Општина Центар дава целосна поддршка на петицијата потпишана од жителите што живеат во непосредна близина на клубот „Интермецо“ и другите локали лоцирани на „Народен фронт“. Станарите бараат ефективна интервениција на МВР и Државниот пазарен инспекторат и другите институции за да им се реши проблемот со гласната музика, нарушениот ред и мир, дивеењето и отежнатиот сообраќај на делот од улицата на која се наоѓаат угостителските објеки.

„Ние како Општина ги презедовме сите правни механизми што ни се достапни! Не помогнаа ни глобите ни казните. Овој проблем треба да се реши долгорочно, а за тоа се потребни и координација и притисоци од страна на сите надлежни институции“, вели Герасимовски.

Општина Центар петицијата ја проследи до МВР, Министерството за економија и труд, Министерство за животна средина и просторно планирање, Државниот пазарен инспекторат и Државниот инспекторат за животна средина и побара да се одржи итна средба за решавање на проблемот на засегнатите станари.

На барање и поплаки на жителите за прекумерна бучава, Општина Центар во повеќе наврати го санкционира спорниот локал со глоби, опомени и забрани за вршење дејност.

Инспекциската служба на Општината и натаму ќе продолжи со санкционирање на сите угостителски објекти, кои не го почитуваат законот, но за долготраен успех потребна е соработка на сите надлежни институции.