Неколку стотици симпатизери на Социјалдемократскиот сојуз и на партиите од коалицијата „Можеме“ се собраа вечерва пред седиштето на СДСМ во центарот на Тетово за да ја прослават, како што велат, победата на парламентарните избори.

Десетина момчиња запалија факли стоејќи на средината на булеварот Илирија додека траеше неколкуминутен огномет, a симпатизерите славеа со знамиња и вклучени сирени на автомобилите.

Според првичните резултати што вечерва ги објави ДИК, во Тетово коалицијата „Можеме“ освоила 20,35 отсто од гласовите, а за коалицијата предводена од ВМРО-ДПМНЕ гласале 15,39 отсто од избирачите.

Коалицијата предводена од СДСМ, „Можеме“, води со освоени 36,79 отсто гласови пред коалицијата предводена од ВМРО-ДПМНЕ со 35,77 отсто. Во моментот пребројани се речиси 80 проценти од гласовите.

Според податоците објавени во седиштето на ДИК, за ДУИ гласале 10,29 отсто, АА – 8,12, Левицата – 4,17, Интегра – 1,39, ДПА – 1,32.

Другите партии и коалиции учесници на изборите имаат под 0,37 отсто.

СДСМ слави победа на парламентарните избори.

Градоначалникот на општина Центар, Саша Богдановиќ, на социјалните мрежи сподели видео од штабот во општината каде што се скандира „Победа“.

Според последните официјални податоци од ДИК, СДСМ е во водство пред ВМРО-ДПМНЕ со еден отсто разлика.