Општина Ѓорче Петров започна со изградба на нов паркинг простор во близина на спортското фудбалско игралиште „Македонски Лавови“ на булеварот „Македонска Војска“.

Со вкупна површина од 850 м², новиот паркинг ќе обезбеди простор за приближно 50 возила, со што ќе се подобри инфраструктурата и ќе се реши долгогодишниот проблем со непрописното паркирање во овој дел од општината.

Градоначалникот Александар Стојкоски изврши увид во текот на градежните активности, кои се одвиваат според предвидената динамика. Со оваа инвестиција, општината уште еднаш ја потврдува својата посветеност кон создавање на поуреден, безбеден и модерен јавен простор за своите граѓани.

Овој проект е дел од пошироката стратегија за унапредување на локалната инфраструктура, со цел подобрување на квалитетот на живот во нашата заедница.

=

Во општина Илинден на повеќе локации се спроведува голема акција за пошумување, во рамки на проектот „Зелена Општина Илинден“. Во рамки на акцијата која ќе трае во наредниот период ќе бидат засадени над 2000 садници од повеќе видови, а целта е да се придонесе за подобрување на квалитетот на воздухот, унапредување на животната средина, како и подобрување на условите за живеење.

Заедно со општествено одговорни компании, граѓани, ученици, јавните претпријатија, општинската администрација, се сади покрај пешачко-велосипедските патеки, покрај улици, патишта, училиштата, детската градинка, спортските терени, пределот на Ајватовски рид и други јавни површини.

На акцијата за пошумување присуствува и градоначалникот на Општина Илинден, Александар Георгиевски, кој истакна дека грижата за екологијата и здравата животна средина е обврска на секој од нас, па во таа насока во општина Илинден се почесто ќе се спроведуваат акции за пошумување.

„Со реализацијата на овој проект се залагаме за еколошки почиста општина, како и подигнување на еколошката свест. Заштитата и унапредувањето на животната средина претставува еден од приоритетите во работењето на локалната самоуправа“, велат од Општина Илинден.

Градоначалникот Георгиевски упати и голема благодарност до општествено одговорните компании ОКТА, ТАВ, Пекабеско, Дени Интернационал, НИКИ Инвест, МАН, Мулти Пром, Компанија Атанасовски, кои ја покажаа грижата за екологијата преку донирање на овие садници.

Заштитата и унапредувањето на животната средина претставува еден од приоритетите во работењето на локалната самоуправа, додаваат оттаму.

Градоначалникот на Општина Центар Горан Герасимовски информира дека е завршен јавниот повик за доделување еднократна парична помош во висина од 2.500 денари за пензионери со старосна, семејна, инвалидска или социјална пензија не повисока од 23.758,00 денари. На овој повик, 1735 пензионери аплицираа за еднократна финансиска поддршка од Општината која ќе биде исплатена до крајот на годината.

Герасимовски потенцира дека аплицирањето на 1735 пензионери за еднократна парична помош од 2.500 денари е важен чекор кон обезбедување на поддршка за време на новогодишните празници.

„Во период на новогодишни празници кога целото семејство заеднички прославува, овие денови можат да бидат и дополнителен финансиски притисок за пензионерите. Затоа, наша задача е да им го олесниме секојдневието. Интересот за јавниот повик беше навистина голем, верувам дека овие средства ќе им помогнат за празничниот семеен буџет“, вели Герасимовски.

Општина Центар продолжува да имплементира проекти преку кои ќе ја зајакнува локалната заедница, но и ќе го подобрува квалитетот на живот на сите граѓани.