Скопје
Доделени нови 50 решенија за легализација на дивоградбите во Кисела Вода

Премиерот Никола Груевски и градоначалникот на општина Кисела Вода, Билјана Беличанец-Алексиќ, во недела во Големата сала на општината доделија нови 50 решенија за легализација на дивоградби.
Во обраќањето пред присутните, Груевски истакна дека Владата со овој закон најде начин да реши еден општествен проблем кој се таложел со години и да им овозможи на голем број граѓани да ги легализираат своите домови.
„Конечно падна големиот товар кој луѓето го носеа по 10, 15 или 30 години. Можноста за поднесување барања за легализација ја искористија околу 350.000 граѓани низ земјата. Тоа е уште една потврда за масовноста на оваа појава и за големината на проблемот со кој се соочуваме како држава. Кисела Вода е една од општините во кои овој проблем е најприсутен. Таа е и една од најуспешните општини во овој дел и заслужува честитки. Ги повикувам и другите општини да го следат примерот“, рече Груевски.
Градоначалникот на општина Кисела Вода Билјана Беличанец-Алексиќ ја објасни важноста на легализацијата, како процес кој на граѓаните ќе им овозможи да станат правни сопственици на својот имот, а општината пак, ќе може да носи нови урбанистички планови во кои ќе ги впише новолегализираните објекти и со тоа взаемно ќе се придонесе во креирањето на урбанистички ред на оваа територија.
„Во изминатата година Општината веќе донесе пет детални урбанистички планови со кои покрај тоа што се вклопени голем број легализирани објекти, се овозможуваат услови за нови градби, доградби, надградби… Сè, во интерес на граѓаните и развојот на општината. Исто така во рамките на своите финансиски можности се труди да ја подобри инфраструктурата, а посебно во оние населби каде се наоѓаа најголемиот број на диви градби“,истакна градоначалникот Беличанец-Алексиќ.
Со денешните 50 новододелени решенија, бројот на легализирани објекти во општина Кисела Вода се искачи на 2.967. На ниво на Македонија се решени речиси 100 илјади барања од поднесените 350 илјади. Рокот за поднесување на барањата е продолжен до крајот на 2015 година. Премиерот Груевски ги повика останатите околу 250 илјади граѓани (семејства) да побрзаат и да ги комплетираат документите за да го стигнат рокот и, како што рече, да го искористат моментот и добрата волја што ја има сегашната влада. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Итна седница на Советот на Општина Гази Баба

Денеска со почеток во 12:00 часот, по барање на градоначалникот Бобан Стефковски, Советот на општина Гази Баба ќе одржи итна седница со единствена точка на дневен ред: Одлука за доделување на финансиска помош за семејствата на настраданите во несреќата во Кочани.
Градоначалникот Бобан Стефковски претходно извести дека се потпишал во книгата на жалост која е отворена во Собранието на Република Македонија.
„Како човек и родител сочувствувам со семејствата кои ги загубија своите деца во несреќата во Кочани. Нема зборови кои можат да ја опишат болката и тагата која ја чувствуваме сите ние. Македонија е завиена во црно и заедно тагува“.
Скопје
Отстранети 𝟩𝟧 кубни метри отпад од диви депонии во скопските општини Чаир, Бутел, Центар и Ѓорче Петров

Во текот на вчерашното деноноќие, екипите на ЈП Комунална хигиена-Скопје отстранија приближно 75 кубни метри отпад од диви депонии лоцирани во скопските општини Чаир, Бутел, Центар и Ѓорче Петров.
„Во општината Чаир е интервенирано на улицата Џон Кенеди, во непосредна близина на ООУ „Васил Главинов“ каде што се подигнати близу 20 кубни метри непрописно одложен кабаст и мешан комунален отпад. Посочената локација претставува таканаречена „црна точка“ каде што веќе подолг период континуирано се одлага отпад на јавни и сообраќајни површини. Во оваа скопска општина беа отстранети и 10 кубни метри отпад од дива депонија лоцирана на улицата Славеј Планина, во близина на скопското Теќе“, известува ЈП Комунална хигиена-Скопје.
„На улицата Ферид Бајрам во скопската општина Бутел се подигнати 10 кубни метри непрописно одложен кабаст и отпад од картонски пакувања. ЈП Комунална хигиена-Скопје реализираше активности за подигнување отпад од диви депонии и во општината Центар, каде што е интервенирано на улицата Васил Ѓорѓов и на булеварот Илинден, во близина на Зоолошката градина и Тениското игралиште, при што се расчистени 15 кубни метри кабаст, градежен и отпад од картонски пакувања одложен на сообраќајни и тревни површини.
Во скопската општина Ѓорче Петров беа подигнати вкупно 20 кубни метри непрописно одложен кабаст отпад на главната улица и на улицата Борис Сарафов“, соопшти ЈП Комунална хигиена-Скопје.
Македонија
Без струја денеска дел од Карпош

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 11.00 часот, дел од корисниците на ул.Осло (општина Карпош)
– во периодот од 11.00 до 14.00 часот, дел од корисниците на ул.Петар Драганов и Софиска (општина Карпош)
– во периодот од 12.30 до 14.30 часот, дел од корисниците на ул.Бањалучка спроти бр.20 и ул.Будимпештанска бр.35Б (општина Карпош)