Скопје
(Видео) Јанчева: ВМРО-ДПМНЕ да ја прекине блокадата на Советот и да ги гласа клучните проекти за Скопје
Скопје цели три години е заглавен град на кој му се случува историска катастрофа, која му ја нанесоа Мицкоски и ВМРО-ДПМНЕ. Првин ја донесоа Арсовска на градоначалничката позиција, а потоа, откако се скараа за рацете во медот, почнаа да ја блокираат работата на Град Скопје преку мнозинството во Советот, вели Љубица Јанчева од СДСМ.
Затоа Скопје е во ваква хаотична состојба.
Наместо, како што вели, да носат одлуки и да работат за доброто на скопјани, оние што го уништија Скопје веќе подолг период меѓусебно се расправаат врз грбот на скопјани кој е виновен за хаосот што тие го направија.
„Тоа денеска треба да заврши. Ниту ВМРО-ДПМНЕ и Мицкоски ниту, пак, Арсовска не може да побегне од одговорноста за хаосот што го направија во Скопје.
Советничката група на СДСМ и коалицијата на денешната седница на Советот очекува престрелките за тоа кој е виновен да завршат конечно и колку толку во периодот што следува, до крајот на мандатот, да направат нешто за Скопје и скопјани. Затоа, впрочем, и беше средбата на Арсовска со Мицкоски“, додава таа.
Од ВМРО-ДПМНЕ како мнозинство и од Арсовска, како што нагласи, очекуваат, конечно, да се усогласат, да се договорат и да ги поддржат проектите и програмите што се во интерес на скопјани. Наместо блокади, според неа, ВМРО-ДПМНЕ во Советот да ја поддржи одлуката за потреба од набавка на нови еколошки автобуси, кои заедно со Арсовска им ги ветија на скопјани, како што заедно го ветија и бесплатниот јавен превоз за кој абер нема да се реализира.
Очекуваат да го поддржат проектот за модерен еколошки транспорт – БРТ.
„Да ги поддржат:
Програмата за дополнителни активности на ЈП „Комунална хигиена“; Програмата за заштита на животната средина,
Програмата за активности од областа на сообраќајот; Развојниот план за јавен превоз на патници во град Скопје;
Програмата за локален економски развој;
Програмата за заштита на Паркот на природата Гази Баба;
Програмата за заштита на природата за заштитниот предел Водно;
Програмата за енергетска ефикасност и сите измени и дополни на програмите што произлегуваат од ребалансот на буџетот, кој е изгласан.
Заглавени се многубројни и значајни проекти. Скопје е во тотален хаос, скопјани тоа не го заслужуваат.
Блокадите на советниците на ДПМНЕ и меѓусебните опструкции прават огромна штета и мора да прекинат.
Скопје се дави во смет, нечисто е, секојдневно никнуваат нови депонии, нема трага од исчистените 82 во првите 82 дена, нема ново зеленило, нема нови велосипедски патеки, нема нови булевари, нема ништо од ветеното во програмата „За модерно Скопје“.
Јавниот превоз е во катастрофална состојба и пред колапс, недостигаат стотина автобуси за редовното одвивање на возниот ред, а оние што ги има, се нередовни, се расипуваат, па дури и се палат, со што се и небезбедни.
Се наоѓаме пред почетокот на новата учебна година, изгласувањето на одлуките е најмалку што во овој момент може да направат ДПМНЕ и Арсовска.
Советничката група на СДСМ и коалицијата се и ќе бидат конструктивни како опозиција во Советот.
Ќе ги поддржиме овие одлуки за доброто на скопјани“, децидна е Јанчева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Арсовска: Како ќе функционира ЈП „Комунална хигиена“ – Скопје во следните пет дена – прашајте го премиерот Мицкоски
„Како ќе функционира ЈП „Комунална хигиена“ – Скопје во следните пет дена прашајте го премиерот Мицкоски кој лично од својот кабинет го наредува овој хаос кој воедно и го најави како интересна разврска на прес конференција непосредно пред да се случи“, вели актуелната градоначалничка на Град Скопје, Данела Арсовска.

„Го повикуваме премиерот Мицкоски кој има своја претседателка на Управен одбор од ВМРО која воедно е и осуден криминалец за 2 кривични дела во 2006 и 2022 година, да го повика Управниот одбор на Комунална хигиена Скопје согласно член 24а став 2 од Законот за јавни претпријатија во случај да донесе одлука за разрешување на директорот и согласно став 3 од истиот член да именува вршител на должност на претпријатието.
Мицкоски го тероризира градот со своето режимско и диктаторско владеење преку својот Управен одбор, злоупотребувајќи ги институциите и полицијата да сее страв и да врши репресија пред избори.
Го прашуваме директно и базирано врз доказите кои граѓаните секојдневно ги изнесуваат во јавност:
1. Дали е приведен директорот на Јавното комунално претпријатие Тетово за еко хаваријата што ја предизвика со отпадот во Вардар и зошто не?
2. Дали е приведен директорот на Јавното комунално претпријатие Гази Баба за еко хаваријата што ја предизвика во Јурумлери со отпадот кој го фрла сред природа со општински камиони и зошто не?
3. Дали е приведен директорот на JП Чистота и зеленило Куманово за еко хаваријата што ја предизвикува секојдневно со отпадот низ Куманово и зошто не?
Или таму РЕЖИМСКИОТ ДИКТАТОР Мицкоски не дал наредба да се апси?“, прашува Арсовска, преку соопштението објавено и на социјалните мрежи.
Македонија
Без струја денеска делови од Центар, Сопиште и Бутел
Од ЕВН Македонија АД известуваат дека денеска без електрична енергија ќе останат:
· во периодот од 07:30 до 15:00 часот, корисниците на блокот на згради од булеварот Партизански Одреди бр.17 кон улица Максим Горки, општина Центар.
· во периодот од 07:45 до 15:30 часот, корисниците на селата Јаболци, Ново Брезница, Патишка Река, Држилово, Малчиште, Црн Врв, Елово, Осинчани, Карст с.Јаболци Викендици Држилово, Сателитски Центар, Ново Брезница, Рудпроект, Јаболци, Патишка Река, општина Сопиште.
· во периодот од 08:30 до 10:30 часот, корисниците на улицата Тале Христов, Поликлиника ВФВ и Објектите околу ВРВ Поликлиник, општина Бутел.
· во периодот од 09:00 до 12:00 часот, дел од корисниците на улицата Елисие Поповски – Марко бр.21,47 и други корисници во непосредна близина, општина Центар.
Македонија
Делови од Центар и Аеродром денеска без вода
Од ЈП Водовод и Канализација известуваат дека денеска:
– поради изведување на водоводен приклучок ф-80 мм на улицата Франклин Рузвелт бб, прекинато водоснабдување ќе имаат корисниците на дел од истата улица, односно потегот од Орце Николов до Благој Давков, општина Центар.
Водоснабдувањето ќе биде прекинато од 10:00 часот до завршување со работните активности.
– поради промена на вентил во шахта ф-2“ на улицата Венијамин Мачуковски бб, прекинато водоснабдување ќе имаат корисниците од истата улица, општина Аеродром.
Водоснабдувањето ќе биде прекинато од 09:00 часот до завршување со работните активности.

