Работната група од претставниците на четирите најголеми политички партии во земјава, во четврток, во 14.30 часот, повторно ќе се состане, за да ги продолжи преговорите за медиумите, но и за Правилникот за методологија за водење и ажурирање на Избирачкиот список.

Исто така, на дневен ред на работните групи за спроведување на договореното во Пржино е и и Правилникот за методологија за целосен пристап, вршење промени и бришење на податоци во Избирачкиот список, како и постапка за спроведување теренски проверки заради ажурирање на истиот, соопшти европскиот посредник во преговорите Питер Ванхауте.„Средбите на политичката работна група ќе се одржуваат се додека не се постигне договор за погоре наведените теми“, се наведува во изјавата на Ванхауте испратена до медиумите.Овие преговори продолжуваат дури по три недели, кога заради празниците, а и заради ќорсокаккот во кој влегоа преговорите тие беа прекинати.Нема големи очекувања за постигнување решение на преговорите, а се очекува следните денови да зачестат преговорите.Од СДСМ брифираат дека ќе настојуваат прво да се  затвори прашањето за медиумите, пред да преминат на  Избирачкиот список или ќе инсистираат двете теми да се водат паралелно.Од ВМРО-ДПМНЕ, пак сметаат дека приоритет е утврдувањето методологија за водење на Избирачкиот список. ДИК ги чека предлозите од партиите за да почне со изборните активности , како услов за кредибилни избори. Загриженост за неисполнувањето на овбврските од Пржино, во делот на слободата на медиумите изразија и тројцата европратеници Иво Вајгл, Едуард Кукан и Ричард Ховит кои порачаа, партиите да не губат време за итно спроведување на реформите. Во петок пак се очекува доаѓањето на еврокомесарот Јоханес Хан, кој треба да го утврди спроведеното од договорот во Пржино и да ги забрза останатите обврски, меѓу кои и оставката на премиерот, и назначување техничка влада која би овозможила спроведување фер и демократски избори./крај/мф