СВР Тетово во понеделникот вечерта потврди дека во населбата Мала Речица од Речишка река во двор од приватна куќа било исфрлено тело на малолетно дете со видливи повреди во пределот на главата, а неофицијално во селото Шипковица има уште три смртно настрадани и повеќе повредени, како последица на големото невреме што го зафати овој регион во вечерните часови.

Според извештаите од подрачното одделение на Дирекцијата за заштита и спасување од Тетово, во вечерните часови регионот беше зафатен од големо невреме, а поројниот дожд и силниот ветер предизвикаа застој во сообраќајот во дел од овој регион.

Локалните медиуми пренесуваат дека водата постепено се повлекува во коритото на претходно излеаната река Пена, откако според извештајот на ДСЗ состојбата со невремето по 20.30 часот се стабилизира, а дел од исчезнатите се пронајдени. По повлекувањето на водат останати се наноси од кал и дрва. Дирекцијата апелира граѓаните од регионот да го намалат движењето, освен во неопходни случаи, за да се овозможи непречена работа на механизацијата излезена на теренот.

Поради излевањето на реката во селото Допбреште по силните врнежи, во прекин е сообраќајот во двата правци на регионалниот пат Тетово – Јажинце, како и на патниот правец Тетово – Попова Шапка поради одрони и камења на патот.

Најкритично е во Мала и Голема Речица, Доброште, Шипковица. Без струја се селата Жеровјане и Порој.

АМСМ препорачува внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Демир Капија – Удово, Кочани – Делчево, Виница – Берово, каде е можна почеста појава на одрони./крај/мф

Извор: Макфакс