Јавноста повторно остана посиромашна за квалитетна дебата за дел од законските решенија во Собранието ако се земе во предвид фактот дека голем дел од точките од дневен ред на собраниските седници поминаа со мала и еднострана или без никаква дискусија, во март.

Ова се дел од наодите во осмиот извештај од мониторингот на квалитетот на дебатата во Собранието во периодот од 1 до 31 март 2015, што ја изработи Институт за демократија „Социетас Цивилис“ – Скопје (ИДСЦС).

Во публикацијата стои дека пратениците на набљудуваните седници во март најчесто ги образложувале своите позиции со по два и повеќе аргументи, а намален е процентот на образложенија со по еден аргумент. Во 17 отсто од дискусиите образложенијата се оценети како “слаби” односно без целосни аргументи.

Пратениците повторно останале во своите „ровови“. Забележани се само два случаи кога пратеници ја промениле позицијата, но без образложение од кои причини го прават тоа. Не е забележан случај пратеник да ја промени позицијата поради поквалитетни аргументи изнесени во расправата.

Опозицијата, претставена од само десет пратеници, го намали уделот во дискусиите од 29 отсто во февруари на 16  отсто во март што е втор најнизок удел од почетокот на мониторингот. Бројот на дискусии од страна на пратениците жени во март бележи пад за разлика од февруари. На пратениците жени во март отпаѓаат 48 отсто од сите набљудувани дискусии, споредбено со 57 отсто во февруари.

Пратениците најмногу дискутирале околу пратеничките прашања, предлогот на Закон за водостопанство, предлогот на Закон за изменување и дополнување на законот за пријавување на живеалиштето и престојувалиштето на граѓаните и за предлог Законот за издавање на вредносни бонови- ваучери.

„Голем дел од точките од дневниот ред поминаа со мала и еднострана или без никаква дискусија. Со сето ова заклучокот е дека јавноста повторно остана посиромашна за квалитетна дебата за дел од законските решенија“, ова се дел од наодите во осмиот извештај од мониторингот на квалитетот на дебатата во Собранието во периодот од 1 до 31 март 2015.

Оваа публикација е изготвена со помош на Европската Унија. Содржината на публикацијата е единствена одговорност на Институт за демократија „Социетас Цивилис“ – Скопје (ИДСЦС) и на никаков начин не може да се смета дека ги одразува гледиштата на Европската Унија./крај/со/бб