Општина Карпош доби кредит од 800.000 евра од Светска Банка кој што ќе биде наменет за изградба на атмосферска мрежа и реконструкција на коловози и тротоари на неколку улици.

Договорот за финансиска поддршка во вторникот, 9ти декември, го потпишаа градоначалникот на Општина Карпош, Стевчо Јакимовски и вицепремиерот  и министер за финансии, Зоран Ставревски. 

Од Општината информираат дека средствата во износ од 48.424.933 денари се добиени на 13 години отплата со три години грејс период.     

Според изјавата на Јакимовски, средствата ќе се наменат за изградба на атмосферска мрежа на улиците „Анкарска“, „Багдадска“, „Алжирска“, „Борка Талевски“, „Влае“, „Франц Прешерн“ и „Корушка“ и реконструкција на коловози и тротоари на улиците „Прашка“ и „Струшка“. 

„Со тоа на жителите на Влае нема веќе да им се случува мешање на атмосферската со фекална канализација и ќе добијат најсовремена подземна инфраструктура. Инаку, Општина Карпош и досега во континуитет работеше во изградбата на фекална и атосферска канализација како и во реконструкција на коловозите на своја територија, што резултираше со тоа дека и во најдождливите денови, во ниту еден дел, немаше поплавени улици и затнати канализации“, рече градоначалникот Јакимовски. 

Министерот за финансии, ,Ставревски истакна дека кредитот за кој гарант е Владата на Република Македонија е со 0,6 проценти камата и засега искористеноста од проектот за поддршка на општините,  што е  во соработка со Светската банка, е на високо ниво.  Од вкупно 56 милиони евра, 34 општини веќе искористиле 26 милиони евра.крај/мф