Скопје
Поставен камен-темелник на „Верверичка”, новата градинка во општина Кисела Вода
Со свечено поставување камен-темелник, денес, почна изградбата на новата градинка „Верверичка“ во населбата 11 Октомври – згради, која за 6 месеци ќе може да ги прими првите дечиња. Таа ќе има капацитет за 110 деца и ќе се гради преку финансиско партнерство помеѓу Општина Кисела Вода и Комерцијална банка АД Скопје. На настанот градоначалникот Орце Ѓорѓиевски и д-р Маја Стевкова-Штериева, главен финансов директор и член на Управниот одбор на Комерцијална банка, ја назначија важноста на ваквите проекти, кои претставуваа инвестиција во раниот детски развој, кој е клучен во формирањето на личноста на секој човек.
„Во новата градинка најмногу место ќе има за најмалите дечиња, кои чекаат да бидат запишани во јасли, што за мене како градоначалник е убава вест бидејќи е сигурен знак дека нашата општина расте. Децата се нашиот највреден ресурс и инвестирањето во нив е најзначајниот влог што можеме да го направиме. Убаво е да се има сојузници во оваа значајна мисија и затоа сакам да ѝ се заблагодарам на Комерцијална банка АД Скопје, со која заеднички, преку финансиско партнерство, го градиме овој нов објект. Имено, за реализација на овој проект Општина Кисела Вода обезбеди 8 милиони денари, а Комерцијална банка учествува со значајни 6 милиони денари. Заедничката посветеност кон заедницата и разбирањето за важноста на детското образование и развој се заеднички благородни цели со кои ги обликуваме темелите на иднината на нашето општество. Би сакал да истакнам дека ние како општина сме исклучително посветени во оваа област за што говорат сите преземени активности во овие две години. Веднаш до нас се наоѓа објектот ‘Кокиче’, чиј капацитет неодамна беше проширен за 90 деца. Отворивме две нови детски градинки, во Усје и во Драчево. Во моментот се одвива проект за проширување и реконструкција на дел од градинката ‘Пеперутка 1’ во Драчево, каде што 50-ина години не беа извршени речиси никакви реконструктивни зафати. Обезбедени се и финансиски средства за изградба на уште една нова градинка во Расадник, а заедно со објектот ‘Верверичка’, кој денес го почнуваме, силно верувам дека сме на вистинскиот пат да ја оствариме целта – да ги затвориме наследените листи на чекање од минатото, на кои имаше над 400 деца“, изјави градоначалникот Ѓорѓиевски уште еднаш заблагодарувајќи ѝ се на Комерцијална банка АД Скопје, со која беше поделена визијата за подобра и поуспешна заедница.

„Огромно е задоволството кога новата година ја почнуваме со нова благородна мисија, со која ќе обезбедиме модерна градинка за дечињата од Кисела Вода. Комерцијална банка е особено горда на секој свој придонес, кој значи подобра грижа, поздрав раст и повесели денови за секое дете. Затоа дониравме за реновирање на Детската клиника за кардиологија и ревматологија. Затоа помагаме за опремување сензорни соби во училиштата. Го поттикнуваме инклузивното општество во кое сите треба да имаме еднакви можности. А донацијата за изградба на градинка во Кисела Вода, дефинитивно, ни го стопли срцето во овие студени денови затоа што значи уште едно весело катче исполнето со детска смеа и дружба“, изјави на свеченоста д-р Маја Стевкова-Штериева, главен финансов директор и член на Управниот одбор на Комерцијална банка.
Градинката „Верверичка“ е осмиот објект во состав на ЈДГ „Весели цветови“. Со нејзината изградба ќе се добијат шест нови занимални, во кои ќе може да бидат згрижени речиси 110 деца.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Неколку скопски општини денеска без струја
Од ЕВН Македонија АД известуваат дека денеска без електрична енергија ќе останат:
– од 08:30 до 14:00 часот, корисниците од дел од улиците: Полог и Кочанска, општина Кисела Вода;
– од 08:30 до 16:00 часот, корисниците од населените места и објектите од село Алдинци кон Солунска Глава, општина Студеничани;
– од 09:00 до 14:00 часот, корисниците од дел од ул. Македонско Косовска Бригада, општина Шуто Оризари;
– од 09:00 до 14:00 часот, корисниците од објектите во околината на зграда бр. 17 на бул. Партизански Одреди, општина Центар;
– од 09:30 до 13:00 часот, корисниците од ул. 6 во село Бардовци, општина Карпош.
Македонија
Комунална хигиена мора да се освести ни се спрема катастрофа, вели Герасимовски
Градоначалникот Горан Герасимовски, во изјава за медиуми пред почетокот на средбата со претставниците на ЗЕЛС за хаосот со сметот во Општина Центар, но и на територија на градот Скопје потенцираше дека мора да се најде итно решение за овој проблем кој веќе ги помина сите граници на нормално живеење.

„Изминатите пет дена немаше воопшто ниту еден камион од комуналното претпријатие на територија на Општина Центар. Ние имаме дополнително изнајмена механизација, нашите хигиеничари работат во две смени за отстранување на сметот од улиците. За жал, и тоа не е доволно, искрено не е доволно. Гледаме што секојдневно се случува, немаме ингеренции да го отстрануваме сметот од самите контејнери, немаме ни таква механизација, туку го отстрануваме само сметот покрај самите контејнери. И тоа не е доволно. Дополнително, имаме кучиња скитници кои го разнесуваат целото ѓубре по улиците и ни прави дополнителен проблем на нашите хигиеничари. Но, даваме се од себе да го подигнеме нивото на хигиена на повисоко ниво. Верувам дека јавното претпријатие ќе се свести и дека во наредните денови ќе се појави низ Општина Центар и другите општини за да го тргне сметот од улиците“, рече Герасимовски.

Македонија
Посебен режим на сообраќај утре во центарот на Скопје
Утре во 10:00 часот поради одржување на атлетска трка во централното градско подрачје на Скопје, со траса на движење од паркот „Жена борец“ преку Камени мост, ул. „Иљо Војвода“, тротоарот на мостот „Гоце Делчев“ и по кејот на реката Вардар и обратно, за сообраќај ќе биде затворена ул.„Иљо Војвода“, пешачките површини и делот од кејот по кој ќе се движат учесниците во трката.
Единицата за безбедност на патниот сообраќај при СВР Скопје ќе преземе мерки за посебен режим на сообраќај, при што сообраќајот ќе се пренасочува по околните сообраќајници.
МВР апелира до граѓаните да ги почитуваат наредбите кои ќе ги издаваат полициските службеници по сообраќајниците каде што ќе се одвива настанот.

