Јубилејното десетто издание на „Бела ноќ“ ќе биде отворено во сабота вечер, 04-ти октомври, во 20 часот во Националната галерија Даут пашин амам, каде што ќе биде организирана изложба насловена како „Еден век (ретроспектива)“ од раѓањето на Василие Поповиќ – Цицо, основоположникот на македонската сценографија, карикатурист и сликар. 

На изложбата ќе присуствува и градоначалникот на Град Скопје, Коце Трајановски. 

Во јубилејното десетто издание на „Бела ноќ“, што е во организација на Младинскиот културен центар-Скопје, а под покровителство на Град Скопје, ќе бидат опфатени следниве области: визуелни уметности (ликовна уметност, фотографија, инсталација, видеоарт, стрип, кибернетичка уметност), применети уметности (архитектура, визуелен/индустриски/веб дизајн, дигитални креации), поезија, музика, филм и јавна уметност и урбани точки. 

Како и во изминатите години, така и оваа „Бела ноќ“ нејзината програма ќе се одвива на  многу локации низ градот. 

И годинава во Градското кино „Милениум“ ќе се одржува 24 часовниот филмски маратон на најпознатите и најактуелни хитови од седмата уметност. 

Бидејќи е десетто издание на „Бела ноќ“  ќе бидат поставени и  10 музички сцени кои ќе опфаќаат рок, џез, хип-хоп, хеви метал музика, а уметниците ќе потекнуваат од сите страни на светот: Јапонија, Велика Британија, Франција, Австрија и речиси од сите земји на Балканот. 

За „Бела ноќ“ е организиран е бесплатен транспорт со линиите 8 и 15А на ЈСП од 12 до 16 часот, како и бесплатен транспорт со автобусите на ЈСП од 19 часот, на сите линии кон центарот на Скопје.крај/мф