Скопје
Општината Центар: Хуманоста сите нѐ сплоти, за неколку дена собрани средства за лекување на младиот Лео

Во рамките на детската хуманитарна програма организирана од Општина Центар собрани се 901.768,00 денари за лекување на младиот Леонид Индов.
Општинските градинки и училишта пред Нова година организираа низа добротворни базари, проследени со музички точки и претстави, на кои граѓаните имаа можност да донираат за Лео.
Средствата собрани на овие предновогодишни хуманитарни приредби, што се одржаа во „Рамстор“, веќе се уплатени на сметката за лекување на Лео, кој доби тешки повреди на `рбетот во несреќен случај пред неколку месеци.
,,Хуманоста сите нѐ сплоти. Со помош на нашите млади уметници и настапите на ‘златните славејчиња’ помогнавме Лео да продолжи со лекувањето. Упатувам апел до сите наши сограѓани да се приклучат кон ваквите акции и да помогнат“, порачува градоначалникот Герасимовски.
Општина Центар со благодарност до сите што беа дел од големата хуманитарна акција, а пред сѐ, на децата, наставниците и родителите, кои, како што истакнуваат, покажа дека со сплотеност и солидарност во срцата може да се помогне таму каде што е најпотребно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Стефковски приреди велигденска трпеза: Да се почитуваме како народ за да опстоиме како држава

Градоначалникот на општина Гази Баба Бобан Стефковски вчеравечер приреди велигденска трпеза по повод Воскресението христово – Велигден.
Во обраќањето пред присутните, градоначалникот Стефковски говореше за ликот и делото на Исус Христос и за тоа дека ниту една друга личност, како личноста на Исус Христос и ниту еден друг настан како настанот со воскресението не предизвикале таков интерес и не направиле таков пресврт во историјата на светот и човекот.
„И доаѓањето на Исус Христос неговото живеење и неговото заминување биле пропратени со необични појави и случувања. Кога се родил во Витлеем се појавила необична ѕвезда на небото, а додека живеел од него излегувала сила која ги лекувала. Болни исцелувал, грешни поправал, гревови простувал и никој ниту пред него, ниту по него не живеел со таква сила“, наведе Стефковски.
Дополнително тој се осврна и соживотот кој го имаат граѓаните од различни етнички заедници во општината.
„Од оваа година започнавме една нова традиција. За Бајрам се собравме на Ифрат со граѓаните од Исламска вероисповест, а денес на третиот ден од Велигден сме собрани тука на Велигденска трпеза. Само со взаемно почитување на религијата и традицијата ќе ја покажеме нашата големина пред се како индивидуи, а потоа и како народ“, истакна градоначалникот Стефковски.
На крајот од своето обраќање Стефковски им упати порака на граѓаните и порача: Мојата порака до сите наши граѓани, без разлика на етничката, верската или било каква друга припадност е да се почитуваме помеѓу себе, да си помагаме секогаш кога тоа е потребно. Во тагата да тагуваме, а во радоста да се радуваме – заклучи Стефковски.
На велигденската трпеза присуствуваа свештеници од МПЦ, пратеници во Собранието на Република Македонија, советници и голем број на граѓани.
Македонија
Општина Илинден почнува со реконструкција на спортско игралиште во Кадино

Општина Илинден постојано работи на реконструкција и урбанизација на сите населени места со цел задоволување на потребите на сите граѓани. Деновиве е започната реконструкција на спортско игралиште во населеното место Кадино, поточно во дворот на основното училиште „Ристо Крле“. Со оваа реконструкција е предвидено поставување на нова заштитна ограда, осветлување со нови столбови и рефлектори, како и изработка на подна бетонска плоча. На ова спортско игралиште ќе бидат санирани головите и ќе бидат поставени нови табли за кошарка, со што истото ќе може да се користи за повеќе спортови, соопшти општина Илинден.
Градоначалникот на Општина Илинден, Александар Георгиевски, изврши увид на игралиштето и истакна дека освен во просторното уредување и реконструкција, ова повеќенаменско спортско игралиште е од особена важност за релаксација и рекреација на жителите на општината. Градоначалникот додаде дека овој спортско-рекреативен терен, со својата разноврсност ќе им овозможи на сите жители да уживаат во играта, спортот и забавата.
Оваа реконструкција на веќе постоечки спортски игралишта и изградбата на нови, претставуваат континуитет на успешните проекти на Општина Илинден за урбанизација и уредување на сите населени места во општината. Во наредниот период ќе бидат изградени нови и реконструирани постојните игралишта и во останатите населени места, се наведува во соопштението на општина Илинден.
Македонија
Ѓорче Петров и Сопиште денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, дел од корисниците од ул. 103 – Волково во близина на кружниот тек во Волково, во општина Ѓорче Петров;
– во периодот од 09.00 до 14.00 часот, дел од корисниците од ул. 100 и 21 во село Волково, во општина Ѓорче Петров;
– во периодот од 09.00 до 15.30 часот, дел од корисниците од село Сопиште (ул. 14 и ул. 16 кај Св. Мина) во општина Сопиште.