„Со длабоко жалење се собравме денес да се поздравиме и да му оддадеме почит на Слободан Чашуле – поранешен министер за надворешни работи  и амбасадор на Македонија. Иако почина како Амбасадор на Република Македонија во Кралството Шпанија, за него важи и пошироката смисла на зборот “Амбасадор” – некој кој ги брани и застапува интересите на државата и татковината, независно од функции и титули што ги имал во животот“, истакна Попоски на комеморацијата за поранешниот македонски дипломат Слободан Чашуле.

„Токму затоа, Слободан Чашуле е амбасадор на Република Македонија уште пред да постои независна Република Македонија: како дописник за Танјуг во Латинска Америка, како главен уредник на Танјуг во Македонија; како прв и во тоа време единствен дописник на Associated Press во Македонија; како еден од основачите на ТВ Скопје; како и како директор на „Нова Македонија“ и главен уредник на неделникот „Форум.“ Може лесно да се види од сите овие одговорни места дека, колку што беше амбасадор на Македонија во светот, тој беше и амбасадор на светот во Македонија.  Со силна демократска насоченост, во секое негово дејствије можеше да се почуствува моќта на објективноста и рационалноста, обвиена во убав збор“, рече Попоски во своето обраќање.

„Секогаш присутен во јавниот живот, тој влезе во политиката и беше домаќин токму на овој дом како министер за надворешни работи во тежок период после конфликтот во 2001. Беше во тоа време луциден говорник и бранител на македонските интереси надвор.  Министерот Чашуле остави траен белег при изградбата на младата македонска дипломатија. Исто така продолжи и како пратеник во македонското Собрание. Чашуле беше голем македонски патриот. Ја сакаше својата земја и сакаше таа да успее и да се етаблира во глобалното семејство на народи како горд и конструктивен чинител. Тој градеше мостови со други земји, што може да се препознае и во ордените изложени тука денес: Витешки крст на орденот за заслуги на Република Полска; како и највисокото признание кое го доделува Шпанија на странски државјани, Орденот на Изабела Католика“, рече македонскиот министер.

„Таткото на Слободан, Коле Чашуле има кажано на неколку наврати дека, “да се пишува на македонски е да се војува (за Македонија).” Одтаму, сигурно, Слободан Чашуле беше моќен воин: елоквентен, луциден, разорен.  Особено со новинарското перо. Слободан Чашуле – министер, новинар, публицист, политичар, дипломат, полиглот (зборуваше добро пет јазици) и обичен човек, — често во текот на неговиот живот беше  мотив за другите внимателно да го послушаат, да ја прочитаат неговата колумна или коментар, да го следат неговиот јавен настап. Едноставно, со својот молскавичен интелект, знаење и човечки квалитети, проткаени со љубов кон семејството, пријателите, колегите и татковината, восхитуваше многу луѓе, кои токму во неговите секојдневни дела и зборови ги наоѓаа мотивите за нивните постапки. Ќе ни недостасува и ќе и недостасува на Македонија“, порача шефот на дипломатијата./крај/мф/бс

Извор: Макфакс