Сите средства кои се тргнати или намалени за одредени ставки во Буџетот на град Скопје за 2014 година, се направени со соодветно објаснување и логика, а измените и дополнувањата на Буџетот на Град Скопје за 2014 година се прават во насока на овозможување на нормално функционирање на градот.

Ова во понеделникот беше соопштено до медиумите од Град Скопје како реакција по однос на изјавата на советникот Предраг Трпески од опозициската СДСМ, кој обвини дека градоначалникот Трајановски троши пари на луксуз наместо за клучни проекти за граѓаните на Скопје.

Од Градот додаваат дека главна причина поради која се носи оваа одлука е помалиот прилив на средства во однос на проекциите за Буџетот на град Скопје за 2014 година, со што се појави потреба од негова корекција.

„Советниците на СДСМ во своите обраќања изразија противење на тргањето на средствата за реализација на изградбата на подземната сообраќајница во Скопје. Сакаме да потсетиме дека Градот Скопје прави сé во насока на реализација на овој проект, од изработка на сообраќајни и основни проекти, до ангажирање на меѓународна консултантска фирма, за на крај да бидат распишани два меѓународни тендери за изградба на овој инфраструктурен проект. Во реализацијата на овој проект се вклучи и Владата на Република Македонија, која донесе одлука да покрие две третини од сумата потребна за овој проект. На овие два тендери, пристигнатите суми кои беа понудени од компаниите беа превисоки, па оттаму реализацијата на истиот е одложен, но тоа воопшто не значи дека Градот Скопје се откажува од реализацијата на овој проект“, се вели во реакцијата.

Од Град Скопје велат дека нема потреба овие финансиски средства да стојат во буџет, ако реализацијата на истиот нема да отпочне оваа буџетска година./крај/мф/ап