Македонија
СЈО сѐ уште во УБК, утврдува кој и како прислушувал во Македонија

Обвинители и истражители од Специјалното јавно обвинителство сѐ уште се во Управата за безбедност и контраразузнавање речиси 24 часа за да обезбедат податоци за прислушувањата што се вршеле од 2008 до 2015 година и да утврдат дали прислушувала Управата за безбедност и контраразузнавање или странски служби.
Наскоро Специјалното јавно обвинителство ќе излезе на прес- конференција за да обелодени две нови истраги што ги отворило, но и да соопшти до каде е прибирањето на документацијата од УБК.Ноќеска еден час по полноќ, Специјалната јавна обвинителка, Катица Јанева изјави дека не наидуваат на соработка во Управата, дека не можат да ги обезбедат потребните податоци и нивната работа се опструира. Таа најави дека ќе останат во Управата сѐ додека не ги добијат доказите кои им се потребни. „Ние нема да си одиме сѐ додека не постапиме по судските наредби. Јас ќе бидам цела вечер тука сѐ додека можам да издржам“, изјави ноќеска Специјалната обвинителка Катица Јанева.Обвинителите велат дека УБК нема технички и човечки ресурси за да одговори на судската наредба, а од УБК, пак, велат дека не е можно да ги извадат тие податоци и да го прекинат системот за следење на комуникациите и дека може да го нарушат безбедносниот систем.„Со судска наредба по наше барање, бараме да ги обезбедиме сите податоци за броевите кои биле маркирани во УБК, а кои биле предмет на прислушување, за кои се сомневаме дека се наоѓаат во моменталните системи. Наша цел е да ги обезбедиме тие податоци, да видиме дали навистина тие податоци се таму и понатаму што можеме да утврдиме од тие податоци. Од досегашното постапување, УБК не само што не манифестираше волја, туку манифестирашe недостиг на технички и човечки капацитети. Не сакаме да инсинуириме кои се мотивите за тоа. Разочарани сме што државна институција нема ниту технички, ниту човечки ресурси да одговори на судска наредба за да може да пристапиме во системите за прислушување. Буквално тапкаме во место, немаме резултати. Товарот е на страна на УБК, тие треба да ги обезбедат условите за ние да ги обезбедиме доказите“, рече обвинителката Ленче Ристовска. Директорот на УБК, Владимир Атанасовски, пак, вели дека е убеден дека вработените во УБК соработуваат со обвинителите. „Со барањето се опфатени мерки за следење на комуникации во период од 2008ма до 2015 та, а проблем во системот и прекин на работата може да предизвика тоа што не може да се изделат следењата кои се почнати пред крајниот рок на барањето, а сѐ уште се активни“, рече Атанасовски.Освен Атанасовски во Управата цело време се и дополнителниот заменик министер, Оливер Андонов и директорот на Бирото за јавна безбедност, Митко Чавков кои обвинија дека специјалните јавни обвинители се нестручни и оти во УБК дошле неподготвени со што може да предизвикаат упад во системот за следење на комуникации во тековни активности.„Во периодот од 2008 до 31.12.2015 постојат актуелни посебни истражни мерки кои се спроведуваат во различни области на криминал, меѓу кои и тероризам. Навистина сакаат да создадат перцепција дека некој во УБК ги опструира, а од системот самите сфатија дека не може да ги извадат податоците, односно да направат експорт на податоци. Тој систем не е сопственост на МВР, на УБК, сопственост е на операторот и само овластено лице од него може да пристапи до тој систем. Се уверија во тоа и испратиле писмо до операторот за да добие овластување нивниот претставник во Македонија“, рече Чавков. Од СЈО поднеле барање некаде околу 20 часот до операторот, односно до „Ериксон“, за тие да дадат овластување на нивниот претставник во Македонија да оствари пристап до системот кој е во сопственост и администрирање на операторот.„Доколку тие обезбедат експерт, стручно лице кое што ќе може да ги извлече сите тие податоци и пак ќе повторам не „имиџи“, зошто Катица Јанева употребува термини кои што не и се познати, туку експорт на сите тие податоци кои што ги бараат, едноставно можноста ја имаат ако сега успеат да ги извадат, сега да ги извадат, но видоа дека не се подготвени и не е тоа едноставно да се реализира“, заклучи Чавков.Обвинителите на СЈО со судска наредба во вторникот околу 11 часот влегоа во УБК за да обезбедат податоци и да утврдат кој, каде и зошто прислушувал, но попладнето се пожалија дека нивната работа се опструира.Според опозициската СДСМ која објави јавно дел од прислушуваните разговори меѓу високи функционери на власта во Македонија прислушувала Управата заедно со власта, додека според владејачката ВМРО-ДПМНЕ во Македонија прислушувале странски служби со поддршка од опозицијата./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Собрани повеќе од 2 милиона евра за настраданите од пожарот во Кочани

Црвениот крст денеска соопшти дека на апелот за помош на повредените и за семејствата на настраданите од пожарот во дискотеката „Пулс“ во Кочани, што се случи на 16 март, а во кој загинаа 62 лица, а повеќе од 100 беа повредени, се собрани над два милиона евра.
„Во апелот на Црвениот крст на РСМ, заклучно со 17.4.2025 година, собрани се 128.011.651,00 денар за настраданите од пожарот во Кочани“, соопштија од таму.
Денес, Црвенот крст изврши трансфер на средства на 62 семејства на починатите лица. Досега на настраданите семејства вкупно се исплатени 86.100.000 денари.
Црвениот крст заедно со партнерите продолжува со испораката на психосоцијална и друга поддршка на населението.
Македонија
Димитровски: Неопходно е билатералните идентитетски и историски прашања да бидат надвор од преговарачкиот процес

Заменик-министерот за надворешни работи и надворешна трговија, Зоран Димитровски денеска во Софија учествуваше на форумот „ЕУ го среќава Балканот“, во организација на Атлантскиот клуб од Бугарија и АЛДЕ групацијата од Европскиот парламент.
Во дебатата со министри и заменици министри за надворешни работи или за Европа на земјите од Западен Балкан, Романија и Турција, заменик министерот Димитровски истакна дека Македонија е шампион во Европа според заштитата на етничките права и дека уставните измени за внесување на Бугарите во уставот сами за себе не претставуваат проблем.
„Она што предизвикува грижа е целиот пакет со преговарачката рамка вклучително и протоколите. Ако интегрирањето на Македонија во ЕУ зависи од резултатите од работата на заедничката македонско-бугарска Комисија за образовни и историски прашања, тогаш тоа може многу да се оддолжи. Ваквите меѓудржавни историски комисии по Втората светска војна, како помеѓу Германија и Франција или Германија и Полска може да работат повеќе децении додека дадат резултати. Неопходно е билатералните идентитетски и историски прашања да бидат надвор од преговарачкиот процес“, рече Димитровски.
На форумот свои обраќања имаа и потпретседателката на Бугарија, Илијана Јотова и еврокомесарката за проширување, Марта Кос.
Македонија
Македонија мора да биде подготвена како Исланд за членство, а ЕУ да биде искрена и брза во поддршката, ѝ порача Кос на Зајкова

„Македонија мора да ја направиме подготвена како Исланд за членство, да бидеме со усогласено законодавство и европски стандарди дома, а Европската Унија да биде искрена, брза и креативна во поддршката на нашиот европски пат, вреднувајќи го напредокот на земјите според исполнетоста на стандардите и вредностите на ЕУ односно согласно Копенхашките критериуми“, беше пораката на претседателката на Либерално-демократската партија (ЛДП), Моника Зајкова, на средба со еврокомесарката за проширување на Европската Унија, Марта Кос, утрово во рамки на Форумот ЕУ-Западен Балкан.
Зајкова и Кос разменија мислења за европската перспектива на Северна Македонија и итноста од забрзување на евроинтегративниот процес. Во разговорот Зајкова истакна дека Македонија не смее да биде изоставена на европскиот пат, кој треба да се темели исклучиво врз основа на критериумите од Копенхаген.
На средбата беше договорена и скорешна официјална посета на Брисел на претседателката на ЛДП, Зајкова, која е воедно и претседателка на либералите од југоисточна Европа – ЛИБСЕН. Во пријателски позитивниот разговор беше постигната заедничка согласност дека кредибилна европска перспектива за Западен Балкан е клучна за стабилност и развој на регионот.
Зајкова уште еднаш се заблагодари на ЕУ за итната реакција по трагедијата во Кочани, посочувајќи ја вклученоста на Македонија во Европскиот систем за справување со кризи како одличен пример дека целосната европска интеграција има огромно значење за секојдневниот живот на македонските граѓани.