Македонија
Потпишан документот „Обврска сега за денот потоа“

Претставници на дел од партиите учеснички на предвремените парламентарни избори до декември, потпишаа документ, заложба за вклучување на повеќе граѓански барања за подобрување на состојбите во повеќе сектори, процес кој беше поддржан од канцеларијата на фондацијата Фридрих Еберт во Македонија и се нарекува „Денот потоа“.
„Станува збор за еден документ во којшто се содржани сите сегменти од општеството за којшто граѓанските организации и граѓанството во целина ќе бара натаму заложби од партиите, по изборите. Партиите треба и декларативно, но и да потпишат дека ќе се заложат за она што ние сме го констатирале во документот и дека ќе го спроведат препораките коишто се содржани во секое поглавје“, рече Уранија Пировска од Хелсиншкиот комитет, кој работеше на делот на правосудство, ЛГБТ права и темелни права и демократија, каде спаѓаат фундаменталните права, правото на здружување, слободата на изразување, казнено-поправни установи, но и ранливи групи.
Таа рече дека со години работата е иста, на пример, во затвори, притвори со години наназад се нотираат истите состојби, а Македонија назадува кога станува збор за темелните права.
„Некои права што сме мислеле дека се освоена територија фактички поради нефункционалноста на системот мораме повторно да ги усвојуваме. Имаме препораки за законот за приватност да се спроведе во согласност со препораките на Венецијанската комисија. Тоа се препораки кои веќе биле доставувани до државата, биле објавувани од Хелсиншкиот комитет години наназад и истите може да се најдат во Извештајот на Европската комисија за напредокот на Македонија. Бараме цврсто заложување дека тие препораки ќе бидат имплементирани“, вели Пировска.
„Беа направени барања за итни заложби и во делот на животна средина и во делот на одржлив енергетски систем. Демократизацијата на животната средина, транспарентност во трошењето на јавните пари. Во однос на зелениот енергетски систем заложби за декарбонизација, за децентрализација на енергенсткиот систем, за декарбонизација на транспортниот систем и секако за намалување на енергетската сиромаштија за либерализирање на енергетскиот пазар“, рече Невена Смилевска од Центар за истражување и информирање за животна средна Еко-сист.
Документот го потпишаа Радмила Шекеринска од СДСМ, Павле Трајанов од Демократски сојуз, Стојанче Ангелов од Достоинство, Лилјана Поповска од ДОМ и Андреј Јованчевски од Левица, но изостанаа претставници на партиите кои се дел од владејачката коалиција./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.
Македонија
Мицкоски ја доби тужбата против Славјанка Петровска за клевета

Граѓанскиот суд во Скопје донел правосилна пресуда во корист на премиерот Христијан Мицкоски, утврдувајќи дека пратеничката од СДСМ и поранешна министерка за одбрана, Славјанка Петровска, јавно ширела невистини и клевети против него.
Како што информира премиерот преку објава на социјалните мрежи, судот ѝ наложил на Петровска не само да се извини, туку и да ја објави пресудата во медиумите.
„Ова е уште една потврда дека на лагата ѝ се кратки нозете. Судот потврди дека поранешната министерка и актуелна пратеничка ширела лаги и клевети против мене. Вистината мора да излезе на виделина“, напиша Мицкоски.
Тој ја искористи приликава и за поширока критика на политичката култура на неговите опоненти.
„Очигледно, лажењето како синдром на политичката култура на СДСМ не престанува да биде нивен заштитен знак. Со оваа пресуда се потврдува не само дека лажат, туку и дека не се промениле. Продолжуваат да го потценуваат народот“, порача премиерот.
Според Мицкоски, оваа судска победа не е лична, туку борба за вистината и достоинството на секој човек кој се спротивставува на политичките манипулации.
„Ова не е моја лична битка, ова е битка за принципи, за вистината, за достоинството на секој поединец кој не дозволува неказнето да му се лепат лаги“, стои во неговата објава.
Тој додава дека продолжува да работи со посветеност и дека „лагите ќе паднат, а вистината победува“.
Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.