Македонија
Полкот за специјални операции демонстрираше врвна обученост на вежба на Криволак

Демонстрирање на врвна обученост, и подготвеност да делуваат за многу кратко време во било какви сложени услови се дел од активностите кои припадниците на полкот за специјални операции (пСО) денес ги покажаа на Армискиот полигон Криволак.
Популарните „волци“ и „ренџери“ изведуваа наменски задачи со експлозивни средства за уништување на препреки, реакција на контакт со употреба на боева муниција од оклопен транспортер во движење.
Денешната вежба е дел од редовните плански активности која ги изведува оваа елитна единица на АРМ во теренски услови. Одличната извежбаност единиците за специјална намена ја покажаа на дело и на најголемите меѓународни воени вежби кои се реализираа оваа година каква што беше „Анаконда 16“.
Во исто време на АП Криволак и Центарот за обука во Пепелиште под раководство на инструктори од пСО, се одржува селективен курс на новопримените професионални војници кои се кандидати за прием на во оваа елитна единица. Привлечноста на оваа единица која се карактеризира со голема самоиздржливост, секогаш пројавува голем интерес меѓу младата популација.
Селекцијата е со цел да се изврши квалитетен, стручен и правилен избор на кандидати за вршење на должности во специјалните единици на АРМ. Притоа инструкторите вршат постојано следење на особините и карактеристиките на кандидатите како : тимска работа, дисциплина, лојалност, прилагодливост и психичка и физичка издржливост во секакви теренски и временски услови.
По завршувањето на овој напорен курс по справувањето со сите физички и психички препреки само мал број на најупорни, најспособни и најмотивирани кандидати успеваат да ја понесат препознатливата зелена беретка.
Началникот на генералштабот на АРМ генерал потполковник Методија Величковски кој присуствуваше на денешните активности беше информиран од страна на командантот на единицата, полковник Орце Јордев за методите и постапките кои се користат во обучувањето за справување со безбедносни предизвици во најсложени ситуации. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Актуелната власт го заборави Делчево само затоа што градоначалникот е од друга партија

Претседателот на СДСМ Венко Филипче заедно со градоначалникот на Делчево Горан Трајковски денеска ги посети капиталните проекти во градот. Салата АСНОМ, прочистителната станица, новиот пазар и новата градинка со капацитет за околу 150 дечиња.
„Станува збор за капитални проекти коишто беа навистина потребни и коишто сериозно го олеснуваат животот на граѓаните во Делчево.
Филипче оценува дека овие проекти не се само инфраструктура, туку се вложување во подобар живот за сите граѓани, проекти кои го менуваат животот на граѓаните на подобро. За жал, денеска Делчево не само што нема капитални проекти туку истото е целосно заборавено а тоа најмногу се одразува на граѓаните и тоа само затоа што градоначалникот не е од истата партија.
„Еве сега гледаме што значи да се нема поддршка од влада. Од оваа актуелна влада практично Делчево е заборавено и целосно е маргинализирано. Жалам што прават таква политичка сегрегација врз основа на тоа кој градоначалник од која партија е, тоа граѓаните навистина не го заслужуваат“, потенцираше Филипче.
Македонија
Во среда авионско прскање против комарци во Скопје

од Центарот за управување со кризи известуваат дека во Град Скопје во среда ќе се реализира авионско прскање против комарци.
„Авионската дезинсекција на подрачјето на градот Скопје, против ларви од комарци, ќе се реализира на 11.06.2025 година (среда), во раните утрински часови.
Доколку временските услови не го дозволуваат вршењето на дезинсекцијата, истата ќе се изврши првиот нареден ден, кога временските услови ќе бидат поволни, во истите термини“, велат од ЦУК.
Се известуваат пчеларите навремено да ги преземат потребните мерки за заштита на пчелите.
Македонија
(Видео) Тренчевска: Хаосот во здравството не може да го среди министер информатичар

Владата, наместо да гради систем што треба да се грижи за здравјето на граѓаните, создава систем што го става во ризик животот на луѓето, систем кој убива. И овој хаос треба да го среди новиот министер за здравство – Азир Алиу, кој е професионалец во информатиката, но не и во здравството.
Хаосот во здравството не може да го среди министер информатичар. Алиу нема никакво претходно искуство во здравството, и додека да се запознае со областа во која влегува, најверојатно и него ќе го сменат или сам ќе си отиде. И повторно нема да е криво ВМРО-ДПМНЕ, туку ќе бидат криви коалиционите партнери затоа што дале такви кандидати, рече пратеничката на СДСМ, Јована Тренчевска, на денешната собраниска седница.
Тренчевска се осврна на, како што рече, сите пропусти на оваа влада, потсетувајќи и на вчерашната прослава, 34 години од постоењето на Унијата на млади сили на ДПМНЕ, со скандалозно шоу од пиротехнички средства, на неполни три месеци од пожарот во Кочани.
„Како паметот да не им доаѓа, или намерата беше да се испрати јасна порака дека сè им е дозволено. Цехот ќе си го носат родителите, сестрите, браќата, фамилијата, роднините, пријателите, граѓаните, а тие ќе си тераат како сакаат и ќе отвораат телефонски линии за да покажат некаква божемски грижа. Од финансиската поддршка, ништо не обезбедија. Обезбедија граѓаните и компаниите со донации, а на ДПМНЕ им остана фалбата и лажниот ПР, рече Тренчевска.
Таа потсети дека имаме влада која, заради својата неспособност, се соочи со најголемата трагедија во историјата на независна Македонија – кочанската трагедија, каде што згаснаа 62 млади животи, а 200 се повредени.
Влада која не знае како да се справи со здравствените предизвици. Токму во контекст на оваа трагедија, таа, додаде Тренчевска, не прифаќа понудени законски решенија од опозицијата, со кои се нуди вистинска и реална поддршка и помош, потенцираше Тренчевска.
Таа потенцираше дека во моментов ја имаме најнеспособната влада од осамостојувањето на Македонија до денес, која го донесе здравството до степен на „тежок пациент“ на кој му нема спас.
„Секој сектор од здравството е метастазиран од неспособноста и негрижата на власта, а граѓаните го плаќаат цехот со сопственото здравје“.