На завршниот Буџетски форум, организиран од oпштина Центар и одржан во ООУ „Јохан Хајнрих Песталоци“, граѓаните и општинската администрација ги дефинираа приоритетите за 2025 година.

Се дискутираше за нацрт-програмите за наредната година, тековните предизвици и потребите на граѓаните, а беа дадени предлози и сугестии кои ќе бидат вградени во новите програми и проекти.

„Со заеднички ангажман и соработка меѓу граѓаните и општинската администрација, транспарентно и отчетно ја градиме иднината на нашата општина“, истакна Герасимовски во обраќањето.

Во нацрт-предлог буџетот за наредната година, предвидено е 45% од средствата да бидат насочени кон капитални проекти, додека останатите 55% ќе се користат за тековно и оперативно функционирање на општината.

Градоначалникот Горан Герасимовски ги презентираше клучните приоритети од нацрт-развојната програма за наредната година:

– Изградба на катна гаража во Буњаковец – Гаражата ќе има капацитет од 300 паркинг места, распределени на два подземни и два надземни ката, со почитување на хуманото живеење на околните згради. Објектот ќе биде понизок од предвиденото во Деталниот урбанистички план.

– Модернизација на јавното осветлување – Со поставување на енергетски ефикасни ЛЕД светилки и паметни ормари, процесот ќе заврши до март 2025 година, со што ќе се постигне заштеда на енергија и подобрување на безбедноста.

– Изградба на нова општинска зграда – Комплексот ќе вклучува простор за администрација, подземен паркинг со капацитет од 300 паркинг места и 100 места за велосипеди. Конкурсот за идејни решенија е завршен, а наградените идеи ќе обезбедат современи услови за жителите и администрацијата.

– Реконструкција на сала Работнички – Првата фаза на реконструкцијата започна, а се очекува целосно завршување до летото 2025 година. Просторот ќе биде обновен според сите современи стандарди.

– Реконструкција на патната инфраструктура во Тасино Чешмиче и Капиштец, како и пренамена на улицата „Мирослав Крлежа“ во пешачка зона.

– Реконструкција на паркингот зад Домот на градежници и паркот во Клиничкиот блок, на барање на граѓаните, овие два проекти ќе бидат интегрирани во развојната програма.

Градоначалникот Герасимовски потенцираше дека сите предлози на граѓаните ќе бидат внимателно разгледани и интегрирани во финалната верзија на буџетот.

Седницата за усвојување на буџетот ќе се одржи на 27.12.2024 година.

Градоначалникот на општина Центар Горан Герасимовски вчера присуствуваше на предновогодишните хуманитарни базари што се одржаа во двете основни училишта „Кирил и Методиј“, „Коле Неделковски“ и градинката „13 Ноември“. На овие базари, изложени беа креативни рачни изработки на учениците и дечињата.

Герасимовски, потенцираше дека ваквите хуманитарни активности се важен дел од образовниот процес, затоа што најмладите од мали нозе се учат за солидарност и за емпатија да се помогне онаму кадешто е најпотребно.

„Упатувам огромна благодарност до сите ученици кои учествуваат на базарот, до наставниот кадар и до родителите кои ги подготвуваа изработките. Ваквите хуманитарни базари не само што носат радост и новогодишна атмосфера, туку исто така ги учат нашите деца на важноста на солидарноста, љубовта и помагањето на другите. Собраните средства ќе се донираат во хуманитарни цели“, изјави Герасимовски.

На 21 декември, јавното претпријатие „Водовод и канализација“ ќе го затвори главниот градски цевковод во кругот на касарната во Ѓорче Петров поради санација на сериозни дефекти. Процесот на санација ќе опфати поправка на еден од поголемите дефекти на улицата Никола Парапунов во Карпош 4, каде веќе десетина дена има излевање на вода на улицата.

„Додатно ќе се санираат и три други дефекти на затворачи по должината на главниот цевковод Ф1600мм, од кружниот тек во Ѓорче Петров до раскрсницата на булевар Партизански одреди со улица Никола Парапунов“, соопштија од „Водовод и канализација“.

Цевководот ќе биде затворен за време на интервенцијата, а завршувањето на работите ќе биде соопштено по успешната санација.

„Овој вид на затворање на главниот цевковод не се случува често. Последен пат се изврши вакво затворање во 1991/1992 година. Интервенцијата е неопходна за отстранување на дефекти од овој тип“, велат од „Водовод и канализација“.

Со завршување на санацијата, ќе се подобри водоснабдувањето и ќе се намали загубата на вода, како и ќе се ревитализира водоводниот систем од Ѓорче Петров до Карпош.