Македонија
Пратеничка во Бундестагот: Косово ја преплави со терор и Македонија
Пратеничката со турско потекло од германската левица Die Linke, Севим Дагделен, членка на Комисијата за надворешна политика на германскиот сојузен парламент предизвика жестоки реакции од говорницата во германскиот Бундестаг, кога ја обвини германската влада дека во нејзино присуство со Косово управуваат членови на терористичка организација којашто со терор ја преплави и соседната земја Македонија.
Дагделен изнесе сериозни обвинувања на сметка на владата во Приштина, која според неа, била составена од поранешни припадници на „терористичката организација“ Ослободителна војска на Косово (ОВК – УЧК) „во сенка на германските тенкови“ на Косово. Таа во своето обраќање на 19-ти јуни на седницата на германскиот парламент рекла дека иако Германците во состав на КФОР се присутни на Косово веќе 16 години, не е остварена ниедна од целите, Косово да стане стабилно, мултиетничко и демократско општество.Потсетила дека поранешните припадниците на ОВК, кои учествуваа во терористичкиот напад неодамна во Куманово, на Косово беа погребани како херои во присуство на високи функционери. Според неа, Косово е местото од каде најмногу од Европа, заминуваат најмногу борци кои се борат на страната на Исламската држава, во Ирак и Сирија, и тоа „пред носот“ на НАТО и „војската која ја испративме таму“.„Мислам дека Германија не може да продолжи со поддршка на големоалбанскиот национализам којшто го промовира ОВК и терористичките центри како Косово кои носат насилство не само во регионот, туку и на Блискиот исток“, изјавила пратеничката.Таа нагласила дека во изминативе неколку години Косово го напуштиле стотици илјади Срби и Роми и поради тоа демографската рамнотежата била потполно уништена. „Политиката на Германија никогаш не била неутрална. Не ни се потребни германски војници на Балканот коишто ќе поддржуваат една или друга страна и ќе застанат зад кршењето на меѓународното право. Нам ни треба враќање на меѓународното право, бидејќи само тоа може да биде основа за мирен соживот во Европа. Ова е чисто лицемерие“, рекла пратеничката.Таа на крајот порачала дека клучот за траен мир во Европа е политика без двојни стандарди. Дагделен се заложила за тоа Германија да се врати на мирољубивата надворешна политика како Велика Британија и никогаш веќе, нејзините војници да не го напуштаат германската територија./крај/мф/ффс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ахмети од протестот на плоштадот „Скендербег“: Процесот во Хаг треба да заврши со ослободителна пресуда
Лидерот на ДУИ, Али Ахмети, денеска се обрати на протестот што се одржа на плоштадот „Скендербег“ во Скопје, организиран во знак на поддршка за поранешните команданти на Ослободителната војска на Косово (ОВК), на кои им се суди во Хаг за воени злосторства.
Ахмети порача дека судскиот процес треба да заврши со ослободителна пресуда, оценувајќи дека обвинетите се соочуваат со обвинувања за дела кои, како што рече, не ги сториле.
Тој нагласи дека ОВК не била насочена против ниту еден народ, туку дека се борела за слободата на албанскиот народ.
„Време е нашите синови да се вратат дома. Нашите синови се невини, нашата борба е чиста. Војната на ОВК е света и затоа сите ние, големи и мали, мажи и жени, сме ОВК“, рече Ахмети .
Лидерот на ДУИ оцени дека, по Тирана и Приштина, и Скопје го покажало својот став со поддршката за, како што наведе, слобода и правда за поранешните припадници на ОВК.
Меѓу обвинетите во Хаг се поранешниот косовски премиер Хашим Тачи и поранешниот косовски претседател Јакуп Красниќи.
Македонија
Затворен сообраќајот на граничниот премин Евзони
Од 11:00 часот граничниот премин Евзони (ГП Богородица) е затворен за сообраќај, соопшти АМСМ.
Сообраќајот на државните патишта се одвива непречено, по претежно суви коловози.
Од 15.11.2025 година започна законската обврска за задолжително поседување на зимска опрема во возилата, без оглед на моменталната временска состојба. Оваа обврска ќе трае до 15.03.2026 година.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
За првпат во Македонија е изведена хируршка интервенција кај дете со ретка конгенитална деформација
На Универзитетската клиника за трауматологија, ортопедски болести, анестезија, реанимација, интензивно лекување и ургентен центар (ТОАРИЛУЦ) за прв пат во Македонија е изведена комплексна хируршка интервенција кај 4-годишно дете со редок конгенитален Спренгелов деформитет (Sprengel deformity), во соработка со проф. д-р Уфук Ајдинли од Република Турција.
Интервенцијата претставува значаен чекор во јакнење на капацитетите на македонскиот здравствен систем за третман на ретки и сложени ортопедски состојби во детската возраст, преку тимска работа, пренос на знаење и примена на современи оперативни техники.
„Оваа интервенција е резултат на врвна мултидисциплинарна координација – ортопедски тим, анестезија, интензивна нега и ургентна поддршка – со јасен фокус на сигурноста и квалитетот на самата постапка. Благодарение на соработката со проф. д-р Уфук Ајдинли, направивме значаен исчекор во третманот на ретки конгенитални деформации кај деца. Нашата цел е овој тип процедури да станат стандарден дел од клиничката пракса во земјата, со континуирана едукација и развој на домашните тимови,“ вели директорот на ТОАРИЛУЦ, проф. д-р Игор Мерџаноски.
Според министерот за здравство, Азир Алиу градењето доверба во здравствениот систем се прави со ваков вид на резултати, со знаење, со тимска работа и со создавање услови најсложените интервенции да се изведуваат во државата.
„Ова е пример како меѓународната соработка, размената на експертиза и знаење директно се претвораат во подобра грижа за пациентите. Министерството ќе продолжи да ја поддржува модернизацијата на клиниките, развојот на човечките ресурси и воведувањето современи медицински методи, со цел граѓаните да добијат модерен, функционален и одржлив здравствен систем“, вели министерот Алиу.
Спренгеловиот деформитет е ретка конгенитална состојба при која лопатката е поставена ненормално високо и е недоволно развиена поради неуспешна надолна миграција за време на ембрионалниот развој. Ова најчесто предизвикува видлива „испакнатина“ и ограничување на движењето на рамото. Состојбата неретко е поврзана и со други придружни наоди, како синдромот Клипел-Фил, сколиоза, а понекогаш и дополнителна коскена/влакнеста врска со ’рбетот (омовертебрална лента), поради што за прецизна дијагностика и планирање се користат снимања како КТ и/или МРИ. Оперативниот третман најчесто се резервира за потешки случаи во возраст од 3 до 8 години, со цел подобрување на функцијата и изгледот.

