Опозициската СДСМ ја напушти собраниската седница, во четврток, затоа што не сакаа да гласаат за предложените точки за именувања и разрешувања функционери на собраниската седница, предложени од Комисијата за избори и именувања.

„Предлогот на опозицијата за симнување на точките од дневниот ред кои се однесуваат за именување на функционери не помина. ВМРО-ДПМНЕ и ДУИ сакаат да продолжи да вдомува партиски војници пред изборите. Сите тие сами да си ги гласате. Соберете 62 гласа и гласајте. Од нас поддршка нема да добиете“, рече Горан Сугарески, координатор на СДСМ.Според Сугарески, со тоа што ВМРО-ДПМНЕ условува прифаќање на предлогот за распуштање на Собранието со донесување на буџетот, докажале дека бега од избори.„Сакате да избегате од избори. Предлогот на опозицијата е јасен, без никакви условувања. ВМРО-ДПМНЕ и ДУИ го лажат народот дека со недонесување на буџетот нема да има пензии, плати и друго“, рече Сугарески.Кординаторот на ВМРО-ДПМНЕ Илија Димовски во одговорот на обвинувањата на Сугарески рече дека ниту еден човек не верува во приказните на СДСМ дека ВМРО-ДПМНЕ бега од избори.„Две години ве молиме да излезете на избори. Измислувате сѐ и сешто, цензорски тела, само за да избегате од избори. Пратеничката група на ВМРО-ДПМНЕ, како и коалицијата веднаш после донесување на Буџетот ќе гласа за предлогот на опозицијата за распуштање на Парламентот и тргнуваме во избори“, рече Димовски.Кординаторот на ДУИ Талат Џафери рече дека ДУИ не учествува во ујдурмата што ја направија ВМРО-ДПМНЕ и СДСМ за додворување на гласачите.„И едни и други си правите сметка без крчмар. Потписници на договорот од Пржино се четирите партии. Нема право ниту СДСМ, ниту ВМРО-ДПМНЕ да ги лаже граѓаните“, рече Џафери. Тој додаде дека барањето на СДСМ за симнување од дневен ред на ратификациите на Договорот за основање на фонд за Западен Балкан, и за основање на регионална канцеларија за младинска соработка е само поради тоа што седиштето им е во Тирана.„Нека им го кажат ова на Едмонд Адеми и Мухамед Зекири, кои се членови на извршниот одбор на СДСМ. Им пративте јасна порака“, рече Џафери.Претходно координаторот на пратеничката група на СДСМ Горан Сугарески бараше тргање од дневен ред одлуките на Комисијата за избори и именувања и за избор на заменици на народниот правобранител, како и за ратификација на договорите за основање на Фонд за Западен Балкан и на Регионална канцеларија за младинска соработка./крај/мф/бб