Општина Центар минатата недела го прошири дивиот паркинг зад Народната банка, а денеска и го асфалтира. Станува збор за паркинг што имаше оштетен асфалт и на кој без никаков ред се паркираа автомобили кој каде ќе стигне често и блокирајќи се меѓу себе.

Овие денови Општина Центар го изгреба стариот и испукан асфалт, го прошири паркингот на речиси 3.000 квадратни метри и обезбеди паркинг-места за речиси 250 автомобили. Градоначалникот на општина Центар, Горан Герасимовски, беше на увид на асфалтирањето и од таму порача дека, конечно, паркинг-просторот ќе се регулира и ќе се воведе ред во паркирањето.

„Конечно, паркинг-просторот на кој се паркираа автомобили без ред ќе се регулира, прошири и асфалтира. Паркингот беше во лоша состојба, а денеска веќе се асфалтира по што и ќе се обележи во согласност со сообраќајниот проект на ‘Паркинзи на Општина Центар’. Со ова воведуваме ред во паркирањето и безбедноста и на возачите и на пешаците што поминуваат овде“, изјави Герасимовски.

По обележувањето на паркинг-местата со цел да има ред во паркирањето, Јавното претпријатие „Паркинзи на Општина Центар“ ќе постави и инфо-обележје за корисниците на паркингот. Овој отворен паркинг главно го користат вработени од институциите и околните претпријатија. Општина Центар продолжува да вложува во проекти што воведуваат ред во сообраќајот и го регулираат паркирањето, информираат од Општина Центар.