Скопје
Арачиново повеќе не е црна овца, арачиновци плаќаат данок, вели Ибраими

Девизата дека арачиновци не плаќаат данок е веќе минато, велат надлежните во оваа општина.
И ова, како што е појаснето, се случува со доаѓањето на новиот градоначалник Ридван Ибраими на чело на Општината кога работите почнале драстично да се менуваат и дека од ден на ден Арачиново бележи само успеси во сите сфери, а тоа го потврдуваат и релевантни меѓународни организации.
Градоначалникот на Арачиново, Ридван Ибраими, денеска ги презентира податоците за 2023 година во делот на собрани даноци.
Општина Арачиново од вкупно 2.675 регистрирани домаќинства успеала да инкасира над 6 милиони денари по основ на локални даноци, што во споредба со 2022 е 422 % раст.
Преставникот на УСАИД, Бардил Марку, на денешната презентација во однос на соработката и резултатите за општина Арачиново ја нарече општината „успешна приказна“.
УСАИД исто така ја пофали Општина Арачиново и во делот на фискалната транспарентност како општина со најголем раст во 2023 година.
Според најновите истражувања, Општина Арачиново од 16 максимални индесни поени, освоила 12, што е најголем раст, а исто така Арачиново бележи значително голем раст и во активната транспарентност.
На крајот од денешната презентација, како што рече и самиот градоначалник Ридван Ибраими, Арачиново не е веќе црна овца, туку денес добиват пофалби и се мерат со многу поголеми и финансиски посилни општини.
„Нашето домаќинско работење денес ги бележи првите позитивни резултати благодарение на помошта и соработката со многубројни меѓународни организации, а посебно со УСАИД, која во секој момент покажува спремност да ни помогне“, рече тој.
Ибраими им честита и им се заблагодари на општинската администрација и особено на граѓаните на Арачиново за постигнатите резултати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ѓорѓиевски на одбележувањето на Светскиот ден на животната средина: „Заедно создаваме одржлива иднина“

Градоначалникот на oпштина Кисела Вода и претседател на ЗЕЛС, Орце Ѓорѓиевски, на покана на првиот вицепремиер Изет Меџити, денес присуствуваше на настан по повод Светскиот ден на животната средина. Настанот се одржа под мотото „Заедно создаваме одржлива иднина“ и опфати низа активности насочени кон унапредување на одржливите политики и практики во заштитата на животната средина.
„Денес, на покана на првиот вицепремиер Изет Меџити, присуствував на настанот на одбележувањето на Светскиот ден на животната средина, под наслов ‘Заедно создаваме одржлива иднина’. Програмата вклучуваше конференција со две панел-дискусии кои беа фокусирани на одржливото управување со заштитени подрачја, одржливото управување со отпадот и примената на современите зелени технологии.
Имавме чест да видиме и неколку презентации од учениците од Скопје и Македонија, кои се дел на ГЛОБЕ програмата со мрежата за искуствено учење, со акцент на значењето на искуственото еколошко образование во оформување на свесни и одговорни генерации поддржано од УНИЦЕФ и Министерството за животна средина и просторно планирање.
Нека заштитата и унапредувањето на животната средина и понатаму останат да бидат врвен приоритет, кој ќе резултира со нови парковски површини на места каде што постојат депонии, со акции за чистење и за пошумување, со едукација за правилна селекција и одложување на отпадот и бројни иницијативи за подигнување на еколошката свест кај граѓаните. Заедно можеме“, истакна претседателот на ЗЕЛС и градоначалник на Општина Кисела Вода, Орце Ѓорѓиевски.
Македонија
(Фото) ЈКП „Гази Баба“ доби нова механизација

Денес, градоначалникот на општина Гази Баба Бобан Стефковски заедно со директорот на ЈКП Гази Баба Игор Атанасовски направија промоција на новата механизација за ЈКП Гази Баба, извести Општината.
Механизацијата се состои од две возила и тоа: специјализирано возило за метење и миење на јавните површини и теренско товарно возило.
Специјализираното возило ќе даде значителен придонес кон зголемувањето на чистотата на јавните површини, преку редовно метење на улиците во урбаните средини, додека товарното возило ќе биде ставено во функција на интервенции на терен во руралниот дел на општината каде што ЈКП Гази Баба има надлежност за оддржување на водоводните и канализационите системи, се додава во соопштението.
„Среќен сум што од денес во функција на ЈКП Гази Баба, а преку тоа во директна служба на граѓаните ставаме две нови возила. Ова не е прва инвестиција во ЈКП Гази Баба во изминатите четири години, ЈКП Гази Баба доби значајни инвестиции во механизација и опрема, кои не само што го подобрија квалитетот на услугите, туку и го трансформираа претпријатието во модерна и ефикасна институција – вистински сервис на граѓаните“, изјави градоначалникот Стефковски.
Директорот на ЈКП Гази Баба Игор Атанасовски, упати благодарност до градоначалникот Стефковски за поддршката и инвестициите кои се реализираа во изминатиот период.
Македонија
Арсовска: Наредбите за девалвации и напади од штабот на ВМРО се спроведуваат

Наредбите за девалвации и напади од штабот на ВМРО се спроведуваат, објави на социјалните мрежи градоначалничката на Скопје, Данела Арсовска.
„Звонко Тасевски со одлука на Собранието на ВМРО и ‘Влен’ е избран за член на Републичкиот совет за безбедност на 12.11.2024 година. Звонко обучува полицајци од МВР, каде што треба да пријавам закани. Звонко напаѓа, навредува и девалвира жени по нарачка. Не биди Звонко“.
Со докази за криминал, како што пишува Арсовска, ги бараат сите можни изговори за да не влезат во општина пред таму да ги уништат сите документи.
„Сите незаконски обиди за легализирање дивоградби им се фатени, нотирани и институционално се известувани 3 години, а фалсификатот со докази што ги имаме го прават на 20.3.2025 година.
Затоа што никој од вработените во Град Скопје нема да дозволи некој да се богати со овој фалсификат, јас сум должна да ги заштитам и да не дозволам да се случува баш ова што се случува.
За заканите од криминалот на Ганиу, Меџити и Адеми зборувам јавно, а премиерот вели дека му е жал и да пријавам во МВР, но не сум била добра жена“.
Во исто време, како што додава во напишаното, биле издавани наредби во штабот да ја напаѓаат, девалвираат и навредуваат по сите основи како човек и жена.
„Но изгледа не им е јасно дека нема да се повлечам. А вие срам имате ли?
U.S. Embassy North Macedonia, Delegation of the European Union to North Macedonia, British Embassy Skopje, German Embassy Skopje, Јавно обвинителство на Република Македонија“, напиша Арсовска.