Скопје
(Видео) Наместо како инфлуенсери да се фотографираат со нередот што го прават, нека фатат да работат, им порача Арсовска на колегите

Градоначалничката Данела Арсовска ги нарече инфлуенсери своите колеги од скопските општини, кои вчера се фотографираа со општинските служби како чистат ѓубре. Им посочи дека првин направиле неред, па играле политички игри. Додаде дека нивна работа е првин да си ги исчистат населбите.
„Коалицијата ДПМНЕ – СДСМ, наместо како инфлуенсери да се фотографираат на градските улици со нередот што го прават и политичките игри што ги играат, да се зафатат со работа и да престанат да си играат со нервите на скопјани. Сите тие се власт во градот Скопје и државата и треба да си постапуваат, а не да изигруваат инфлуенсери. И првин нека си ги исчистат своите населби, па после нека кажуваат“, рече Арсовска.
Им порача дека со нив мора да се расчисти.
„Мора да се расчисти со овие работи. Мора да се расчисти со политикантите, со партиите што си играат инфлуенсери надвор во градот, кои знаат што се случувало бидејќи тие раководеле со овие претпријатија. Тие имаат намера да угнетат сè што не размислува како нив и се обидуваат тие луѓе да ги заплашуваат. Ниту јас ниту директорката не е уплашена од нивните реакции“, додаде Арсовска.
Советот на Скопскиот Плански Регион донесе одлука да побара извештај од Град Скопје за состојбите поврзани со комуналната хигиена. Градоначалниците апелираат Град Скопје да ја разгледа состојбата и да преземе мерки за итно постапување од Јавното претпријатие „Комунална хигиена“ – Скопје во решавање на проблемот, како и иницијатива самите општини да ја преземат механизацијата за одржувањето на комуналната хигиена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Герасимовски: „Центарска симфонија” ги сплоти скопјани, Тарабунов и граѓаните пееја и танцуваа на најпознатите филмски евергрини

„Центарска симфонија” синоќа ги сплоти скопјани. Со македонска и светска филмска музика изведена од музичката ѕвезда Александар Тарабунов и камерниот оркестар, граѓаните уживаа во оваа културна манифестација којашто за првпат ја организираше Општина Центар.
Градоначалникот Горан Герасимовски упатува благодарност до сите центарци, но и жители на Градот Скопје кои вчера вечер дојдоа и уживаа во најпознатите мелодии од македонската и светската кинематографија како „Исправи се Делфина”, „Каде песно моја”, „До Балчак”, „Beautiful Maria of my Soul” и многу други. На „Центарска симфонија”, беше изведена и новата песна на Тарабунов „Заедно” со камерниот оркестар.
„Центар останува место за најубавите културни настани. Среќен сум што синоќа ‘Центарска симфонија’ ги сплоти скопјани на Плочникот кај Градски ѕид. Сите во еден глас ги пееа најубавите филмски мелодии, уживаа во добра музика и се забавуваа. Оваа манифестација е новина и останува традиција. Не застануваме тука, летово ќе имаме уште многу настани во делот на културата и за истите ќе бидете навремено информирани. Ви благодарам на сите коишто дојдовте и заеднички уживавме”, рече Герасимовски.
Скопје
Центарот на Скопје блокиран два дена поради средба на високи гости

Поради најавената средба на лидерите од Западен Балкан која ќе се одржи во Скопје, Секторот за внатрешни работи информира дека во понеделник (30 јуни) и вторник (1 јули) во главниот град ќе биде воспоставен посебен режим на сообраќајот.
Од СВР Скопје соопштуваат дека мерките ќе се однесуваат на поширокото централно подрачје на градот, при што дел од улиците и булеварите ќе бидат затворени во различни временски интервали, во зависност од движењето на делегациите.
„Станува збор за највисоко ниво на безбедносна организација, и апелираме до сите граѓани да покажат разбирање и трпение. Полициските службеници ќе бидат распоредени на клучни локации и ќе ја координираат обиколката на возилата“, изјави за медиумите полициски службеник од Единицата за безбедност на патниот сообраќај.
Од СВР додаваат дека сите учесници во сообраќајот треба строго да ги почитуваат наредбите и знаците кои ќе ги даваат униформираните полициски службеници, со цел да не се создаваат дополнителни метежи или проблеми.
„Сите неопходни информации за затворените улици и алтернативните правци ќе бидат достапни преку медиумите и социјалните мрежи. Апелираме возачите да планираат алтернативни рути и да тргнуваат порано од дома“, велат од полицијата.
Граѓаните кои живеат или работат во централното градско подрачје се советуваат да користат јавен превоз или алтернативни средства за движење за време на двете критични деноноќија.
Македонија
Откако инспектор во Чаир утврдил нелегален приклучок на водоводна мрежа, сопственикот на зградата му се заканувал – во МВР пријавен случајот за кој зборуваше Арсовска

Во дневниот билтен на МВР објавена е информацијата за случајот со зградата во Чаир, од кадешто викендов на социјалните мрежи се вклучи градоначалничката Данела Арсовска и зборуваше за незаконски дејствија.
„На 22.06.2025 околу 11.30 часот во СВР Скопје, Ф.Р., инспектор во град Скопје, пријавил дека на улицта Цветан Димов во Скопје, откако утврдил нелегален приклучок на водоводна мрежа, Б.А.(34) од Скопје му упатувал закани. Се работи на расчистување на случајот“, велат од МВР.
Градоначалничката Арсовска вчера информираше дека сопственикот на 12-катницата во Чаир, упатил бројни закани по присуството на инспекторите во зградата која имала и див приклучок на електрична енергија.
Арсовска во неделата се вклучи на социјалните мрежи од пред објектот, пришто истакна дека досега се пребројани 61 стан во зградата, сите биле незаконски градени, а постои обид да се легализираат прикажани лажно дека се градени во 2011 со фалсификувана документација. Инспекторите се соочиле со уште една непријатност кога, според зборовите на Арсовска, станарите кои веќе биле вселени во објектот им ги исекле гумите на возилата со нож.