевски, човекот кој ја преговараше продажбата на рафинеријата ОКТА, по сите информации заштитениот сведок на власта, кој го местеше Љубе Бошкоски дека наводно го продавал името на државата“, рече уште Заев.

Заев тврди дека преговарачи биле извесен Емануел Малелис познат како Маноли, и досегашниот шеф на Управата за јавна безбедност, Сашо Мијалков.

„Сашо Мијалков, братучедот на Никола Груевски, босот во Македонија на криминалните и паравоени структури кои дејствуваат за цели на Никола Груевски, замислете се пазарел за уставното име на Република Македонија, со грчкиот партнер, посредникот за тајни преговори Маноли“, обвини Заев.

Тој толкуваше дека од аудио доказите што ги презентираше станува јасно дека Никола Груевски „лажел кога тврдел дека не се пазари за уставното име на земјава“. „Се пазарел. Не е точно дека не разговарал за идентитетските прашања. Разговарал и ги договарал. И не само што Груевски и Мијалков го правеле сево ова, туку го правеле заткулисно. Затоа во разговорот со којшто ќе почнеме ќе слушнете како преговарачот на хартија, Зоран Јолевски му признава на министерот за надворешни работи, Антонио Милошоски дека медијаторот Нимиц чувствува дека е исклучен од процесот“, рече.

Заев потсети и на еден поранешен напис во дневниот весник е Дневник, при што цитираше: „Во паралелниот преговарачки процес, кој е целосно развиен во тајност, како што објави грчкиот весник Македонија, грчката страна ја претставува А.Р, советник на грчкиот премиер, кој му дава инструкции на посредникот М.М, Грк кој живее и работи во Скопје. Од македонска страна, како претставници на Груевски, според изворите на грчкиот весник, во разговорите учествуваат двајцата браќа, едниот вработен во Царина, а другиот е шеф на тајната полиција“.

Челникот на СДСМ потоа рече дека истата информација поконкретно ја пренесе српскиот весник Блиц и повторно цитираше: „Скопски медиуми наведуваат дека претставници на грчката страна се поранешниот директор на македонската рафинерија ОКТА, бизнисменот Емануел Малелис Маноли и Алекс Рондос, близок соработник на премиерот Јоргос Папандреу. Во преговорите од македонската страна, вклучени се браќата Мијалкови, Сашо Мијалков, директор на тајната служба и Влатко Мијалков, советник на директорот на Царина, инаку блиски роднини на премиерот на Македонија, Никола Груевски“.

„Кога излегоа овие информации, авторка на текстот во весникот Дневник беше подоцнежната уредничка во порталот на Мијалков, Телеграф, која не пренесе коментар од власта на Груевски, но пренесе официјална реакција од грчка страна во којашто се негираат преговори под маса, надвор од процесот во ОН. Портпаролот на грчкото МНР, Григорис Делавекурас ги одрекол овие информации изјавувајќи дека постои еден преговарачки процес за името под покровителство на Обединетите нации“, заклучи Заев

Пред да емитува разговор, како што рече, меѓу Антонио Милошоски, Никола Груевски и Сашо Мијалков, Заев рече дека „во разговорот, за уставното име на Република Македонија се зборува буквално како на пазар. Да биде со загради, да биде и со додавки, да биде не со една, туку со две придавки, што ќе ја задоволи грчката страна, Независна, Вардарска, Суверена, Горна, Северна… со еден збор, се договара име посложено и од референцата ФИРОМ, со којашто се потсмеваше власта на Груевски, а со којашто Македонија стана дел од Обединетите нации“.

„Се уверивте ли сега кој се пазарел со името на Македонија? Тоа не е никој друг, туку наводно, најголемиот патриот во Македонија, лажниот лик Никола Груевски. Слушнавте од разговорот дека Груевски мисли дека е ризично да ја протне кај граѓаните референцата Горна. Но откако Мијалков одлучил да биде Горна, тоа станува и официјален предлог. Еве погледнете го тој документ, предлог на Медијаторот Нимиц: Горна Република Македонија“, рече Заев.

Потоа најави дека од следната снимка „ќе ви стане јасно дека не е точно дека Груевски не влегол во разговор за идентитетските прашања. Влегол. Барал да се решат преку Резолуција“.

Откако го емитуваше телефонскиот разговор, според негово тврдење, меѓу Јолевски со Милошоски, Заев појасни дека „подоцна и во еден од предлозите на Нимиц како референца за националноста се наведува терминот граѓани на Горна Република Македонија, или македонски граѓанин. Во последниот разговор за денеска лично од Груевски ќе слушнете дека братучедската двојка, тој и Сашо Мијалков прифатиле грчки предлог. Ова и го признава Груевски на Силвана Бонева“, вели Заев по што емитуваше снимка означена како разговор меѓу Груевски – Бонева

„Сега што правиме Никола Груевски?“, праша Заев. „Кој е лицемерниот? Дали е фер позицијата на Социлајдемократскиот сојуз, граѓаните да го знаат ставот на партијата или твоето лицемерие, на сите полиња, па и на полето на патриотизмот, на коешто си ја отрул Македонија, а и нејзините граѓани“.

Заев порача дека објавувањето на денешните снимки имало цел да се отвори подобра перспектива за Република Македонија.

„Затоа, да престанат лагите, да го прекинеме лицемерието, да го прекинеме насилието на една тесна група на чело со Груевски којашто буквално се што правела, правела за лични интереси и на 17-ти мај, во недела, утре, да му порачаме на Никола Груевски, да замине и никогаш повеќе да не се појави на политичката сцена и пред граѓаните на Република Македонија“, рече на крајот претседателот на СДСМ./крај/мф/сн

Извор: Макфакс