Скопје
Ѓорѓиевски: Комплетно го менуваме ликот на Потстаница креирајќи вистинска урбана населба
Потстаница комплетно го менува својот лик станувајќи вистинска урбана населба, истакна градоначалникот Ѓорѓиевски при денешниот увид во Драчево.
Улицата Сердарот од 6500 м2, која со години беше заборавена, сега добива нов асфалт и е проширена, пешачка зона, а краците се поплочени со павер-елементи. Општина Кисела Вода го реши и долгогодишниот проблем со паркирањето и метежот во овој дел од општината, па сега жителите имаат на располагање 100-ина паркинг-места, велат од Општината.
„Младите ќе имаат можност да спортуваат на новото фудбалско игралиште со квалитетна вештачка трева, како и новото кошаркарско во негова близина, а за најмладите жители градиме ново детско катче со модерни реквизити, каде што детската игра тука ќе може непречено да се одвива. Како новитет, градиме и нов мини плоштад, кој ќе биде место за собирање на сите жители од Потстаница, за дружба и одмор, но и многу манифестации. Иднината се гради со дела, а за нас тие говорат најмногу“, изјави Ѓорѓиевски додавајќи дека во Кисела Вода повеќе нема заборавени места и дека работата продолжува со уште посилно темпо во секоја населба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Реконструиран покривот на ООУ „Ристо Крле“ во Кадино, општина Илинден
Во Општинското основно училиште „Ристо Крле“ заврши реконструкцијата на кровната површина на централното училиште во Кадино.
Во рамки на проектот извршена е целосна замена на постоечката кровна површина на централното училиште. Отстранети се старите салонитни табли кои содржеа азбестни компоненти, отстранети се хоризонталните и вертикалните олуци, поставен е кровен покривач од пластифициран валовит лим. Воедно поставени се хоризонтални и вертикални олуци, опшивки кај вентилациони канали, како и снегобрани.
Денес градоначалникот на Општина Илинден, Александар Георгиевски го посети училиштето заедно со директорот Јовче Петковски.
Реконструкцијата на кровната површина се одвиваше во неколку фази, пришто сега целосно е комплетиран проектот. Со оваа замена на кровната конструкција опфатена е површина од околу 1600м2 на објектот каде е обезбедена хидротермичка изолација, со тоа се спречува протекување и оштетување на внатрешните простории во оваа образовна институција.
ООУ „Ристо Крле“ е изградено пред 44 години, за прв пат се врши замена на кровната површина, а заедно со подрачните објекти во населените места Мралино и Бунарџик учат вкупно 320 ученици.
Скопје
Нова пешачка патека од Волково до Орман
Општина Ѓорче Петров објавува старт на реализацијата на уште едно ветување дадено кон граѓаните – изградба на нова пешачка патека и улично осветлување од Волково до Орман. Патеката ќе биде во должина од 1.800 метри и ширина од 1.4 метри, а целта е да се поврзе основното училиште „Јоаким Крчовски“ со село Орман, решавајќи децениски проблем од недостиг на безбедна зона за пешачење.
Со оваа инвестиција, општината поставува и ново улично осветлување на патеката, со должина од над 1.400 метри. Вкупната вредност на проектот изнесува 7.000.000 денари. Оваа иницијатива не само што ги заштитува учениците и жителите, туку и создава повеќе можности за спорт, рекреација и здрав живот.
Патеката, која ќе биде комплетно осветлена, ќе обезбеди непречено и безбедно движење за сите граѓани.
„Оваа патека е важен чекор кон зголемување на безбедноста на пешаците, подобрување на сообраќајната поврзаност и зголемување на удобноста при движењето,“ истакнуваат од Општина Ѓорче Петров, додавајќи дека очекуваните придобивки од проектот ќе бидат значајни за жителите на Орман. Изградбата на пешачката патека ќе овозможи значително подобрување на сообраќајната комуникација, а пешаците ќе уживаат во зголемена безбедност и удобност, особено во вечерните часови благодарение на новото осветлување. Најважно од сè, новата патека ќе создаде чувство на сигурност за сите граѓани, што е особено важно за жителите на Орман, кои сега ќе имаат безбеден и модерен простор за движење.
Скопје
ПОЦ: Пријавен е поставен лажен дневен паркинг-билет, внимавајте
ПОЦ информира дека денес пријавен е поставен лажен дневен паркинг-билет (ДПК) при што се злоупотребени дизајнот и логото на ЈП „Паркинзи на Општина Центар“. На него стои QR-код, кој треба да се скенира и да се изврши онлајн-уплата за него, а тој води кон веб-адреса, која нема поврзаност со ЈП ПОЦ и има цел преку измама да се извлечат парични средства.
„Ги замолуваме граѓаните да бидат внимателни и доколку забележат ДПБ од овој тип веднаш да нè известат. Единствената веб-адреса за онлајн-наплата на ДПК на претпријатието е https://users.poc.mk/PayDpk.
Од наша страна во моментот се преземаат мерки за пријави до надлежните органи и информирање на јавноста со цел заштита на граѓаните“, велат од ПОЦ.