Скопје
Славески, чекајќи инструкции од својот партиски шеф, го блокира равојoт на градот, велат од Град Скопје

Срамно и неодговорно е однесувањето на претседателот на Советот, Трајко Славески, кој своеволно ја одложи седницата на Советот на Град Скопје, на која требаше да се гласа за проекти што се од клучно значење за скопјани, реагираат од Град Скопје.
Наместо да се разговара за капитални проекти, Славески, додаваат од Град Скопје, ја прекина и одложи седницата на која требаше да се најдат неколку круцијални инфраструктурни проекти, кои значително ќе го подобрат животниот стандард на граѓаните на Скопје во неколку населби во градот.
„Славески, веројатно, чекајќи инструкции од својот партиски шеф, денес го блокира рамномерниот равој на градот, кој самиот го промовира шетајќи од врата до врата со програмата ‘За модерно Скопје’ на градоначалничката Данела Арсовска.
ВМРО-ДПМНЕ денес ја попречи реконструкцијата на улицата Калош Дани која е руинирана, а по која секојдненво транзитираат илјадници жители од населбата Момин Поток.
Славески и ВМРО-ДПМНЕ ги оштетија и карпошани со блокадата на работата на Советот имајќи предвид дека денес советниците требаше да гласаат за изградба на две новопланирани улици 1 и 4 и изградба на мегапарк во општина Карпош“, истакнуваат од Град Скопје.
Чучер Сандево, кое повеќе од 30 години е заборавено од сите градски администрации, според информацијата од Градот, нема да добие реконструирана водоводна и нова фекална мрежа и реконструкција на улици во местата Кучевишка Бара и Бел Камен, само поради личните хирови на Славески.
„Апелираме до Мицкоски навреме да им ги каже инструкциите на своите советници, кои очигледно без негов амин не знаат како да гласаат кога станува збор за клучни инфраструктурни проекти во градот. На овој начин граѓаните барем ќе бидат свесни и ќе знаат кој работи во нивен интерес, а кој исклучиво гледајќи го теснопартискиот и личниот бизнис интерес“, се истакнува во соопштението од Град Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Утре прекин на вода во дел од Центар

Од ЈП Водовод и Канализациа известуваат дека на ден 02.12.2023 година ( сабота ) поради уличен водоводен дефект од ф – 200 мм на ул. 11 Октомври бб – кај Билна Аптека, во периодот од 09.00 часот па се до отстранување на дефектот без вода ќе останат корисниците од ул. 11 Октомври лоцирани на потегот од бул. Кочо Рацин до Стара Рампа.
Скопје
(Видео) Жонглер ги забавува возачите додека чекаат на црвено светло во Аеродром

Веќе неколку денови чекањето на црвено светло на семафорите во скопски Аеродром е различно од чекањето на сите останати семафори. Кога ќе светне црвеното светло на пешачкиот премин излегува жонглер кој со широко насмеано лице, од рака в рака, едновремено, префрла пет жонглерски палки. Пред да светне зелено се повлекува, а возачите го поздравуваат, му испраќаат бакнежи, а не се ретки и таквите кои му даваат пари.
Момчето, по кусиот настап, ненаметливо се повлекува и не им бара пари на возачите, како многумина други кои го користат моментот додека возачите чекаат да светне зелено.
Попладнево беше на булеварот Трета македонска бригада. Кога ќе светне зелено светло, тој се повлекува на паркингот покрај семафорите и таму жонглира. Оди на други крстосници во населбата Аеродром и секаде им измамува насмевки на возачите.
Скопје
Засадени 11.000 садници на Ајватовски Рид во рамките на проектот „Зелена општина Илинден“

Општина Илинден успешно ја спроведе големата акција за пошумување во рамките на проектот „Зелена општина Илинден“. Акција за пошумување се реализира на Ајватовски Рид, делот што беше опфатен со големите пожари летово и беше уништена шума со површина од 30 ха.
Во оваа акција за збогатување и обновување на шумскиот фонд засадени се 11.000 садници од видот багрем, а учествуваа голем број граѓани, ученици, јавните претпријатија, општинската администрација, како и општествено одговорни компании. Целта е да се обнови шумата и заеднички да ја подигнеме еколошката свест за здрава и чиста животна средина, чии придобивки ќе ги чувствуваме сите ние, но и генерации по нас.
Градоначалникот на општина Илинден, Александар Георгиевски, присуствуваше на акцијата и истакна дека обврска на секој од нас е активно да се грижи во подобрување на еколошката свест со цел да придонесеме да имаме чист воздух и здрава животна средина, така што во таа насока ваквите еколошки акции ќе продолжат и во иднина да се реализираат.
Градоначалникот Георгиевски упати и голема благодарност до општествено одговорните компании „Џонсон Мети“, „Хавеп импекс“, „Пекабеско“, „Еко Дани трејд“ и „Тримил Р“, МАН, СИГО, „Фреш фарм“ и „Рио кафе“, кои ја покажаа грижата за екологијата преку донирање на овие садници.