Скопскиот градоначалник, Коце Трајановски, во чест на 13. Ноември, Денот на ослободување на Скопје, се сретна со претставници на Градскиот одбор на Сојуз на борци од Народно Ослободителната антифашистичка војна на Македонија.

Борците на средбата во Кабинетот на градоначалникот евоцираа спомени од ослободувањето на Скопје, на овој ден пред 71 година, а градоначалникот Трајановски изрази длабока почит спрема нив и благодарност за нивниот придонес за ослободувањето на Скопје.

„Славиме 71 година од ослободувањето на Скопје, односно го славиме 13 Ноември денот кога Вие и Вашите соборци сте се бореле за негово ослободување  и на средбата со Вас се обидуваме да се сетиме на некои моменти од историјата, но ова е и одлична можност да се договориме какви чекори треба да преземеме за зачувување на тие спомени и добри дела, што беа пример за нашите генерации, но и за следните генерации коишто доаѓаат. Јас и граѓаните на Скопје чувствуваме неизмерна почит за борците коишто пред точно 71 година ги дадоа животите за слободата на овој град. Во тек е возобновувањето на  Споменикот на стреланите и Работилницата за производство на експлозивни направи, а готови се и бистите на хероите Панче Арсовски и  Панче Неделковски. Бистата на Панче Арсовски ќе се постави во средното училиште на Град Скопје кое го носи неговото име, а бистата на Панче Неделковски во Градскиот парк“, рече Трајановски.

За време на средбата,  Трајко Стаматовски од име на борците ослободители на Скопје му се заблагодарија на градоначалникот Трајановски за приемот, како и за добрата соработка и поддршката, што тој им ја дава на членовите на Сојузот на борците. /крај/