Македонија
Шилегов: Милошоски се подготвува да биде нотар

СДСМ очекува носителот на кандидатската листа на ВМРО-ДПМНЕ, Антонијо Милошоски, да биде нотар, а не пратеник, затоа што во време кога се подготвуваа избори, и откако тие се одржаа, надлежните институции утврдувале услови за нотарска канцеларија за Милошоски, во Скопје.
„Ова е официјален документ од Министерството за правда, според којшто министерот за правда само ден по изборите, формирал комисија за да изврши проверка на просториите и опремата во коишто ќе се смести новиот нотар, Антонио Милошоски. Од документот се гледа дека Министерството за правда побарало од Нотарската комора на Македонија увид во условите за работа на Милошоски како нотар уште пред изборите, на 7 декември“, рече Петре Шилегов, портпарол на СДСМ.
Според него, тоа значи дека Милошоски ќе се откаже од пратеничкаа функција, затоа што ниту нотар, ниту пратеник се некомпатибилни, се неспоиви со било која друга функција. „Очигледно е дека избрал да биде нотар, а лажел пред граѓаните дека ќе е носител на листа и пратеник“, вели Шилегов.
Прашан на што се однесуваат вчера поднесените приговори до ДИК; Шилегов рече дека
се однесуваат на неправилности во гласањето, на класични законски примери за поништување на гласање на избирачки места, со вишок ливчиња во избирачки кутии.
„Дел се во Тетово, дел се во општина Теарце и веројатно свесни дека ќе дојде до поништување на гласањето, паничните во ВМРО-ДПМНЕ ја имаа таа прес конференција и слушаме дека денес наводно ќе се собираат пред Државната изборна комисија, со цел да протестираат. Зошто протестираат навистина не знаеме“, рече Шилегов, кој додаде дека очекува гласањето на тие избирачки места каде што Социјалдемократскиот сојуз на Македонија поднесе приговори да биде повторено.
И денека, тој не ја исклучи можноста да добијат пратеник плус, а за идејата изборите да бидат повторени, тој смета дека треба да се почекаат конечните резултати, „овие избори сѐ уште не се завршени“./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Герасимовски: „Комунална хигиена“ оставиле контејнери на сред булевар, целиот смет околу контејнерите не го собрале

Градоначалникот Горан Герасимовски, заедно со општинските хигиеничари и синоќа го чистеа сметот од центарските улици кадешто надлежност има ЈП „Комунална хигиена“ и Град Скопје. Повторно, тој и хигиеничарите ја завршија работата на градската власт која очигледно има кренато раце од хигиената во градот, велат од општина Центар.
Герасимовски, истакнува дека дел од контејнерите вчера биле исчистени од ЈП „Комунална хигиена“, но целиот смет околу контејнерите е оставен на улица, а неколку контејнери дури и ги оставиле да стојат сред булеварот Митрополит Теодосиј Гологанов кадешто се движат возила.
„Повторно сме на терен. Нашите хигиеничари ја завршуваат работата на ЈП „Комунална хигиена“ на Град Скопје, денеска целиот град е хаос. Оваа локација нашите хигиеничари ја чистеле во утринските часови, но повторно е со смет. ЈП „Комунална хигиена“ ги исчистило дел од контејнерите, но сѐ околу контејнерите е оставено и мораме ние сами да завршуваме. Па, дури и дел од контејнерите коишто ги исчистиле ги оставиле сред булеварот Митрополит Теодосиј Гологанов. Попратно видовме и дел од контејнери коишто се превртени и оставени така со смет. Сево ова нема да го дозволиме, нашите хигиеничари ќе бидат на терен во неколку смени“, рече Герасимовски.
Тој, повторно упати апел до градската власт навремено да си ги завршува своите обврски, и најави дека општината продолжува со чистење и во текот на денешниот ден.
Македонија
Сончево и топло со мала до умерена облачност, максималната температура до 33 степени

Времето денеска ќе биде сончево и топло со мала до умерена облачност. Ќе дува слаб до умерен ветер од јужен правец. Минималната температура ќе биде во интервал од 7 до 14, а максималната ќе достигне од 28 до 33 степени.
Во Скопје, сончево и топло со мала до умерена облачност. Ќе дува слаб јужен ветер. Минималната температура ќе се спушти до 13, а максималната ќе достигне до 33 степени.
Времето во наредните денови
Во четврток попладне ќе има услови за изолирана појава на краткотраен дожд и ретки грмежи. Од петок под влијание на серија влажни воздушни маси времето ќе биде претежно облачно и посвежо со повремени врнежи од дожд кои локално ќе бидат обилни. Дневната температура значително ќе опадне, особено во деновите од викендот и почетокот на следната седмица.
Македонија
Граѓаните плаќаат за чиста средина, а не за депонии и ѓубришта: Митески најави кривична против ЈП „Комунална хигиена“доколку не реагира за отпадот

Комуналните служби на Општина Аеродром само денеска собраа над 10 тони отпад (50м3) кои завршија во „Дрисла“, соопшти в.д. градоначалникот на Општина Аеродром, Дејан Митески.
„Ова не е еднократна акција – ова е наша секојдневна работа. Нашите општински служби се на терен, додека Градското комунално претпријатие кое треба да ја изврши оваа работа, е неажурно и немо. Доста е“.
Граѓаните, додава тој, плаќаат за чиста и уредна средина, а не за депонии и ѓубришта. Напоменува дека никој нема право да го загрозува здравјето и иднината на децата.
„Од утре продолжуваме уште поинтензивно.
Ако нема веднаш реакција од ЈП „Комунална хигиена“, како градоначалник ќе поднесам кривична пријава за загрозување на животната средина согласно член 218 од Кривичниот законик, и секојдневно ќе барам постапување од Обвинителството и МВР“, објави Митески.
Ова, како што истакна, не е политика, туку прашање на достоинство, здравје и иднина.