Македонија
Пратениците ги изгласаa измените на Законот за азил

Пратениците во Собранието во четвртокот ги изгласаа измените на Законот за азил и привремена заштита на мигрантие, во кој меѓу другото е предвидено и регуларен престој на мигрантите од 72 часа, по што ќе мораат да ја напуштат земјата или да поднесат барање за азил
Владата на седница во понеделникот вечерта ги усвои измените на Законот за азил и привремена заштита и по итна постапка ќе одат на расправа во Собранието. Со измените на Законот, секој мигрант што ќе ја мине границата ќе добие потврда дека во земјава може да остане најмногу 72 часа, по што ќе мора да ја напушти Македонија или да побара азил. Ќе можат легално да платат превоз и други услуги.
Со Законот се предвидува странецот на граничен премин или во внатрешноста на земјата да може усно или писмено пред овластен полициски службеник да искаже намера за поднесување барање за признавање на правото на азил по што полицискиот службеник ќе треба да изврши евиденција на странецот, да го информира и да го упати дека во рок од 72 часа може да го поднесе барањето за признавање на правото за азил пред надлежните органи.
Владата донесе одлука да се формира работна група од министрите за надворешни работи, за здравство, за полиција, локална самоуправа и социјала којашто ќе ги следи состојбите со мигрантите и ќе презема мерки и чекори во согласност со своите надлежности.
Граѓанските организации, исто така, во понеделник попладне побараа подобри услови за мигрантите сместени во Центарот за азил, а народниот правобранител, Иџет Мемети кој ги посети, констатираше дека живеат во нечовечки услови. Десетици мигранти загинаа на пругите низ Македонија, бидејќи досега јавниот превоз за нив не беше легален, па одеа пешки по пругите.
Министерот за внатрешни работи Митко Чавков, образложувајќи го законот, истакна дека измените на законот се прават поради зголемениот број мигранти кои транзитираат низ државата. Измените, додаде тој, ќе придонесат за поголема безбедност и намалување на ризиците на мигрантите, а МВР ќе добие посоодветна евиденција за лицата кои влегуваат во државата.
„Само во последниве неколку недели на преку 25 илјади лица кои биле забележани во близина на нашата територија им било укажано да се вратат, односно да останат на грчка територија од каде и се обидувале нелегално да влезат во земјава. Голем број мигранти успеваат да ги одбегнат патролите, но затоа фрапантно е зголемувањето на бројот на илегални мигранти во внатрешноста на земјата“ рече Чавков.
Додаде дека во првите пет месеци од 2015 година во споредба со истиот период минатата година се откриени најмалку трипати повеќе илегални мигранти, а предвидувањата се дека овој тренд на зголемување ќе продолжи. Паралелно со ова, расте и бројот лица кои треба да се сместат во прифатните центри и за кои само за првите пет месеци од годинава се потрошени околу седум милиони денари од буџетот на Министерството за внатрешни работи, прецизираше министерот.
„Сево ова укажува на сериозноста на ситуацијата и проблемот со којшто се соочуваме. Факт е дека проблемот не е со потекло од Република Македонија. Проблемот кај нас, за жал, е пренесен од нашиот јужен сосед“, укажа Чавков.
Во расправата што следуваше, пратеникот на владејачката ВМРО-ДПМНЕ, Сашо Василевски, ја поздрави инцијативата на Владата за измените во Законот за азил затоа што станува збор за „сериозна хуманитарна криза, која не е само регионален туку и глобален проблем“.
Пратеникот Павле Трајанов од Демократскиот сојуз, пак, истакна дека „е добро што Македонија обезбедува услови“ да се прифатат мигрантите и што им се нуди простор од три дена да се одлучат дали ќе побараат азил или ќе ја напуштат држават. „На овој начин ќе се избегне хуманитарен проблем, но, вели, треба да се има предвид безбедносниот аспект на оваа хуманитарна катастрофа за која решенија бараат и ЕУ како и идруги земји“, рече Трајанов и предупреди дека, сепак, е потребна претпазливост
Според независната пратеничка Солза Грчева, којашто застапува опозициски ставови, законот претставува „прв чекор кон подобрување“ на состојбата со мигрантите, но дека „тоа не е доволно“. Добро е, рече Грчева, што ќе се контролира кој влегува во државата. Имајќи ја предвид состојбата во Прифатниот центар во Гази Баба, побара тој да биде затворен и да се отворат други прифатни центри. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
И без документи, оние што се сомневаат дека биле непотребно оперирани нека поднесат претставка, повика Клековски

Сите што се сомневаат дека биле непотребно оперирани по скандалот дека се правеле операции на срце само за да се извлечат пари, треба да пријават. Директорот на Фондот за здравствено осигурување, Сашо Клековски, вели дека и по објавата на скандалот, кај нив нема претставки за непотребни операции.
„До средата немаше ниедна пријава или претставка за евентуална непотребна операција. Ги повикуваме сите пациенти што се сомневаат, без разлика дали имаат документи или не, да поднесат претставки. Документите за операциите се чуваат во архивите на болниците“, повика директорот Клековски.
Скандалот со наводно непотребни кардиохируршки интервенции во приватни болници во Скопје го обелодени кардиологот Сашко Кедев, кој јавно обвини дека кај пациенти без медицинска потреба се вршеле операции на срце, исклучиво поради финансиски интерес.
Сомневањата ги насочи кон приватните клиники „Жан Митрев“ и „Аџибадем Систина“, кои ги отфрлија тврдењата и рекоа дека работат според утврдени медицински протоколи и дека секоја интервенција е документирана и оправдана. Клиниките посочија дека се отворени за соработка со надзорните тела и ги поддржуваат сите иницијативи за транспарентност и контрола.
По наводите за непотребни операции, Министерството за здравство формира две комисии за расчистување на случајот. Едната е интерна, составена од лекари, претставници од Фондот, правници и економисти, која има задача да ги анализира сите кардиолошки и кардиохируршки операции во земјата во периодот од јануари 2023 година со август 2025 година. Втората комисија е меѓународна, составена од тројца лекари, кои ќе извршат надзор и во приватните и во јавните здравствени установи.
Македонија
Николоски: Започнуваме со реконструкција на обиколницата Крива Паланка, активно се работи и на граничниот премин

Имаме рекордни инвестиции во инфраструктурата во Крива Паланка и регионот. Само преку Владата, преку двата јавни повици инвестираме преку 200 милиони денари за проекти, а денеска започнуваме и со рехабилитација на обиколница Крива Паланка, истакна при денешната посета, вицепремиерот и министер за транспорт, Александар Николоски.
Николоски, заедно со премиерот Христијан Мицкоски и директорот на ЈП за државни патишта Коце Трајановски, извршија увид во рехабилитацијата на овој патен правец како дел од Коридор 8.
Проектот се реализира преку ЈП за државни патишта, а инвестицијата е преку 65,5 милиони денари. Во продолжение интегралната изјава на вицепремиерoт Николоски:
„Денеска започнувме со рехабилитација на обиколница Крива Паланка. Тоа е логичен сплет на големиот проект кој што беше пуштен во јануари оваа година, а тоа е експресниот пат од Страцин до Крива Паланка, експресен пат кој што веќе го менува животот за овој дел од Македонија. Веќе со едно пријатно возење се стигнува од Скопје до Крива Паланка. Со рехабилитацијата на обиколницата, оние кои што патуваат кон Софија, Бугарија исто така побрзо и побезбедно ќе може да патуваат. Во таа насока би сакал да спомнам дека активно се работи на реконструкција и на Граничниот премин, активност која што ја започнавме минатата година и активност која има добра динамика и која очекувам да биде завршена набрзо и да има поголем проток на границата.
Преку Владата преку два повици еден оваа година, еден минатата година, Владата инвестира вкупно 200 милиони денари во проекти во општина Крива Паланка, што е еден историски рекорд и нешто што никогаш не е направено за овој крај и оваа општина. Секако тука се и другите општини, Ранковце и Куманово и сите кои гравитираат кон овој регион. Ќе продолжиме да работиме во периoдот кој е пред нас и да имаме други успеси”, изјави вНиколоски.
Македонија
Герасимовски: Пристигнаа првите ученички униформи, во тек е дистрибуција до сите основни училишта во Центар

Општина Центар за прв пат обезбеди училишни униформи за сите ученици во општинските основни училишта. Првите униформи пристигнаа во ООУ „Киро Глигоров“, а во тек е нивна дистрибуција до сите основни училишта на територијата на Центар, соопштија од општината.
„Денеска започна дистрибуцијата на првите ученички униформи во основните училишта во Центар. Униформите се со одличен квалитет, со лого на општината и со име на секое училиште поединечно. Во понеделник, сите ученици ќе ги добијат униформите на првиот училишен ден, верувам дека тие ќе бидат среќни и горди што ќе ја носат оваа униформа“, изјави градоначалникот Горан Герасимовски.
Со оваа активност, како што е нагласено Општина Центар го подигнува квалитетот на основното образование, што вклучува и инвестиции во училишна инфраструктура, дигитализација и безбедност.