Македонија
Дарлишта од фамилијата вработена во „Комунална хигиена“: Ние сме со генерации тука, камо да се вработевме на друго место, а не во ѓубре

Избрканиот синдикалец од „Комунална хигиена“, Дели Дарлишта, ги потврдува тврдењата на градоначалничката Данела Арсовска дека дел од неговата фамилија е вработена во претпријатието. За него, ова не е спорно, посочувајќи дека се е законски. За изјавата на Арсовска дека фамилијата има вработено се што им е род до шесто колено, тој посочува: „Што да коментираш, таа може што сака да каже“.
„Ние вистина е дека сме големо семејство, но секој своја куќа има, секој со своите деца си живее. Ние сме со генерации тука, не е дека некој вчера ги вработил луѓето. Имаме луѓе со по 40 години стаж, овде што работат“, вели Дарлишта за „Макфакс“.
Тој посочува дека нема ништо спорно во овие вработувања.
„Се е легално, согласно закон. Секој има право да се вработи. Камо да имавме среќа на друго место да се вработиме, а не во ѓубре. Татковците наши, сите во пензија отидоа од таму. Јас имам 33 години, а има по 40 години што работат тука. Што е спорно?“, додава Дарлишта за „Макфакс“.
Прашан за коментар околу изјавата дека мафијашки структури го контролираат претпријатието, теза која беше посочена од Арсовска кога зборуваше за вработувањата на фамилијата, Дарлишта вели: „Гледам мафијаши, ѓубре товараме, а мафијаши. Има право да нѐ обвинат за се кога, 365 дена работат луѓето, а ни денови за одмор не добиваме. Нека им служи на чест“.
Дели Дарлишта беше избркан од „Комунална хигиена“. Тој беше синдикален претставник на вработените. Вчера, градоначалничката Арсовска покажа список со вработени лица од иста фамилија, а на кој стоеше презимето Дарлишта.
„Од документот можете да видите дека едно презиме, односно една фамилија, во јавното претпријатие „Комунална хигиена„ има вработено се што му е род до шесто колено. Од една фамилија има над 40 вработувања. Од втора фамилија има над 30 вработувања. И овие мафијаши нема да бидат повеќе толерирани во Градот Скопје“, рече Арсовска.
Дарлишта беше избркан во четвртокот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мегапарк од 300.000 квадрати покај Лепенец со ботаничка градина и картинг стаза ветија Ѓорѓиевски и Лукровски

Кандидатите за градоначалници на Скопје и на Карпош, Орце Ѓорѓиевски и Сотир Лукровски најавија дека запуштениот простор околу реката Лепенец по преземањето на власта, заеднички ќе го претворат во симбол на еколошка обнова и современо градско живеење. Ќе изградат мегапарк од 300.000 квадратни метри.
„Ќе го претвориме ова подрачје во современ, зелен простор, уреден по европски стандарди. Паркот ќе се простира по течението на реката Лепенец на потегот меѓу Бардовци, Злокуќани и Даме Груев и ќе опфаќа површина од над 300 илјади квадратни метри. Тој ќе биде првиот парк што ќе поврзува повеќе скопски општини и ќе биде наменет за сите граѓани на Скопје, не само за карпошани. Ќе создадеме нова урбана оаза за рекреација, спорт, семејни активности со што ќе му го вратиме животот на ова заборавено градско ткиво“, рече Ѓорѓиевски.
Освен тоа, планираат и зелени коридори по целата должина на течението на Лепенец со пешачки и велосипедски патеки кои ќе ги поврзуваат населбите, парковите, но и јавните институции.
Во визијата за зелено Скопје, планираат и низа капитални парковски проекти во секоја општина.
„Предвидуваме и мегапарк Вардариште што ќе ја претвори поранешната депонијата во европски пример за зелена рекултивација. Градска шума во Расадник во Кисела Вода, најголемиот зелен проект во урбаното подрачје, мегапарк долж булеварот Христијан Тодоровски Карпош, првиот зелен коридор од ваков обем во Бутел како и проектот скопски зелен архипелаг кој предвидува 50 нови маалски паркови низ сите делови од нашиот главен град“, најави Ѓорѓиевски и нагласи дека планираат обнова за современ изглед и на Градски парк и на парк-шумата Гази Баба.
За Карпош, Ѓорѓиевски кажа дека во план име доизградба на булеварот Љубљанска, довршување на клучката Момин поток и реконструкција на Загрепска.
Лукровски дополни дека во мегапаркот кај Лепенец се планира ботаничка градина која ќе има и едукативен карактер, картинг стаза со европски стандарди, терен за голф и многу други содржини.
Македонија
Филипче: На состаноците на месните комитети на ВМРО-ДПМНЕ има присутни началници од МВР

Претседателот на Социјалдемократскиот сојуз на Македонија, Венко Филипче, на денешната прес-конференција ја обвини ВМРО-ДПМНЕ за груба злоупотреба на државните институции во текот на изборната кампања. Филипче потенцираше дека злопупотребата на институциите е најизразена од Министерството за внатрешни работи.
„Во повеќе ситуации, во повеќе општини на состаноците на месните комитети на ВМРО-ДПМНЕ гледаме присутни началници од Министерството за внатрешни работи или ги водат состаноците или се присутни.Тоа е сериозно кршење на законот и злоупотреба на институциите“, истакна Филипче.
На прес-конференцијата Филипче побара од министерот за внатрешни работи, Панче Тошковски, да одговори дали лично ги организира овие состаноци и дали стои зад ваквите злоупотреби.
„Барам министерот Панче Тошковски да одговори дали тој ги организира овие состаноци. До меѓународните институции, тие коишто ги пратат изборите апелирам да реагираат на оваа појава, затоа што Министерството за внатрешни работи треба да биде професионална институција, независна којашто им служи на граѓаните, а не на политичките партии“, додаде претседателот на СДСМ.
Македонија
Шукова и Мојсова најавија наплата на паркингот за гости во Карпош: Сите знаеме како е да кружиме околу зграда за слободно место

Кандидатките за градоначалнички на Скопје и на Карпош од СДСМ, Каја Шукова и Маја Мојсова, од Млечен ресторан денес најавија паметни паркинзи со дигитална наплата во оваа општина. Паркирањето на најголем дел од Карпош е бесплатно, но двете кандидатки за градоначалнички сметаат дека тоа не треба да остане така за да има повеќе места за паркирање на жителите.
„Денска сме во Карпош, општина што секојдневно се соочува со еден проблем, а тоа е паркирање. Сите знаеме како е да кружиме околу зградата по работниот ден барајќи слободно место, а коа ќе ни дојдат гости, уште поголем хаос. Во нашата програма паркирањето и урбанизамот се врвен приоритет. Воведуваме паметни паркинзи со дигитална наплата, зони на периферијата поврзани со јавен превоз и информации во реално време. Преку стратегијата ‘Скопје за сите’ обезбедуваме субвенциониран паркинг за семејствата со ниски приходи, пензионерите, младите невработени и секако лицата со попреченост“, рече Шукова.
Паркирањето таа ветува дека ќе го решава и со посебна стратегија „Скопје 2050“.
„Секој нов урбанистички проект ќе мора однапред да предвиди паркинг, зелени површини и простор за пешаци. Не по изградбата туку какао предуслов. Урбанизмот ќе биде транспарентен. Сите планови ќе бодат достапни онлајн со можност за јавни предлози. Ќе донесеме нов, строг и еколошки Генерален урбанистички план. Во првите две до четири години ќе ја изработиме стратегијата Скопје 2050, долгорочна визија за паметен и одржлив град со мешовити урбани зони и уредени јавни простори“, рече Шукова.
Мојсова се пожали дека денес изгубила многу време за да паркира кај Млечен, како што рече, нејзиното поранешно маало.
„Вртев половна час за да најдам паркинг место за да стасам тука. Сакаме Карпош да ја направиме самоодржлива општина. Што значи соамоодржлива? Тоа значи дека ние ќе стопанисуваме со паркингот, ќе треба да се исцртаат паркинг местата, ќе треба да знаеме точно колку паркинг места има во општина Карпош, но сето тоа ќе мора да биде и со некакво субвенционирање за граѓаните на Карпош, а за посетителите ќе биде со наплата. Тоа значи дека ќе работи по принципот на ПОЦ. Немањето паркинг секогаш е поврзано со неноранлата урбанизација, која во суштина ги прави овие проблеми. Кога ќе се сетам на минатото тука секогаш сум можела да најдам паркинг, сега не. И тоа не е најголемиот проблем, ова е првиот дел кој се граничи со општина Центар, кој е бесплатен и нормално сите посетители кои одат во Центар и кои што треба да плаќаат паркинг, тука наоѓаат бесплатен паркинг. Некако ќе мораме да го решиме тој проблем, граѓаните на Карпош се пред сите граѓани во оваа општина, да си го најдат паркинг местото и да доаѓаат без нервози дома“, рече Мојсова.
Им вети на карпошани дека повеќе урбанизација нема да има во тој дел на општината, односно нема повеќе да дозволува на местото на куќите кои се останати да се прават згради, а не ја исклучи и можноста паркирањето да се решава со монтажна гаража.