Стотици урбани моторџии облечени во костуми, палта, вратоврски и елегантни чевли денеска по десетти пат продефилираа низ улиците на Скопје во рамки на глобалната акција The Distinguished Gentleman’s Ride, посветена на подигање на свеста за машкото здравје и борбата против ракот на простатата.

Со задолжителна кацига на глава и на класични мотори, учесниците беа дел од светско движење што годинава се одржа во 108 држави и собра над илјада учесници.

Скопје за првпат стана дел од оваа урбана и хуманитарна мото-приказна во 2016 година, благодарение на иницијаторите Игор Стефановски и Благоја Петровски, кои успеаја низ годините да го задржат ентузијазмот и интересот за ова уникатно дружење со хуманитарна цел.

Како и претходните години, собраните донации ќе бидат уплатени на сметката на фондацијата „Мовембер“ во Лондон, од каде потоа се распределуваат кон болници и институции кои се борат за подобрување на машкото здравје и заштита од рак на простатата.

Општина Аеродром денеска одбележа два значајни јубилеја – 20 години од своето основање и 153 години од раѓањето на македонскиот револуционер Јане Сандански.

Свеченоста се одржа во паркот кој го носи името на Сандански, каде што бројни граѓани од различни генерации, претставници на локалната власт, образовни институции и граѓански здруженија оддадоа почит пред неговиот споменик.

Вршителот на должноста градоначалник на Општина Аеродром, Дејан Митески, заедно со претставници од Советот на општината, делегации и граѓани, положи свежо цвеќе во чест на македонскиот војвода. Свеченоста продолжи со културно-уметничка програма – хорот на ООУ „Блаже Конески“ ја исполни македонската химна, а оркестарот на ООУ „Лазо Ангеловски“ приреди музички настап. Фолклорниот ансамбл „Никола Јонков – Вапцаров“ ја збогати атмосферата со традиционални игри.

На настанот беа доделени плакети, признанија и благодарници на истакнати жители на Аеродром кои со својата работа во уметноста, спортот, науката и културата ја афирмираат општината и надвор од државните граници.

Признанија добија и вработени во општинската администрација кои со години вложуваат труд за подобрување на животот во оваа општина. Наградени беа и млади таленти, кои уште од најрана возраст остваруваат успех во различни области.

Од Општина Аеродром порачуваат дека и во иднина ќе продолжат да го поддржуваат талентот, ангажманот и развојот на сите граѓани, со цел општината да остане пример за успех и напредок.

Денеска во организација на Здружението за спорт и рекреација „Прв до врв – Скопје“, ќе се одржи тринаесеттото издание на традиционалниот спортско-рекреативен настан „Прв до врв“, кој секоја година обединува љубители на велосипедизмот, планинарењето и природата.

Според информациите од Министерството за внатрешни работи, стартот на велосипедската трка ќе биде во 09:45 часот пред Музејот на град Скопје, а маршрутата ќе се движи по ул. Св. Кирил и Методиј, бул. Св. Климент Охридски, бул. Мајка Тереза, ул. Тодор Александров и по локалниот пат кон Средно Водно до Милениумскиот крст.

Планинарите ќе стартуваат во 10:00 часот од пред ОУ „Кочо Рацин“, а ќе се движат по ул. Тодор Александров, преку ул. Салвадор Аљенде, по планинската патека кон Средно Водно и завршна точка на врвот на Водно.

Поради одржување на настанот, СВР Скопје ќе воведе посебен режим на сообраќај, при што дел од улиците ќе бидат затворени или со пренасочен сообраќај, а патролни полициски екипи ќе бидат распоредени долж трасата.

Од МВР апелираат до граѓаните да ги почитуваат наредбите и упатствата од полициските службеници, со цел настанот да помине безбедно и во спортски дух.

13 издание на „Прв до врв“

Тринаесеттото издание на спортско-рекреативниот настан „Шпаркасе лајф – прв до врв“ ќе се реализира денеска на планината Водно во Скопје. Настанот ги обединува љубителите на планината, спортот и рекреацијата во пет натпреварувачки категории до врвот на Водно: планинско трчање – 4,5 километри, планински велосипедизам – 9 километри, друмски велосипедизам – 11,4 километри, електрични велосипеди – 9 километри и тим-билдинг трка за компании – 4,5 километри.

Според најавата од организаторите, трките во велосипедизам ќе започнат во 9:45 часот од Музејот на град Скопје со летечки старт пред ОУ „Кочо Рацин“, додека планинското трчање и тим-билдинг трката ќе стартуваат директно пред училиштето во 10 часот. Патеките вклучуваат контролни точки кај полицијата, Средно Водно и пред целната линија на врвот.

– Секој кој ќе ја заврши трката добива финишер медал. Предвидени се и медали во сите старосни групи и во машка и женска конкуренција, под услов да има најмалку три учесници по категорија. Настанот привлекува сè повеќе учесници од странство – годинава веќе се пријавени учесници од Португалија, Италија, Бугарија и САД, што му дава дополнителна енергија и интернационален дух на предизвикот. Минатата година, беа урнати два рекорда – во друмски велосипедизам за жени (42:36) и во планинско трчање за мажи (31:50), што се нови најдобри времиња во искачувањето до врвот на Водно. За сите што ќе урнат рекорд и оваа година, „Шпаркасе банка“ повторно обезбедува награден фонд од 1.000 евра. Дополнително, како главен поддржувач, тие ќе постават „лаунџ корнер“ со изненадувања, награди за посетителите и активности што го збогатуваат искуството за сите учесници, се наведува во соопштението.

На целта, на врвот на Водно, предвиден е пикник, а присутните ќе ги забавуваат диџеј „Вито“ и бендот „Рингтоунс“. Предвидено е по забавната програма, да се одржи церемонија за прогласување на победниците.