Граѓанската иницијатива „Го сакам ГТЦ“ во четврток ја најави широката граѓанска кампања за зачувување на автентичниот изглед на ГТЦ, за кој граѓаните на Општина Центар ќе одлучуваат на референдум на 26-ти април.

Излагање имаше претставничката на оваа иницијатива, Даница Павловска – Циги, која најави дека референдумот ќе испише нова страница во историјата на македонската демократија, овозможувајќи им на самите граѓани да учествуваат во донесувањето одлуки од заеднички интерес.

Истовремено, таа го повика секој жител на општина Центар да го искористи своето право на глас и со тоа да придонесе кон развојот на демократијата во нашата држава. Исто така, таа нагласи дека и покрај тоа што останатите граѓани на Скопје и Македонија нема да бидат во можност да гласаат, тие сепак ќе можат значително да придонесат за успешноста на овој референдум.

Во таа насока, Даница Павловска ги повикува сите граѓани, без разлика во која општина живеат, да помогнат со активно учество во нивните активности, но и преку информирање на своите познати и блиски кои имаат постојано жителство во општината Центар.

Меѓудругото, на прес конференцијата беше најавено дека в понеделник, на 6-ти април, официјално започнува заедничката граѓанска кампања за обнова на ГТЦ, но со зачувување на неговиот автентичен изглед. За таа цел, како што вели Даница Павловска, се повикуваат сите граѓани, граѓански асоцијации, активисти и професионални здруженија да се приклучат кон широкото граѓанско движење „ЗА ГТЦ“.

Понатаму, беше упатен и повик кон секој граѓанин кој сака да волонтира, помогне, или на било каков начин да придонесе кон зачувување на ГТЦ, слободно да се пријави во регистарот за волонтери кој е поставен на Фејсбук страната „Го сакам ГТЦ“.

Граѓанската иницијатива „Го сакам ГТЦ“ презентираше и резултати од истражување на јавното мислење кое во изминатите денови било спроведено на територијата на општина Центар.

Според овие резултати, 86,2% од граѓаните на Центар ја поддржуваат иницијативата „Го сакам ГТЦ“, а дури 32,5% во изминатите две години учествувале барем во една активност или кампања како што е гушкањето, потпишувањето петиција или протестирањето. Истражувањето, исто така, покажало дека дури 85% од граѓаните на Центар ја поддржуваат одлуката да се одржи референдум за изгледот на ГТЦ, додека, пак, 82,1% се согласуваат со ставот дека „ГТЦ треба да се реновира, но со задржување на автентичниот изглед на фасадата.“

„Токму овие резултати, на убедлив начин ја покажуваат поддршката од граѓаните која ние мора да ја оправдаме, но и да ги вложиме сите сили да ги поттикнеме на 26 април да излезат на гласање во што поголем број. Овој референдум мора да не обедини сите!“, истакна Даница Павловска. /крај/со/ст