Лицето Ѓорѓе Иванов, човекот кој на криминални избори Никола Груевски го постави за претседател на државата, денеска го заокружи државниот удар врз Македонија, изјави челникот на опозициската СДСМ, Зоран Заев, и бара оставка од Иванов или да биде свикан парламентот за да отповикување на претседателот.

Претходно во вторникот Претседателот Ѓорге Иванов на прес-конференција во обраќање до јавноста соопшти дека донел општ акт за прекинување на сите кривични постапки против лица од власта и од опозицијата за, како што рече, зачувување на државните и националните интереси и ова го гледа како начин за излез од политичката криза.

„Ова е државен удар. Криминалната банда на Никола Груевски, уништувајќи ја судбината и загрозувајќи ја иднината на Македонија, се обидува да се спаси од злосторството и криминалот што и го направија на сопствената земја, на сопствените граѓани“, се вели во изјавата на Заев кој го обвини шефот на државата дека станал „директен соучесник во злостроничкото здружување против Македонија“.

„Тој сака парите украдени од граѓаните од криминалната банда да не бидат вратени кај граѓаните. Од денеска нема правна држава. Го погазија Уставот, законите, достоинството на граѓаните. Денеска го погребаа Договорот од Пржино. Македонија тоа нема да го дозволи. Нема да дозволиме целосно рушење на државата. Заедно со граѓаните застануваме на страната на Македонија. Од денеска, со граѓаните ќе го вратиме правото и правната држава. Бараме, заштитникот на криминалците, лицето Ѓорѓе Иванов, веднаш да поднесе оставка“, наведува уште во реакцијата на лидерот на најголемата опозициска партија која не го прознава изборот на Иванов за претседател на државата.

Заев предупреди дека доколку Иванов не си поднесе оставка „државата ја доведул во вонредна состојба, на граница на експлозија“ и дека поради тоа Собранието мора веднаш да биде свикано и да покрене постапка за отповикување на Ѓорѓе Иванов.

„Во името на целата демократска и правдољувива јавност судските процеси мора да продолжат и да има правна разрешница. Криминалците да одговараат за криминалот. Невините да имаат можнст да ја докажат својата невиност. Јас, Зоран Заев, на чело на демократска Македонија, ќе ги предводам граѓаните во битката за враќање на уставниот поредок и државноста на Република Македонија, на улици, на протести, во градовите и селата низ цела Македонија“, порача Заев.

На новинарско прашање кога ќе заполнат најавенит претести, првиот човек на опозицијата рече дека тоа ќе се случи „веднаш откако ќе ги донесат одлуките“, а „денеска повикот е испратен“.

„Веднаш штом ќе ги донесеме одлуките започнуваат сите алатки коишто ни стојат на располагање. Правдата и правната држава во Македонија мора да ја вратиме. Ова денеска е државен удар, не е само удар врз правната држава. Сите алатки коишто ни стојат на располагање ќе ги користиме. Повикот за протест денеска е испратен. Со добра организација сите родољубци на оваа наша земја, сите слободоумни граѓани, почитувачи на правната држава, на слободата, и демократијата, ги повикуваме да ни се приклучат“, одговори Заев.

На новинарската констатација дека со споемантата одлука на Иванов, „веќе се укина“ и Специјалното јавно обвинителство, поради тоашто осомничените се амнестираат Заев рече дека „Штом ќе бидат слободни и независни институциите повторно во државата, актите за помилување на Ѓорге Иванов ќе бидат ставени вон сила. Затоа што законот за помилување е нефункционален, сите одредби се укинати од Уставниот Суд. Старите одредби од законот не се оживеани, затоа нема законска можност Ѓорги Иванов да аболицира, помилува или слично. Ги повикувам правниците да го дадат конкретното јасно толкување на оваа теза, оваа е на прва од нашите тимови. Оттука, секако СЈО стапува на сила мора да се одговара за криминалот на криминалците во оваа држава, и од тоа бегање, нема“.

„За да нема дилема, ќе појаснам. Ниту барав, ниту прифаќам амнестија. Не сме сите исти, и не сме сите криминалци. Јас сум невин и својата невиност ќе ја докажам на Суд, низ соодветна процедура. Не сакам воопшто да бидам аболициран, ниту помилуван, не ја прифаќам оваа одлука. Не дозволувам да бидам ставен во ист кош со вистинските криминалци во власта. Ги повикувам сите коишто се невини, а политички обвинети, да побараат повлекување на оваа срамна одлука од Иванов. Истовремено апелирам и потенцирам, луѓето по затвори, се помалку луѓе од политичарите? Човекот што украл 100 кебапчиња е во затвор, а криминалците сакаат да бидат ослободени? Тоа нема да го дозволиме. Ве повикувам, граѓани, тоа да не го дозволиме, не смееме тоа да го дозволиме. И на крајот, процесот „Титаник“ е отворен доказ за нелегитимноста на Ѓорге Иванов. Тој има судир на интереси, тој не може да помилува, затоа што директно и неговиот избор е доведен во прашање, од каде ја црпе можноста да помилува од непостоечки закон со уништени одредби. Отварам комплетно секаква можност оваа одлука да не биде функционална. Доколку некој се обидува да биде финкционална, секако дека ќе ги искористиме сите елементи тоа да го спречиме. Прво да даде оставка, ако не даде оставка да побараме импичмент, да побараме да биде разрешен од Парламентот. Оваа карикатура соопштение од ВМРО ДПМНЕ, што го пуштија е навистина карикатура соопштение. Ако навистина стојат зад тоа соопштение ги повикувам да дојдат на Собранието и да ја поддржат нашата иницијатива, за разрешување на Ѓорге Иванов, ако се искрени во својата намера. Да ја сочуваме правдата и правната држава во Република Македонија“, реке Заев./крај/мф/сн

Извор: Макфакс