Скопје
Остри реакции за бездомните кучиња во Скопје: Пополека умираат од глад и жед, а се и сериозна опасност
Скопјани реагираат на проблемот со бездомните кучиња. Ги има во повеќе маала низ градот, најголем дел оставени без храна и вода. Се сведочи и за цели глутници, кои во најголем случај се мирни. Жителка на Карпош бараше дислоцирање на кучиња кои биле во близина на училиште. Скопјанец сведочи како седум кучиња умираат под Железничката станица, а смета и дека се опасност за минувачите. Засега „Лајка“ нема решение за овие кучиња, бидејќи приципот на кој работи претпријатието е залови, третирај, врати на иста локација.
Христијан Богдановски, скопјанец, преку објава на социјалните мрежи аламираше дека бил сведок на жална глетка. Посочува дека и самиот бил жртва на куче кое го нападнало за нога додека возел велосипед. Посочува дека ова што се случува во Скопје е срамота.
„Пред саат време на Железничка, жална глетка, гладни, жедни и истоштени од дивеење на скопските улици, болни, пополека умираат. Мислам дека е многу поразумно и похумано, ако веќе не планираат да ги згрижат (од градов/државните институции, или пак невладиниве организации за права/заштита на животните, кои што зимаат еден куп пари од донации за таа намена, а само знаат да ни попуваат како да се однесуваме со животните, а не прават ништо суштински, ниту за заштита и подобрување на правата и условите на животните, ниту пак за луѓето), подобро ќе биде барем да се умртват, односно еутаназија на дивите кучиња во градов, зошто вака се стварно греота, a уште поважно и пострашно се сериозна опасност, не само за деца и жени, туку дури и за возрасни мажи“, стои во дел од објавата на Богдановски.
Ова не е единствена реакција изминатите денови. Жителка на Карпош, бараше реакција од „Анима мунди“ и „Лајка“ за дислокација на кучиња, за кои посочува, дека биле истовирани близу училиште.
„Денес околу 10 часот во Карпош 4 на улица Волгоградска, кај ‘Зур маркетот’, беа истоварени 6 огромни црни кучиња. Дали може да ги замолам ЈП Лајка – Скопје и Анима Мунди да помогнат да се дислоцираат или да се преземе нешто друго? Во близина се на градинка и школски двор, дајте да превенираме на време, да не ни се случат уште една Пинтија или уште една Струга. Не е едно куче, глутница е, затоа и пишувам и молам да се преземе нешто на време“, пишува во дел од објавата.
„ЈП Лајка“ во неколку наврати, прашани за одговорноста за глутниците кучиња, пред два месеци, ни одговори дека тие се последниот обрач за ставање под контрола на проблемот.
„Одговорноста за перпетуирањето на проблемот со постоењето на бездомните кучиња е на институциите кои ги креираат законите и ги спроведуваат. ЈП Лајка е последниот обрач во ланецот за ставање под контрола на овој проблем, но за жал во јавноста само нас не препознаваат како одговорна институција за решавање на проблемот со уличната популација на кучиња. Нашата позиција во моментот е да го амортизираме проблемот кој други надлежни институции како Агенцијата за храна и ветеринарство, Министерството за земјоделство шумарство и водостопанство, Министерствоото за внатрешни работи навремено не го превенираат но и не делуваат соодветно“, стоеше во одговорот на ЈП „Лајка“.
Само денеска, во дневниот билтен на МВР стои дека во полиција се пријавени четири каснувања од кучиња. Пред два месеци, беше објавено и видео од Аеродром, на кое се гледаше како глутница бездомни кучиња нападнаа домашен миленик, додека сосптвеникот се обидуваше да го оттргне.
Скопје не е единствен град кој има проблем со бездомните кучиња.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Прва фаза од асфалтирањето на улиците „9“ и „532“ во општина Илинден
Општина Илинден интензивно работи на реконструкцијата на улиците „9“ и “532“ во Марино, пришто денеска се изврши првата фаза од поставувањето на асфалт. Во оваа прва фаза асфалтирани се околу 380 метри.
Во рамки на градежните работи се врши целосна реконструкција на улицата во должина од околу 820 метри и широчина 6 метри, реконстукција на тротоар во должина од 450 метри како и зафаќање на атмосферските води од коловозот. Улица е од големо значење бидејќи претставува главна сообраќајница во општината што ги поврзува сите населни места. За време на реализација на градежните работи на улицата е воспоставен времен режим на сообраќај, кој го спроведува фирмата изведувач на активностите на терен Филип инжинеринг Дооел Скопје.
„Во наредниот период Општина Илинден ќе продолжи со инвестиции за подобрување на локалната патна инфраструктура се со цел да им се овозможи подобри и поквалитетни услови за живеење“, велат од Општина Илинден.
Скопје
Ѓорче Петров ќе добие нова катна гаража
Со мнозинство гласови советот на Општина Ѓорче Петров изгласа отпочнување на постапка за измена и дополнување на ДУП за Градска четврт СЗ 15, Блок СЗ 15.03, за обезбедување локација за нова катна гаража. Ова денеска го соопшти градоналникот на општината Александар Стојкоски.
– По години на недостаток на паркинг простор во Реонскиот центар, конечно се преземаат конкретни чекори за решавање на овој проблем кој го мачи секојдневниот живот на жителите, порача тој.
Катната гаража ќе биде лоцирана непосредно до Реонскиот центар, на местото кое сега се користи како паркинг, и ќе обезбеди повеќе паркинг места!
– Ова е само дел од напорите на општината да ги подобри условите за живот и инфраструктурата во нашиот град, додаде Стојковски.
Скопје
Ѓорѓиевски: Салата „Партизан” во Чаир ќе биде темелно реновирана и повторно ќе си го врати својот сјај
Претседателот на ЗЕЛС, Орце Ѓорѓиевски, заедно со градоначалникот на Општина Чаир, Висар Ганиу и Министерот за спорт, Борко Ристовски, денеска ја посетија салата “Партизан” во Чаир. Најавија дека овој спортски објект, кој оставен на забот на времето, се наоѓа во катастрофална состојба, ќе биде темелно реновиран и повторно ќе го врати својот сјај. Претседателот Ѓорѓиевски му се заблагодари на Министерот Борко Ристовски за неговиот ангажман за рамномерното регионално инвестирање во сферата на спортот, што овозможува обнова на спортската инфраструктура во сите општини.
-Особено ме радува фактот што покрај култната сала “Расадник” во Кисела Вода и овој спортски објект ќе биде темелно реконструиран и повторно ќе го врати својот сјај. Реновирањето на салата “Партизан” ќе значи многу за сегашните и идните спортисти. По завршувањето на градежните активности, ќе добиеме репрезентативен објект, што ќе создаде услови за подобро спортување и развој на младите таленти. Сакам да упатам голема благодарност до Министерот Борко Ристовски за посветената работа и за вниманието што го посветува на рамномерното регионално инвестирање во сферата на спортот. Овие инвестиции не само што овозможуваат обнова на спортската инфраструктура во сите општини, туку и создаваат услови за развој на здравa и активнa младина, која е темел на нашата иднина-изјави Претседателот на ЗЕЛС, Орце Ѓорѓиевски.