Македонија
Музички парк се уредува во Прилеп

Во населбата Врбеско маало во Прилеп почна изградбата на музичкиот парк, инвестиција која ќе чини 1,2 милиони денари, а парите се обезбедени од буџетот на локалната самоуправа.
Овој парк се гради по барање на жителите од населбата. Целиот овој простор планирано е да биде уреден во знакот на музиката.
„Тука се ќе биде во стилот на музиката, од партерното уредување па се до урбаната опрема и елементите кои ќе асоцираат на музика. Исто така ќе има и еден мал подиум за одржување на концерти во текот на пролетниот и летниот период. Ова е еден многуте паркови кои се уредуваат на територија на општина Прилеп, а со оваа инвестиција ова место ќе стане поубаво и поатрактивно за сите, па може да се каже дека ќе биде и своевидна туристичка атракција“, рече Марјан Ристески, градоначалник на Прилеп.
Паркот ќе се простира на површина од 980 м2, од кои 400 м2 ќе бидат под бекатон плочки, а останатиот дел ќе биде зелена површина.
„Еден од најстарите паркови во Прилеп го преуредуваме, му даваме нов живот, и се ќе биде тука во стилот на музиката. Сите елементи од урбаната опрема, патеките, подиумот и малата сцена ќе асоцираат на музиката и се ќе биде знакот на музиката. Патеката ќе биде во форма на клавијатури, оградата ќе биде изведена во стилот на музиката, со нотни лини, со музички клучеви, ноти и слично. А дел од нашите скулптори, скулптурите кои ќе ги изработуваат на тема музика ќе ги изложуваат во овој парк“, истакна Бранко Нешкоски, раководител на ЈП за ПУП Прилеп.
Од локалната самоуправа најавија дека идната пролет ќе се започне и со реконструкција на паркот кој се наоѓа веднаш спроти Музичкиот парк, од другата страна на улицата „Александар Македонски“. Тој ќе биде уреден како детски забавен парк./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вицепремиерот Николоски во работна посета на високо ниво на Велика Британија

Потпретседателот на Владата и министер за транспорт Александар Николоски, од попладнево е во дводневна работна посета на Обединетото Кралство, каде ќе оствари работнa средбa со Герет Томас, министер за бизниси, извоз и услуги, средба со министерот за Европа, Стефан Доти, како и со Дејм Карен, специјален пратеник на премиерот на Велика Британија за Западен Балкан. Исто така предвидени се средби и со претставници од бизнис заедницата во Лондон.
Тема на работните средби е зацврстување на стратешката соработка меѓу Република Македонија и Обединетото Кралство.
Предвидено е на средбите да се разговара за економската и трговска соработка со посебен фокус на инвестиции во инфраструктурниот сектор.
Покрај економските теми, ќе се потврдат и добрите политички односи меѓу двете земји.
Обединетото Кралство е стратешки партнер на Република Македонија во НАТО Алијансата и земја на второ место со која остваруваме најголем обем на трговска размена.
Македонија
Левица: Љутков ги повикал сметководителите надвор од работно време да изготвуваат плата спротивно на Колективниот договор

По денешниот протест на вработените во културните установи, кои за велигденските празници останаа без плата, попладнево им била дадена насока на директорите од културните установи да ги повикаат повторно на работа сметководителите за да пресметаат плата, но по нова методологија која деновиве ја изготвило Министерството за култура заедно со Министерството за финансии, тврдат од партијата Левица.
Од таму додаваат дека новата методологија, како што велат од Синдикатот за култура, не е според Општиот колективен договор и Колективниот договор за култура. Според Левица, и натаму остануваат спорни 10% од Општиот колективен договор за кои немало јасни насоки како да се пресметуваат.
„Додека вработените во културата протестираа, Министерството изготви сосема нов начин на исплата на платите според кој спорните 10% од Општиот колективен договор треба да се пресметуваат на поинаков начин, но институциите не почнале да ја изготвуваат платата затоа што насоките биле нејасни, а воедно не биле ни потпишани од министерот за култура, Зоран Љутков“, велат од партијата.
Левица најостро ги осудува игрите со културните работници кои траат со години и му порачува на министерот за култура дека не треба да им се извинува на вработените во културата туку да постапи според законските одредби за усогласување на платата според Општиот колективен договор и Колективниот договор за култура.
Македонија
Времето утре претпладне сончево, попладне пороен дожд и грмежи

Времето утре претпладне ќе биде сончево со умерена облачност. Попладне променливо облачно, на повеќе места ќе биде нестабилно со пороен дожд и грмежи, локално во форма на невреме со пообилен пороен дожд, грмежи, засилен ветер и изолирана појава на град, информира УХРМ.
Минималната температура ќе биде во интервал од 6 до 11, а максималната ќе достигне од 19 до 26 степени.
Во Скопје, променливо облачно, попладне во делови од котлината ќе има развој на нестабилна облачност со пороен дожд, грмежи и засилен ветер. Минималната температура ќе се спушти до 9, а максималната ќе достигне до 26 степени.
Под влијание на влажна и нестабилна воздушна маса во текот на оваа седмица времето ќе биде променливо облачно и нестабилно со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.