Македонија
Реновирано основното музичко училиште во Прилеп

Зградата стара повеќе од 90 години, во која е сместено Основното музичко училиште во Прилеп „Ордан Михајлоски – Оцка“, е потполно реконструирана, па сега децата ќе учат да музицираат во пристојни простории.
Проектот чинеше три милиони денари, а парите се обезбедени од буџетот на локалната самоуправа. Ова училиште за прв пат се реконструира по 93 години од постоењето на објектот во кој што беше сместено.
„Проектот опфати комплетна промена на три нови плочи, комплетна реконструкција на скаличниот дел, промена на целата електрична инсталација и внатрешната столарија. Со овој проект се реши еден децениски проблем кој го имаа учениците и наставниците и се надевам дека во иднина ќе постигнуваме уште поголеми резултати. Во оваа прилика сакам да им се извинам и на сите родители и ученици што во овој период од два месеци наставата мораше да се изведува во други училишта и простории, но од денес продолжуваме со непречена и поквалитетна настава“, рече Игор Николоски, директор на основното музичко училиште.
Од локалната самоуправа истакнаа дека после овој капитален зафат наредните проекти ќе биле насочени кон набавување на нови инструменти за ова училиште.
„Музичкото училиште доби еден феноменален изглед и се создадоа одлични услови за работа како за наставниците така и за учениците. Ова музичко училиште има продуцирано голем број на музички кадри во Прилеп, Македонија, па и пошироко и се надевам дека со оваа реконструкција стимулот за учење ќе биде уште поголем кај учениците. Задоволството е уште поголемо затоа што ова е еден доста стар објект кој се заштити и доби сосема нов изглед“, изјави Марјан Ристески, градоначалник на Прилеп.
Претходно, за ова училиште беше набавено и концертно пијано, инвестиција која чинеше околу 1,2 милиони денари, а парите беа обезбедени со помош на локалната самоуправа и донатори. Ова основно музичко училиште го посетуваат 410 ученици./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се излеа Маркова Река кај Батинци

Маркова Река се излеа денес по обилните врнежи од дожд.
Во селото Батинци, водата е надојдена, излевајќи се на неколку места околу речното корито.
Ангажирана е механизација за санирање на штетата, а градоначалник на Студеничани, Азем Садики, објави дека забележана е материјална штета во дворовите од куќите кои се наоѓаат во близина на реката.
Засега, според градоначалникот, нема потреба од евакуација.
Фото: ТВ21/скриншот
Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.